Zekariya 4:1-14
4 Lino mungelo ooyo iwakali kwaambaula andime wakapiluka akundibusya, mbuli mbwabusyigwa muntu muŋonzi.
2 Kumane wakandibuzya kuti: “Ino ubwene nzi?”
Aboobo ndakati: “Ndibwene cibikkilo calambe cangolida yalo-yalo,+ mpoonya atala lyancico kuli mutiba. Cijisi malambe aali ciloba,+ inzya aali ciloba, kumane malambe aayo aali atala lyancico ajisi mipaipi iili ciloba.
3 Alimwi kuli zisamu zyobilo zyamaolifa kumbali lyancico,+ cimwi cili kulubazu lwakululyo kwamutiba mpoonya cimwi cili kulumwensyi kwanguwo.”
4 Mpoonya ndakabuzya mungelo ooyo iwakali kwaambaula andime kuti: “Omwami wangu, ino zintu eezyi zyaamba nzi?”
5 Aboobo mungelo ooyo iwakali kwaambaula andime wakandibuzya kuti: “Sena tozyi ncozyaamba zintu eezyi?”
Ndakavwiila kuti: “Inzya tandizyi pe, omwami wangu.”
6 Aboobo wakandaambila kuti: “Mboobu mbwaamba Jehova kuli Zerubabeli: ‘“Ciyoocitika ikutali akaambo kampi yabasikalumamba, naa akaambo kanguzu,+ pele kwiinda mumuuya wangu,”+ mbwaamba Jehova wamakamu.
7 Ino nduwe ni, yebo ocilundu cipati? Uyooba nyika iiyalene*+ kumbele lya Zerubabeli.+ Alimwi walo uyooleta bbwe lyaatala kumwi bantu kaboongolola kuti: “Cabota! Cabota!”’”
8 Ijwi lya Jehova lyakandisikila alimwi, kaliti:
9 “Imaanza aa Zerubabeli ngaakabikka ntalisyo yaŋanda eeyi,+ alimwi maanza aakwe ngamunya ngaayakumanizya kwiiyaka.+ Eelyo muyoozyiba kuti Jehova wamakamu nguwandituma kulindinywe.
10 Nkaambo ino nguni ooyo uusampaula buzuba bwamatalikilo aazintu zisyoonto?+ Nkaambo bayookondwa akubona cipimyo cakupimya bwiime bwacintu mujanza lya Zerubabeli. Aaya aali ciloba ngameso aa Jehova, aayo aalanga koonse-koonse munyika yoonse mbwiizulwa.”+
11 Mpoonya ndakamubuzya kuti: “Ino zisamu zyamaolifa zyobilo eezyi, cimwi kululyo lwacibikkilo calambe acimbi kulumwensyi lwancico zyaamba nzi?”+
12 Alimwi ndakamubuzya ciindi cabili kuti: “Ino yaamba nzi mitabi yobilo yazisamu zyamaolifa, eeyo iitila mafwuta aangolida kwiinda mumipaipi yobilo yangolida?”
13 Aboobo wakandibuzya kuti: “Sena tozyi ncozyaamba zintu eezyi?”
Ndakavwiila kuti: “Inzya tandizyi pe, omwami wangu.”
14 Wakati: “Aaba mbananike bobilo ibaimvwi kumbali aa Mwami wanyika yoonse.”+
Bupanduluzi buyungizyidwe
^ Naa “cibanda.”