Bubambe bwakugusyigwa bulaikwabilila mbungano alimwi bupa kuti basizibi ibateempwi basubulwe. (1Kor. 5:6, 11) Ciindi notutobela bubambe oobu bwa Jehova, tutondezya luyando. Nkaambo nzi ncotwaambila boobu, nokuba kuti tulizyi kuti kugusyigwa kupa kupengaana mumizeezo kuli boonse bajatikizyidwe, kubikkilizya abanamukwasyi alimwi akkomiti yalubeta?

Akaambo kakuti notutobela bubambe bwa Jehova, tutondezya kuti tulaliyanda zina lyakwe azyeelelo zyakwe zyabusalali. (1Pet. 1:14-16) Alimwi tutondezya luyando kumuntu wakagusyigwa. Nokuba kuti lulayo lulacisa, lulakonzya ‘kuzyala mucelo waluumuno abululami.’ (Heb. 12:5, 6, 11) Ikuti katuyanzana amuntu uugusyidwe naa iwakalizandula, tunyonganya bubambe bwa Jehova. Kamuyeeyede kuti, Jehova ululamika bantu bakwe “cansaizi.” (Jer. 30:11) Tupailila kuti muntu ooyo uyoopiluka kuli Taateesu siluse. Calino, tulazumanana kutobela bubambe mbwabikkide Jehova kujatikizya kugusyigwa mumbungano akucita kufwumbwa ncotukonzya kuyumya cilongwe cesu a Jehova.—Is. 1:16-18; 55:7.

AMWEEBELELE KAVIDIYO KAKUTI AMUZUMANANE KUSYOMEKA CAMOYO WOONSE, MPOONYA MWIINGULE MIBUZYO IITOBELA:

• Ino bazyali Banakristo balimvwa buti ciindi mwanaabo naamusiya Jehova?

• Mbuti bamwi mumbungano mbobakonzya kuyumya-yumya banamukwasyi basyomeka?

• Ino ncibalo nzi camu Bbaibbele citondezya mbociyandika kusyomeka kuli Jehova muciindi cakusyomeka kumukwasyi?

• Mbuti mbotukonzya kutondezya kuti tulasyomeka kuli Jehova kwiinda mbotusyomeka kumukwasyi?