Zekariya 6:1-15
6 Mpoonya ndakawaala meso alimwi akubona nkalaki zyone kaziboola kuzwa akati kamalundu obilo, alimwi malundu aayo akali aamukuba.
2 Inkalaki yakusaanguna yakajisi mabbiza aasalala pyu, mpoonya nkalaki yabili yakajisi mabbiza aasiya.+
3 Inkalaki yatatu yakajisi mabbiza aatuba, mpoonya nkalaki yane yakajisi mabbiza aajisi tudombwi-dombwi alimwi amabala-mabala.+
4 Eelyo ndakabuzya mungelo ooyo iwakali kwaambaula andime kuti: “Omwami wangu, ino nzinzi eezyi?”
5 Mungelo ooyo wakandivwiila kuti: “Eeyi njemyuuya yone+ yakujulu iitiiunke niyamana kwiima kumbele lya Mwami wanyika yoonse.+
6 Inkalaki iijisi mabbiza aasiya yuunka kucisi cakunyika;+ mabbiza aatuba aunka mutala lyalwizi; mpoonya mabbiza aajisi tudombwi-dombwi aunka kucisi cakumusanza.
7 Imabbiza aajisi mabala-mabala akaliyandide kuyabweendeenda munyika.” Mpoonya wakati: “Kamuya, mukeendeende munyika.” Aboobo akatalika kweendeenda munyika.
8 Mpoonya wakoompolola kulindime akwaamba kuti: “Bona, aayo aaunka kucisi cakunyika apa kuti muuya wa Jehova ukkale mucisi cakunyika.”
9 Ijwi lya Jehova lyakandisikila alimwi, kaliti:
10 “Kuli Heledai, Tobija alimwi a Jedaya weelede kubweza zintu nzyobakaleta kuzwa kubantu bali mubuzike; mpoonya mubuzuba oobo yebo ukaunke kuŋanda ya Josiya mwana wa Zefaniya koli antoomwe abantu aaba ibakaboola kuzwa ku Babuloni.
11 Weelede kubweza nsiliva angolida mpoonya ukapange musini akuubikka amutwe wa Joshua+ imwana wa Jehozadaki imupaizi mupati.
12 Mpoonya ukamwaambile kuti,“‘Mboobu mbwaamba Jehova wamakamu: “Ooyu ngomuntu uujisi zina lyakuti Cisyuukila.+ Uyoosyuuka mubusena bwakwe, alimwi uyooyaka tempele lya Jehova.+
13 Walo nguuyooyaka tempele lya Jehova, alimwi nguuyoopegwa bulemu. Uyookkala acuuno cakwe cabwami akweendelezya, alimwi uyooba mupaizi acuuno cakwe cabwami,+ eelyo zyuuno eezyi zyobilo* zinoobelekela antoomwe muluumuno.
14 Lino musini ooyo uyooba ciibalusyo* kuli Helemu, Tobija, Jedaya+ alimwi a Heni imwana wa Zefaniya, mutempele lya Jehova.
15 Abalo aabo ibali kulamfwu bayakuboola kuzootola lubazu mukuyaka tempele lya Jehova.” Eelyo muyoozyiba kuti Jehova wamakamu nguwandituma kulindinywe. Lino eeci ciyoocitika ikuti naa mukaliswiilile ijwi lya Jehova Leza wanu.’”
