Samuele wakazumanana kusyomeka kuli Jehova buumi bwakwe boonse. Kacili mukubusi, tanaakatobelezya bana ba Eli, Hofeni a Finehasi mumicito mibi. (1Sam. 2:22-26) Samuele wakali kuyaabukomena, alimwi Jehova wakazumanana kuba anguwe. (1Sam. 3:19) Naakakomena, wakazumanana kweenda munzila zya Jehova, nokuba kuti bana bakwe tiibakacita oobo.—1Sam. 8:1-5.

Ncinzi ncotukonzya kwiiya kucikozyanyo ca Samuele? Ikuti kamuli mwana, amube alusyomo lwakuti Jehova ulaazyi mapenzi aamulwana alimwi ulizyi mbomulimvwa. Ulakonzya kumugwasya kuba basicamba. (Is. 41:10, 13) Ikuti kamuli muzyali uujisi mwana wakazanga, kuzyiba kuti Samuele kunyina naakabasungilizya bana bakwe bapati kutobela zyeelelo zya Jehova kweelede kumuumbulizya. Samuele wakasiya zyoonse mumaanza aa Jehova, alimwi wakazumanana kusyomeka akukkomanisya Usyi wakujulu. Ambweni cikozyanyo canu cibotu ciyoomukulwaizya mwanaanu kupiluka kuli Jehova.

AMWEEBELELE KAVIDIYO KAKUTI NZYOTWIIYA KULIMBABO—SAMUELE, MPOONYA MWIINGULE MIBUZYO IITOBELA:

• Mbuti Samuele mbwaakatondezya busicamba naakali mwana?

• Mbuti Danny mbwaakatondezya busicamba?

• Muunzila nzi Samuele mbwaakaba cikozyanyo cibotu naakakomena?

• Mbuti bazyali ba Danny mbobakatondezya cikozyanyo cibotu?