Kuzwa mu 2018, mamagazini eesu aakubuleya, aimwi yalikubandika mutwe wamakani omwe buyo. Oonse mamagazini aaya ncibeela ca Zibelesyo Nzyotubelesya Kapati Mukuyiisya. Aboobo tweelede kwaabelesya mubukambausi. Kuyungizya waawo, inga twaanyamunizya ciindi notuli mulweendo naa notuunka kuula zintu. Mamagazini aaya tatwaabelesyi kuyiisya bantu Bbaibbele, pele alakonzya kupa kuti muntu abe aaluyandisisyo lwakwiiya zinji kujatikizya Leza.

Nomwamana kutalisya mubandi, amubale lugwalo akwaamba kaambo kali mumagazini ikakonzya kumukkomanisya muntu. Mucikozyanyo, ikuti kajisi mukwasyi naa kali mubuumba naa kakopene mumizeezo, mulakonzya kwaamba kuti: “Caino-ino ndakabala cibalo cikkomanisya kujatikizya kaambo aako. Sena inga ndamutondezya?” Ikuti watondezya luyandisisyo, mulakonzya kumwaabila magazini iipulintidwe naa kumutumina iili aintaneti, nokuba kuti muulweendo lwakusaanguna. Masimpe kuti ikwaabila mamagazini taili mbaakani yesu yakusaanguna, pele mamagazini alakonzya kutugwasya kujana baabo ibalibambilide kucita kweelana anzyobaiya.—Mil. 13:48.