Jesu wakayiisya kuti: “Mwakapegwa kakunyina kubbadelesyegwa, amupe kakunyina kubbadelesya.” (Mt. 10:8) Tulaatobela malailile aaya kwiinda mukutabbadelesya bantu akaambo kakkopi lya Bbaibbele ndyobabweza naa mabbuku eesu aamba zyamu Bbaibbele. (2Kor. 2:17) Nokuba boobo, mabbuku aaya ajisi kasimpe kayandika ikazwa mu Jwi lya Leza. Kulaba kubeleka canguzu kapati alimwi akubelesya mali manji kutegwa mabbuku aaya asimbwe akwaatola kumbungano munyika yoonse. Aboobo, tweelede kubweza buyo yaayo ngotuyanda kubelesya.

Amubelesye bupampu ciindi nomwaabila mabbuku kubantu, noliba leelyo nomuli mumasena aacitilwa bukambausi bwakubuleya. (Mt. 7:6) Muciindi cakwiile kubapa buyo basimweenda nzila mabbuku, amusolekesye kubandika ambabo kutegwa mubone naa balijisi luyandisisyo. Sena mulakonzya kwiingula kuti inzya kumubuzyo omwe akati kamibuzyo iili mukabbokesi? Ikuti naa mwajana kuti muntu tajisi luyandisisyo, inga cabota kumupa katulakiti. Nokuba boobo, ikuti walomba magazini naa bbuku limbi lili lyoonse, calukkomano tuyoomupa kkopi.—Tus. 3:27, 28.