Ciindi Jesu naakali anyika, wakakankaizya mulawo ooyu wakuti: “Lemeka bauso abanyoko.” (Kul. 20:12; Mt. 15:4) Kweelede kuti Jesu wakalaangulukide kwaamba boobo nkaambo walo kumugama “wakazumanana kubamvwida” bazyali bakwe naakacili mukubusi. (Lk. 2:51) Kali mupati, wakabikka bubambe bwakuti banyina kabalanganizyigwa.—Joh. 19:26, 27.

Aalo mazuba aano, bakubusi Banakristo ibamvwida bazyali babo alimwi akwaambaula cabulemu ambabo, batondezya kuti balabalemeka. Alimwi buya mulawo wakulemeka bazyali besu ulabeleka lyoonse. Noliba leelyo bazyali besu nobacembaala, tweelede kuzumanana kubalemeka kwiinda mukubaswiilila kutegwa tugwasyigwe abusongo bwabo. (Tus. 23:22) Alimwi tulabalemeka bazyali besu bacembeede kwiinda mukubajanina nzyobayandika kumubili alimwi akujana ciindi cakubandika ambabo nokwayandika. (1Tim. 5:8) Kufwumbwa naa tuli bana naa bapati, kuzumanana kubandika kabotu abazyali besu, nenzila iikonzya kutugwasya kubalemeka.

AMWEEBELELE KAVIDIYO KATONDEZYA ZYAKUDULOWIŊA ABBOODI KAKUTI MBUTI MBONDIKONZYA KUBANDIKA ABAZYALI BANGU? MPOONYA AKUBANDIKA MIBUZYO IITOBELA:

• Nkaambo nzi ncocikonzya kumukatazya kubandika abazyali banu?

• Mbuti mbomukonzya kubalemeka bazyali banu ciindi nomubandika ambabo?

• Nkaambo nzi ncocigwasya kubandika abazyali banu? (Tus. 15:22)