Bbuku lya Bbaibbele Ncolituyiisya alya Bbaibbele Ncoliyiisya alikozyenye. Mabbuku aaya obilo aabelesyegwa kuyiisya Bbaibbele woonse ayiisya kasimpe kakozyenye akwaamba twaambo mbubwenya mbotulembedwe mucibalo cini. Pele bbuku lya Bbaibbele Ncolituyiisya libelesya mabala mauba-uba. Lyakabambilwa baabo bakatazyigwa kumvwa zili mubbuku lya Bbaibbele Ncoliyiisya. Muciindi cakuba amakani aayungizyidwe, bbuku lya Bbaibbele Ncolituyiisya lijisi cibeela cakuti bupanduluzi buyungizyidwe imujanika mabala aapandulwidwe munzila nguba-uba aazwa mucibalo cini. Zibalo tazijisi mibuzyo yantalisyo naa kabbokesi kakwiinduluka. Muciindi caboobo, kumamanino aacibalo kuli twaambo twamasimpe tuzwa mu Bbaibbele itupanduludwe mucibalo cini. Mbubwenya mbuli bbuku lya Bbaibbele Ncoliyiisya, bbuku lya Bbaibbele Ncolituyiisya lilakonzya kwaabilwa kufwumbwa ciindi, nokuba kuti talili ndilyo lyaabilwa mumwezi ooyo. Ino inga twazibelesya buti zibeela zipya izili mubbuku lya Bbaibbele Ncolituyiisya notusololela ciiyo ca Bbaibbele?

MUBUFWAAFWI: Bantu banji balagwasyigwa anzila njotwali kubelesya lyoonse yakubala mincali mubbuku lya Bbaibbele Ncolituyiisya akubuzya mibuzyo. Pele amweezyeezye kuti sikwiiya tauzyi kabotu mwaambo naa tacizyi kabotu kubala. Mubukkale buli boobu, inga mwabelesya bbuku lya Ncolituyiisya. Mpoonya mulakonzya kubelesya makani mubufwaafwi kusololela ciiyo akukulwaizya sikwiiya kubala cibalo cini alikke. Kaambo kamasimpe akamwi kalakonzya kubandikwa mumaminiti aali 15. Mbwaanga makani mubufwaafwi taabikkilizyi twaambo tunji tujanika mucibalo cini, sikuyiisya weelede kulibambila kabotu, kayeeyede nzyayandika sikwiiya. Ikuti sikuyiisya kabelesya cibalo cini kusololela cini, makani mubufwaafwi alakonzya kuba makani aakwiinduluka.

BUPANDULUZI BUYUNGIZYIDWE: Mabala alimwi atwaambo tuli mubupanduluzi buyungizyidwe zilembedwe mumulongo-longo kweelana ambozibede mucibalo cini. Sikuyiisya inga wasala kubandika bupanduluzi buyungizyidwe mubbuku lya Ncolituyiisya ciindi nobaiya mucibalo cini.