Mulawo wa Musa wakali kwaamba kuti, mwaalumi iwakali kuyanda kuleka mukaintu wakwe wakeelede kulemba lugwalo lwakumuleka. Eeci cakali kugwasya bantu kuti kabatabindi kubweza ntaamu eeyo. Nokuba boobo, mumazuba aa Jesu, basololi bazikombelo bakali kwaaubya-ubya makani aakulekana. Bamalumi bakali kuleka bamakaintu babo kakunyina atwaambo tuyakoomoonga. (“lugwalo lwakumutanda” kaambo kagwasya mukwiiya kuzwa kulugwalo lwa Mk. 10:4, nwtsty; “uuleka mukaintu wakwe,” “wacita bumambe alimwi wabisizya mukaintu wakwe mutaanzi” twaambo tugwasya mukwiiya kuzwa kulugwalo lwa Mk. 10:11, nwtsty) Jesu wakatondezya kuti cikwati cakazumizyigwa a Jehova alimwi ngowakacitalisya. (Mk. 10:2-12) Mulumi amukaintu bakali kunooba “mubili omwe” kakunyina kulekana. Cintu cilikke buyo cikonzya kupa kuti bantu balekane kweelana acibalo cikozyenye ancaakalemba Matayo, ‘mbumambe.’—Mt. 19:9.

Mazuba aano, bantu banji cikwati bacibona mbuli ba Farisi mbobakali kucibona, pele kutali kweelana a Jesu mbwaakali kucibona. Ciindi nokwaba mapenzi, bantu ibali munyika bazuzila kulekana. Kulubazu lumwi, Banakristo banabukwetene balacilemeka cikonke cabo alimwi balasolekesya kwaalwana mapenzi kwiinda mukutobela njiisyo zyamu Bbaibbele. Mwamana kweebelela kavidiyo kakuti, Luyando Alimwi Akulemekana Zipa Kuti Mukwasyi Ukamantane, mpoonya mwiingule mibuzyo iitobela:

• Ino inga mwalubelesya buti lugwalo lwa Tusimpi 15:1 mucikwati canu, alimwi nkaambo nzi eeci ncociyandika kapati?

• Ino mbuti mbomukonzya kwaatantamuka mapenzi kwiinda mukutobela lugwalo lwa Tusimpi 19:11?

• Ikuti cikwati canu ciyanda kumana, muciindi cakuyeeya kuti, ‘Naa tulekane buyo?’ ino mibuzyo nzi njomweelede kulanga-langa?

• Mbuti mbomukonzya kuba mulumi naa mukaintu uuli kabotu kwiinda mukutobela lugwalo lwa Matayo 7:12?