Bazyali bamuyoowa Leza bayanda kuti bana babo bakabe babelesi ba Jehova basyomeka. Bazyali balakonzya kubagwasya bana babo kucita oobo kwiinda mukubayiisya njiisyo zyamu Bbaibbele kuzwa kubuvwanda. (Dt. 6:7; Tus. 22:6) Sena kucita boobu kuyandika kulyaaba? Inzya! Pele kuli bulumbu bupati mukucita boobo.—3Joh. 4.

Bazyali balakonzya kwiiya zinji kuzwa kuli Josefa a Mariya. Banabukwetene aaba “bakajisi cilengwa cakuunka ku Jerusalemu mwaka amwaka ku Pobwe Lyakwiindilila,” nokuba kuti kucita boobu kwakali kuyandika kubeleka canguzu alimwi kwakali kuyandika mali. (Lk. 2:41) Cakutadooneka, bakali kubikkila maano kugwasya mukwasyi wabo kuba acilongwe ciyumu a Jehova. Ncimwi buyo, bazyali mazuba aano balakonzya kusololela bana babo munzila iiluzi nobajana ciindi cakuyiisya bana babo kwiinda muzintu nzyobaamba alimwi akuba cikozyanyo cibotu.—Int. 127:3-5.

AMWEEBELELE KAVIDIYO KAKUTI BAKACIBELESYA CIINDI CILI COONSE NCOBAKAJISI, MWAMANA MWIINGULE MIBUZYO IITOBELA:

• Ino ba Jon aba Sharon Schiller bakazumanana buti kubikka zintu zya Bwami mubusena bwakusaanguna ciindi nobakali kukomezya bana babo?

• Nkaambo nzi bazyali ncobeelede kupa lulayo kweelana anzyayandika mwana umwi aumwi?

• Ino bazyali inga babagwasya buti bana babo kulibambila kulwana zintu zisunka lusyomo lwabo?

• Ino nzibelesyo nzi nzyotupegwa ambunga ya Jehova nzyomwakabelesya kale kutegwa mugwasye bana banu kuyaambele kumuuya?