Kutegwa mulonge akuunka kubusena bupya ikuyungizya mulimo wanu, muyandika lusyomo. (Heb. 11:8-10) Ikuti naa mujisi mbaakani yakuunka kubusena bubulide, amubandike abaalu. Ino zintu nzi zyacigaminina nzyomukonzya kucita kutegwa muzyibe naa inga mwaizuzikizya mbaakani eeyo alimwi akusala busena? Amubone zyakumwaya zyesu ncozyaamba kujatikizya kubelekela kubusena bubulide. Amubandike abaabo ibakazwidilila kugwasyilizya mbungano zili kubusena kumbi. (Tus. 15:22) Amupaile kuli Jehova kulomba busolozi. (Jak. 1:5) Amuzyibe zinji kujatikizya busena nkomuyeeyela kuunka, alimwi ikuti kacikonzyeka amukaakuswaye kwamazuba masyoonto kamutanasala.

AMWEEBELELE KAVIDIYO KAKUTI AMUNJILE MUMULYANGO WAKUCITA MILIMO IITONDEZYA LUSYOMO​—KUUNKA KUBUSENA BUBULIDE, MPOONYA MWIINGULE MIBUZYO IITOBELA:

• Ino ndipenzi nzi ndyaakazunda Gabriel, alimwi ncinzi cakamugwasya?