BA GULIZAR bakaamba kuti: “Kanji-kanji ndilamwaambila Jehova mumupailo mbondikkomene akaambo kakuti ndakamvwa kujatikizya nguwe mumwaambo wangu.”

Ba Gulizar bakali kuyanzana a Bakamboni ba Jehova kabali basikumwaya batabbapatizyidwe kwamyaka iili lusele pele bakabbapatizyigwa nobakatalika kujanika kumiswaangano iyakali kucitwa mumwaambo wabo waci Kurdish. Bali akati kaba Kurdish banji mucisi ca Georgia ibakatambula kasimpe mumyaka misyoonto yainda. Pele ino ba Kurdish mbaani?

 Ba Kurdish bali kukkala ku Middle East kwamyaanda yamyaka minji. Basyaazibwene bamwi bayeeya kuti nduzubo lwabana Medi ibaambwa mu Bbaibbele. (2Bam. 18:11; Mil. 2:9) Mwaambo ngobakanana ulikozyenye amyaambo iikananwa mucisi ca Iran.

Mazuba aano, mamiliyoni aaba Kurdish bakkala muzisi ziindene-indene, kubikkilizya acisi ca Armenia, Iran, Iraq, Syria, alimwi aca Turkey. Kuli ba Kurdish babalilwa ku 20,000 mucisi ca Georgia. Bunji bwabo mbantu bayoowa Leza alimwi balazilemeka kapati zintu zyakumuuya.

Lino kuli basikumwaya baambaula mwaambo waci Kurdish ibali 500 mucisi ca Georgia, alimwi ambungano zyotatwe zibelesya mwaambo waci Kurdish. Mu 2014, boonse bakakkomana nobakaba amuswaangano wacooko wakusaanguna mumwaambo waci Kurdish iwakacitwa mu Tbilisi, alimwi bakatambula beenzu kuzwa kucisi ca Armenia, Germany, Turkey, alimwi aca Ukraine.