Miswaangano yakulibambila kuunka mumulimo, mbuli miswaangano yoonse yambungano, mbubambe buzwa kuli Jehova butupa kuti katucikonzya kukulwaizyanya umwi amweenzinyina alimwi akucitilana milimo mibotu. (Heb. 10:24, 25) Yeelede kucitwa mumaminiti osanwe naa aali ciloba, calo cibikkilizya akwaaba mbobatiibeleke bantu, kubaabila cilawo alimwi akupaila. (Ikuti yacitwa nowamana muswaangano uumbi, yeelede kufwiinsyigwa.) Sikusololela weelede kulibambila cintu cimwi cikonzya kubagwasya aabo ibayootola lubazu mubukambausi buzuba oobo. Mucikozyanyo, mu Mujibelo nokuli bantu banji ibatakakambauka kuzwa nsondo yainda, inga cabota ikwiile kwaamba buyo ncobakonzya kwaamba kutalisya mubandi. Ino makani nzi aambi aakonzya kubandikwa?

• Mubandi wacitondezyo kuzwa mu Kabbuku Kamuswaangano Wabuumi Amulimo Wesu wa Bunakristo

• Mbomukonzya kubelesya makani aakacitika caino-ino naa aakaambwa anyuuzi kutalisya mubandi

• Mbomukonzya kubandika amuntu uusola kusinkila mubandi

• Mbomukonzya kubandika amuntu uutasyomi muli Leza, muntu waambaula mwaambo uumbi, naa muntu uuli mucikombelo citazyibidwe mucilawo canu

• Mbomukonzya kubelesya cibeela cimwi cawebbusaiti yesu ya jw.org, aapu ya JW Library^®, naa Bbaibbele

• Mbomukonzya kubelesya cibelesyo cimwi kuzwa mu Zibelesyo Nzyotubelesya Kapati Mukuyiisya

• Mbomukonzya kukambauka kubelesya nzila imwi iigaminide mbuli, bukambausi bwaafooni, kulemba magwalo, bukambausi bwakubuleya, kucita nyendo zyakupilukila, naa kusololela ziiyo zya Bbaibbele

• Ziyeekezyo kujatikizya kulikwabilila, kunyoneka, kulilemeka, kuzilanga kabotu zintu, naa cimwi cikozyenye azyeezyi

• Ciiyo naa kavidiyo kajatikizya broshuwa ya Amusungwaale Mukubala Alimwi Akuyiisya

• Mbomukonzya kumukulwaizya akumugwasya ngomubeleka limwi mubukambausi

• Lugwalo lweendelana amulimo wakukambauka naa cakuluula camumuunda cikulwaizya