Tupona munyika iitupa kubona bubotu kuti mbubi akuti bubi, mbubotu. (Is. 5:20) Cuusisya ncakuti, bantu bamwi balacita zintu nzyasulaika Jehova, kubikkilizya akutalilemeka kwabantu bajisi zizo zikozyenye. Bana besu balakonzya kuyungwa abeenzinyina kucikolo kucita zintu nzyobacita balo. Mbuti mbomukonzya kubagwasya bana banu kulibambila masunko aali boobu aamwi?

Amubayiisye bana banu zyeelelo zya Jehova. (Lev. 18:3) Amubaambile kweelana aciimo cabo ncolyaamba Bbaibbele kujatikizya koonana. (Dt. 6:7) Amulibuzye kuti: ‘Sena ndakabayiisya bana bangu kujatikizya nzyobeelede kucita kutondezya luyando, mbociyandika kusama cabulemu, ambociyandika kuti bamwi kababalemeka? Sena bana bangu balizyi cakucita ikuti muntu umwi wabatondezya zintu zitondwa naa kuti muntu mupati wabaambila kucita cintu Jehova ncakasya?’ Ikuti baazyibila limwi makani aaya ciyoobagwasya kweeleba mapenzi manji. (Tus. 27:12; Muk. 7:12) Kwiinda mukubayiisya bana banu, muyootondezya kuti mulacibikkila maano cikono canu kuzwa kuli Jehova.—Int. 127:3.

AMWEEBELELE KAVIDIYO KAKUTI KUYAKA ŊANDA NJUMU​—AMUBAKWABILILE BANA BANU “KUZINTU ZIBI,” MPOONYA MWIINGULE MIBUZYO IITOBELA:

• Nkaambo nzi bazyali bamwi ncobawayawaya kuyiisya bana babo makani aajatikizya koonana?

• Nkaambo nzi bazyali ncobeelede kuyiisya bana babo “mululayo alwiiyo lwa Jehova”?—Ef. 6:4

• Nzintu nzi mbunga ya Jehova nzyoyapa kutegwa bazyali kabayiisya bana babo makani aajatikizya koonana?—w19.05 12, kabbokesi

• Nkaambo nzi ncomweelede kubandika abana banu mapenzi kaatanaboola?