Zekariya 5:1-11
5 Mpoonya ndakawaala meso alimwi akubona bbuku lyakuvwunga kalyuuluka.
2 Aboobo wakandibuzya kuti: “Ino ncinzi ncobwene?”
Ndakavwiila kuti: “Ndibwene bbuku lyakuvwunga lyuuluka, ililampa tukokola* tuli 20 mubulamfwu alimwi atukokola tuli 10 mubwamba.”
3 Kumane wakandaambila kuti: “Ooku nkusinganya ikuyaabweenda atala aanyika yoonse, nkaambo kweelana amajwi aalembedwe kubbazu lyandilyo limwi, muntu woonse uubba+ kunyina naasubulwa pe; alimwi kweelana amajwi aalembedwe kubbazu lyandilyo limbi, muntu woonse uukonka cakubeja,+ kunyina naasubulwa pe.
4 ‘Ndime ndalituma,’ mbwaamba Jehova wamakamu, ‘aboobo liyoonjila muŋanda yamubbi amuŋanda yayooyo uukonka cakubeja muzina lyangu; eelyo liyookkala muŋanda yakwe akwiinyonyoona yoonse, antoomwe amapulanga aanjiyo alimwi amabwe aanjiyo oonse.’”
5 Mpoonya mungelo ooyo iwakali kwaambaula andime wakaboola akundaambila kuti: “Kowaala meso aako, ubone naa ncinzi eeciya iciyaabweenda.”
6 Aboobo ndakabuzya kuti: “Ino ncinzi?”
Wakavwiila kuti: “Eeci iciyaabweenda, mungomo uukkwana efa.”* Alimwi wakaamba kuti: “Oobu mbobubede bukkale bwabo munyika yoonse.”
7 Mpoonya ndakabona kuti civwunisyo camubalo caloto cakavwununwa, kumane mukati mwakali mukaintu wakakkede mumungomo ooyo.
8 Aboobo wakati: “Oobu Mbubi.” Kumane wakamutonkela mumungomo waefa oomo mwaakabede, mpoonya wakausinka mungomo ooyo acivwunisyo eeco caloto.
9 Mpoonya ndakawaala meso akubona bamakaintu bobilo kababoola, akubabama mumuwo. Bakajisi mababa aali mbuli mababa aatongola. Kumane bakanyamuna mungomo ooyo mujulu, mumulengalenga.
10 Aboobo ndakabuzya mungelo ooyo iwakali kwaambaula andime kuti: “Ino mungomo ooyu uukkwana efa bautola kuli?”
11 Wakavwiila kuti: “Bautola kucisi ca Sinara+ kuyoomuyakila ŋanda; mpoonya ŋanda eeyo yaakumana kubambwa, uyootulwa ooko mubusena bumweelede.”
Bupanduluzi buyungizyidwe
^ Kakokola komwe kakaleelene amasentimita aali 44.5. Amubone Makani Aayungizyidwe B14.
^ Mu Chihebrayo, “efa” yaambwa waawa ncigumbuli naa mutaanga wakupimina efa. Efa yakaleelene amalita aali 22. Amubone Makani Aayungizyidwe B14.
