IKAAMBO NCOCIYANDIKA: Kukambauka kwiinda mukubelesya fooni ninzila iiyandika kapati yakupa “bumboni cakulomya kujatikizya makani mabotu.” (Mil. 20:24)* Ilatugwasya kukambaukila muntu umwi ciindi bukkale nobutazumizyi kumuswaya.

MBOTUKONZYA KUCITA OOBO:

• Amulibambile. Amusale makani aayelela. Mpoonya amulembe autulaini yatwaambo ntomuyanda kwaamba. Alimwi mulakonzya kulemba majwi masyoonto aapandulula kaambo ncomwatumina fooni kutegwa naa kwaingula kancini mulakonzya kwaamba majwi aayo. Cilagwasya kukkala afwaafwi atebulu kamujisi autulaini yanu alimwi azibelesyo zimbi nzyomunga mwayandika, mbuli fooni naa tabbuleti izikonzya kujula JW Library^® naa jw.org^®

• Amulikwaye. Amukanane mbuli mbomukanana lyoonse. Amumwete-mwete akutambaika mbuli kuti mulimubwene ngomubandika limwi. Mutani kwiimi-imi muteelede ciindi nomukanana. Cilagwasya kapati kubeleka abamwi. Ikuti mukamwiniŋanda wabuzya mubuzyo, amuwiinduluke cakupozya kutegwa ngomubeleka limwi amugwasye kujana bwiinguzi

• Amusiye ntalisyo yalweendo lwakupilukila. Ikuti muntu watondezya luyandisisyo, mulakonzya kusiya mubuzyo ngomuyakwiingula mwaakutuma ciindi ciboola. Alimwi mulakonzya kumwaambila kuti, ikuti kayanda inga mwamutumina e-mail, kumutolela cacigaminina naa kumutumina cakumwaya cigaminide. Naa mulakonzya kumwaambila kuti inga mwamutumina imwi akati kamavidiyo eesu naa zibalo. Kuti kaceelela, amumwaambile kujatikizya makani aambi buyo aajanika a webbusaiti yesu