Kutegwa bamukkomanisye Leza, basikwiiya Bbaibbele beelede kuba alusyomo luyumu. (Heb. 11:6) Tulakonzya kubagwasya kucita oobo, kwiinda mukubelesya bbuku lyakuti Amupone Kukabe Kutamani!. Bbuku eeli lyakwiiya lijisi magwalo aayandika, bupanduluzi busalede, mibuzyo mibotu, mavidiyo aakulwaizya alimwi azifwanikiso zibotu. Tulakonzya kubagwasya basikwiiya besu kuba abube bwa Bunakristo alimwi acilongwe a Leza, kwiinda mukubelesya zibelesyo zitapyi mulilo.—1Kor. 3:12-15.

Bantu bamwi balimvwa kuti tacikonzyeki kuba acilongwe a Leza, walo ngobataboni. Aboobo, tweelede kubagwasya kumuzyiba Jehova alimwi akuba alusyomo mulinguwe.

AMWEEBELELE KAVIDIYO KAKUTI AMUYUMYE LUSYOMO MULI JEHOVA, KWIINDA MUKUBELESYA BBUKU LYAKUTI “AMUPONE KUKABE KUTAMANI!” MPOONYA MWIINGULE MIBUZYO IITOBELA:

• Ino tuzyi buti kuti mucizyi wakalibambila kabotu ciiyo?

• Ino waibelesya buti mibuzyo kutegwa agwasye sikwiiya kwaamba mbwayeeya alimwi ambwalimvwa kujatikizya lugwalo lwa Isaya 41:10, 13?

• Ino kavidiyo alimwi atupango twamu Bbaibbele zyamugwasya buti sikwiiya?

Bantu banji tabaamvwisyi makani aacinunuzyo alimwi tabaciboni kuti ncipego ncaakabapa Leza. (Gal. 2:20) Aboobo, tweelede kubagwasya kuba alusyomo mucinunuzyo cacipaizyo ca Jesu.

AMWEEBELELE KAVIDIYO KAKUTI AMUYUMYE LUSYOMO MULI JESU, KWIINDA MUKUBELESYA BBUKU LYAKUTI “AMUPONE KUKABE KUTAMANI!” MPOONYA MWIINGULE MIBUZYO IITOBELA:

• Ino tuzyi buti kuti mukwesu wakalibambila kabotu ciiyo?

• Ino waabelesya buti makani aali mucibeela cakuti “Amuzyibe Zinji” kugwasya sikwiiya?

• Nkaambo nzi mupailo ncouyandika kuli sikwiiya?