Inga twazibelesya kabotu nguzu zyesu ciindi notulibikkila mbaakani yakucita zinji mumulimo wa Jehova. (1Kor. 9:26) Mbaakani zilatugwasya kucibelesya kabotu ciindi cisyeede kaatanaboola mamanino aabweende bwazintu oobu. (Ef. 5:15, 16) Mwaka wamulimo umwi aumwi, walo uutalika mu September 1 mpoonya akumana mu August 31, ncoolwe cakulibikkila mbaakani zipya. Aboobo nomucita kukomba kwamumukwasyi, mulakonzya kubandika mbaakani nzyomuyanda kulibikkila mumwaka wamulimo mupya. Kutegwa mugwasyigwe, kabbuku kamuswaangano aaka kajisi zibalo zinji kujatikizya mbaakani ziindene-indene nzyomukonzya kulibikkila alimwi akupailila.—Jak. 1:5.

Mucikozyanyo, sena banamukwasyi boonse balakonzya kubelekela antoomwe kugwasya munamukwasyi omwe kuba mupainiya waciindi coonse? Ikuti kamudooneka naa inga mwacikonzya kunoosika amawoola aayandika, amubandike abapainiya bamwi ibali mubukkale bukozyenye abwanu. (Tus. 15:22) Ambweni, mulakonzya kutamba mupainiya akumubuzya-buzya lyakukomba kwamumukwasyi. Mpoonya akulemba mulongo uukonzya kumubelekela kabotu. Ikuti mwakalicitide kale bupainiya musyule, amulange-lange naa bukkale bwanu bulakonzya kumuzumizya kutalika alimwi.

Sena bamwi mumukwasyi wanu balakonzya kucita bupainiya bwakugwasyilizya mwezi omwe naa kwiinda waawo? Ikuti kamutajisi nguzu zinji, ambweni inga mwacita bupainiya bwakugwasyilizya kwiinda mukutola lubazu kwaciindi cisyoonto buyo mubukambausi abuzuba. Mpoonya, ikuti kamutajisi ciindi cinji cakuunka kukambauka akati kansondo akaambo kakuti mulabeleka ciindi coonse naa muli kucikolo, ambweni mulakonzya kusala mwezi uujisi buzuba bwakulyookezya naa uujisi mawikeendi osanwe. Akkalenda yanu, amulembe nomukanza kucita bupainiya bwakugwasyilizya alimwi akulemba mulongo.—Tus. 21:5.

AMWEEBELELE KAVIDIYO KAKUTI AMUBE . . . BAPAINIYA BASICAMBA, MPOONYA MWIINGULE MUBUZYO UUTOBELA:

• Mbuti Jehova mbwaakamulanganya Mucizyi Aamand? Ino eeci cituyiisya nzi?