Ino mapenzi nzi ngomulwana abuzuba? Sena muli silutwe wamukwasyi uulanganya mikuli minji? Sena muli muzyali uuli alikke uubeleka canguzu kujanina mukwasyi ziyandika? Sena muli sicikolo uutundululwa abasicikolonyina? Sena mulaciswa-ciswa naa mujisi mapenzi aaboola akaambo kakucembaala? Toonse buyo tulijisi mapenzi. Bunji bwa Banakristo balwana mapenzi manji aciindi comwe. Nokuba boobo tulizyi kuti ino-ino tuyakwaanguluka kumapenzi aaya.—2Kor. 4:16-18.

Kusikila ciindi eeco, tulaumbulizyigwa akaambo kakuzyiba kuti Jehova ulaamvwisya mapenzi eesu, ulalumba kukusyomeka akuliyumya kwesu alimwi watubambila zilongezyo zibotu zinji. (Jer. 29:11, 12) Awalo Jesu kumugama ulatuyanda kapati. Ciindi notuzuzikizya mikuli yesu ya Bunakristo tusyomezyegwa boobu: “Ndilaandinywe.” (Mt. 28:20) Notuzinzibala kuyeeya kujatikizya lwaanguluko lwakumbele ansi aabweendelezi bwa Bwami bwa Leza, tuyumya bulangizi bwesu alimwi amakanze eesu aakuzumanana kuliyumya kumapenzi.—Rom. 8:19-21.

AMWEEBELELE KAVIDIYO KAKUTI GUWO NOLIYAABUSWENA, AMUGAMIKE MESO AANU KULI JESU!​—ZILONGEZYO ZYA BWAMI ZYAKUMBELE, MPOONYA MWIINGULE MIBUZYO IITOBELA:

• Ino mbuti bantu mbobakalizandula kuli Leza, alimwi ncinzi cakatobela?

• Ino nzintu nzi nzyobalangila aabo basyomeka kuli Jehova?

• Ino bulangizi oobu bubotu bwakumbele buyookonzyeka buti?

• Ino nzilongezyo nzi nzyomulangila munyika mpya?