Amweezeezye kuti mukkala ku Galilaya mumazuba aa Jesu. Kumane mwaunka ku Jerusalemu kuyoosekelela Pobwe lya Zivwuka. Mpoonya mwajana dolopo lizwide bakombinyoko ibaboola kuswaya ibazwa mumasena aakule. Lino muyanda kuyootuula cipaizyo kuli Jehova. Aboobo kamujisi ampongo yanu, mwatalika lweendo lwanu mukazila kamudolopo ikazwide bantu ikatozya kutempele. Ciindi nomwasika, mwajana kuti tempele lizwide bantu ibayanda kutuula zipaizyo. Mpoonya casika ciindi cakuti mubape bapaizi mpongo yanu. Aciindi ncomunya eeco mwazikuyeeya munyoko, walo ambweni uuli munkamu yabantu naa mudolopo, uulaakaambo andinywe. Jesu wapandulula ncomweelede kucita. (Amubale Matayo 5:24.) Ino mbuti nywebo alimwi amunyoko uulaakaambo andinywe mbomukonzya kubamba luumuno kweelana a Jesu mbwaalailila? Mumulongo umwi aumwi uuli ansi aawa, amukkwenyune bwiinguzi buluzi.

MWEELEDE . . .

• kubandika amunyoko lilikke buyo kuti kuli kaambo kalimvwisya ikapa kuti anyeme

• kusoleka kululamika mbwayeeya munyoko ikuti mwabona kuti ulafwambaana kunyema naa kuti awalo kuli bulubizi mbwaakacita kupenzi liliko

• kuswiililisya cakukkazika moyo ciindi munyoko namwaambila kujatikizya mbwalimvwa, nokuba kuti inga tiimwakamvwisya kaambo, amulilekelele kuzwa ansi aamoyo akaambo kambwalimvwa naa akaambo kakulubizya nkomwakacita cakutazyiba

MUNYOKO WEELEDE . . .

• kulomba kugwasyigwa kuli bamwi mumbungano kwiinda mukubazyibya ncomwakamulubizyila

• kumunyemena akuyubununa makani oonse kujatikizya kulubizya kwanu alimwi uyanda kuti mukuzumine kulubizya kwanu

• kukubona kulicesya alimwi abusicamba mbomwakatondezya kutegwa mumusikile akumulekelela kuzwa ansi aamoyo

Nokuba kuti mazuba aano bukombi bwesu tabubikkilizyi kutuula banyama, ino Jesu wakaayiisya kuti kuba aluumuno amukwesu kuswaangene buti abukombi mbwakkomanina Leza?