Jehova, “Leza uukkomene,” uyanda kuti katukkomana amulimo wakukambauka. (1Tim. 1:11) Lukkomano lwesu luyoovwula ciindi notuyungizya lukkomano mumulimo ooyu. Kubuzya mibuzyo kulakonzya kupa kuti muntu abe aluyandisisyo alimwi ninzila yakutalisya mubandi. Kunze lyaboobo, mibuzyo ipa bantu kuyeeya. (Mt. 22:41-45) Ciindi notubuzya mibuzyo mpoonya akuswiilila, munzila imwi bantu tubaambila kuti, ‘Ndilamubikkila maano.’ (Jak. 1:19) Bwiinguzi mbwapa muntu bulakonzya kutugwasya kuzyiba ncotweelede kwaamba mumubandi wesu.

AMWEEBELELE KAVIDIYO KAKUTI AMUJANE LUKKOMANO LUBOOLA AKAAMBO KAKUGWASYA BAMWI KUBA BASIKWIIYA​—AMUYUNGIZYE LUKKOMANO LWANU​—KUBUZYA MIBUZYO, MPOONYA MWIINGULE MIBUZYO IITOBELA:

• Ino mbube nzi bubotu Jade mbwaatondezya?

• Ino Neeta waibelesya buti mibuzyo kutondezya kuti ulabikkila maano?

• Ino Neeta waibelesya buti mibuzyo kutegwa ape Jade kuba aluyandisisyo kumakani mabotu?

• Ino Neeta waibelesya buti mibuzyo kutegwa agwasye Jade kuyeeya?