KUPONA BUUMI BWA BUNAKRISTO
Kuyungizya Luzyibo Lwesu Mumulimo Wakukambauka—Kugwasya Baabo ‘Ibali Amyoyo Mibotu’ Kuti Babe Basikwiiya
IKAAMBO NCOCIYANDIKA: Jehova nguupa kuti mbuto yakasimpe ikomene mumyoyo yabaabo ‘ibali amyoyo mibotu ibalibambilide kutambula buumi butamani.’ (Mil. 13:48; 1Kor. 3:7) Tubelekela antoomwe anguwe kwiinda mukubeleka canguzu kukambaukila baabo ibayanda kutobela zintu nzyobaiya. (1Kor. 9:26) Bantu mbotwiiya limwi Bbaibbele beelede kuzyiba kuti lubbapatizyo lwa Bunakristo lupa kuti cikonzyeke kufwutulwa. (1Pet. 3:21) Tweelede kubagwasya kuba basikwiiya kwiinda mukubakulwaizya kucinca buumi bwabo, akubayiisya mbobakonzya kukambauka alimwi akuyiisya, akuti baabe buumi bwabo kuli Jehova.—Mt. 28:19, 20.
MBOTUKONZYA KUCITA OOBO:
-
Amubayeezye bantu mbomwiiya limwi Bbaibbele kuti makanze aakwiiya ngakubagwasya kuti ‘bamuzyibe’ Jehova alimwi akumukkomanisya.—Joh. 17:3
-
Amubagwasye kuti bayaambele kumuuya kwiinda mukweeleba zilebyo zimwi, mbuli zilengwa zibyaabi alimwi abalongwe babi
-
Amubayumye-yumye alimwi akubakulwaizya kabatanabbapatizyigwa alimwi aciindi nobamana kubbapatizyigwa.—Mil. 14:22
AMWEEBELELE KAVIDIYO KAKUTI JEHOVA LEZA UYOOMUGWASYA, MPOONYA MWIINGULE MIBUZYO IITOBELA:
-
Ino ncinzi cikonzya kupa kuti muntu awayewaye kubweza ntaamu yakulyaaba akubbapatizyigwa?
-
Mbuti baalu mbobakonzya kugwasya basikwiiya Bbaibbele kuyaambele kumuuya?
-
Ino lugwalo lwa Isaya 41:10 lutuyiisya nzi kujatikizya Jehova?
-
Ino mbube nzi bukonzya kutugwasya kuti tumubelekele Jehova munzila iitambulika kulinguwe, nokuba kuti tatulondokede?