Zekariya 3:1-10
3 Mpoonya wakanditondezya Joshua+ mupaizi mupati kaimvwi kumbele lyamungelo wa Jehova, a Saatani+ kaimvwi kujanza lyakwe lyalulyo kuti amukazye.
2 Kumane mungelo wa Jehova wakaambila Saatani kuti: “Jehova akukalalile yebo Saatani,+ inzya, Jehova ooyo iwasala Jerusalemu+ akukalalile! Sena ooyu tali buyo cisisi ciyaka icayokolwa mumulilo?”
3 Lino Joshua wakasamide zisani zilaatombe alimwi wakaimvwi kumbele lyamungelo.
4 Mungelo wakaambila baabo ibakaimvwi kumbele lyakwe kuti, “Amumusamunune zisani eezyo zilaatombe nzyasamide.” Kumane wakamwaambila kuti, “Bona, ndacigwisya cibi cako,* eelyo ulasamikwa zisani zibotu.”*+
5 Mpoonya ndakaamba kuti: “Kumutwe amumusamike citambala citakwe tombe.”+ Aboobo bakamusamika citambala citakwe tombe kumutwe alimwi bakamusamika azisani; lino awalo mungelo wa Jehova wakaliimvwi munsi-munsi.
6 Kumane mungelo wa Jehova wakaambila Joshua kuti:
7 “Mboobu mbwaamba Jehova wamakamu, ‘Ikuti naa unakweenda munzila zyangu akuzuzikizya mikuli njojisi kulindime, nkokuti yebo uyooba mubetesi muŋanda yangu+ alimwi uyoolanganya* mabuwa aangu; alimwi mebo ndiyookupa lwaanguluko lwakunjila akati kabaaba baimvwi waano.’
8 “‘Lino komvwa yebo Joshua O Mupaizi Mupati, yebo abeenzinyoko bakkala kumbele lyako, nkaambo baalumi aaba ncitondezyo; amubone ndilaleta mubelesi wangu+ wiitwa kuti Cisyuukila!+
9 Amubone bbwe eelyo ndindabikka kumbele lya Joshua! Abbwe eelyo lyomwe, kuli meso aali ciloba; alimwi ndilazekaula bulembo alindilyo,’ mbwaamba Jehova wamakamu, ‘aboobo ndiyoogwisya mulandu wacisi eeco mubuzuba bomwe.’+
10 “‘Mubuzuba oobo,’ mbwaamba Jehova wamakamu, ‘Umwi aumwi wanu uyootamba mweenzinyina kuti aboole kuzookkala munsi lyamusaansa wakwe alimwi amunsi lyamukuyu wakwe.’”+
Bupanduluzi buyungizyidwe
^ Naa “ndaugwisya mulandu wako.”
^ Naa “zikobela zibotu zyeebeka.”
^ Naa “uyoolinda.”
