KUPONA BUUMI BWA BUNAKRISTO
Kuyungizya Luzyibo Lwesu Mumulimo Wakukambauka—Kwiibelesya Kabotu Mibuzyo
IKAAMBO NCOCIYANDIKA: Ikuti naa “mizeezo iili mumoyo wamuntu ili mbuli maanzi aali mumugoti mulamfwu,” nkokuti mibuzyo ili mbuli cipeelo cakutesya. (Tus. 20:5) Mibuzyo itugwasya kuti abalo baswiilizi besu kababandika. Bwiinguzi bupegwa akaambo kamibuzyo iyabuzyigwa kabotu, kanji-kanji bulagwasya kapati kuzyiba mbwayeeya muntu. Jesu wakali kwiibelesya kabotu mibuzyo. Ino inga twamwiiya buti?
MBOTUKONZYA KUCITA OOBO:
-
Amubuzye mibuzyo iigwasya kuzyiba mbwayeeya. Jesu wakali kubuzya mibuzyo minji kutegwa azyibe mbobakali kuyeeya basikwiiya bakwe. (Mt. 16:13-16; be 238 ¶3-5) Ino mibuzyo nzi iigwasya kuzyiba mbwayeeya muntu njomukonzya kubuzya?
-
Amubuzye mibuzyo iisololela kubwiinguzi buluzi. Kutegwa alulamike kuyeeya kwa Petro, Jesu wakabuzya mibuzyo akupa bwiinguzi bwiindene-indene ibwakusala kutegwa amugwasye Petro kukabona kaambo. (Mt. 17:24-26) Ino mibuzyo nzi iisololela kubwiinguzi buluzi njomukonzya kubelesya kutegwa mugwasye muntu kukabona kaambo?
-
Amumulumbaizye muswiilizi wanu. Jesu wakamulumbaizya mulembi ciindi ‘naakaamba cabusongo.’ (Mk. 12:34) Ino inga mwamulumbaizya buti muntu iwaingula mubuzyo?
AMWEEBELELE CIBEELA CAKUSAANGUNA CAKAVIDIYO KAKUTI AMUCITE MULIMO NGWAAKACITA JESU—KAMUYIISYA, MWAMANA MWIINGULE MIBUZYO IITOBELA:
-
Nkaambo nzi ooku ncokutali kuyiisya kubotu nokuba kuti twaambo itwaambwa tuliluzi?
-
Nkaambo nzi ncotuteelede kugolela buyo akupandulula twaambo?
AMWEEBELELE CIBEELA CABILI CAKAVIDIYO, MWAMANA MWIINGULE MIBUZYO IITOBELA:
-
Ino mukwesu waibelesya buti mibuzyo?
-
Ino nimbazu nzi zimbi zyakuyiisya nzyotukonzya kwiiya kulinguwe?