Zibelesyo zilibonya mbuli mavidiyo, maccaati, zifwanikiso azimwi buyo, zilabagwasya bantu kubikkila maano kuzintu nzyobaiya akuzimvwisya alimwi akutaziluba. Mwiiyi wesu Mupati, Jehova, wakazibelesya zintu zilibonya ikuyiisya bantu ziiyo ziyandika kapati. (Matl. 15:5; Jer. 18:1-6) Awalo Jesu wakazibelesya. (Mt. 18:2-6; 22:19-21) Cimwi cazibelesyo icagwasya kapati mazuba aano, mavidiyo. Sena mulaabelesya mavidiyo ciindi nomuyiisya basikwiiya Bbaibbele?

Kwabambwa tuvidiyo tuli 10 tukonzya kutugwasya kuyiisya ziiyo zili mubroshuwa yakuti Makani Mabotu Aazwa Kuli Leza! Mutwe wakavidiyo kamwi akamwi uleendelana amubuzyo umwi akati kamibuzyo iili mumabala aasiisya iijanika mubroshuwa. Broshuwa iili awebbusaiti ya jw.org ilijisi citondezyo icituyeezya ciindi notweelede kutondezya kavidiyo kamwi akamwi. Kuyungizya waawo, tuvidiyo tumwi tujisi makani aayungizyidwe kuli yaayo aajanika mumabbuku aayindene-indene ngotubelesya kwiiya kuzwa mu Zibelesyo Nzyotubelesya Kapati Mukuyiisya.

Sena mubandika makani aamwi aamu Bbaibbele alo aalibonya mbuli kuti amukatazya sikwiiya Bbaibbele kuti aamvwisye? Naa sena sikwiiya wanu ulimukulwana penzi limwi ligaminide? Amuyandaule akati kamavidiyo aajanika awebbusaiti ya jw.org® alimwi aa JW Broadcasting® kutegwa mujane imwi iikonzya kumugwasya kapati sikwiiya. Ambweni nywebo alimwi asikwiiya wanu mulakonzya kweebelela vidiyo imwi antoomwe mpoonya akwiibandika.

Mwezi amwezi, mavidiyo mapya alabambwa. Ciindi nomwaayebelela, amuyeeye mbomukonzya kwaabelesya kuyiisya bamwi.