Nyika Cisi ca Georgia cilizyibidwe akaambo kamalundu mapati ngocijisi, aajisi caanda, alimwi amwi malamfwu kwiinda amamita aali 4,500. Cisi eeci cilaandaanizyidwe muzibeela zipati-pati zyobilo—kuli cibeela cakujwe alimwi akumbo, cibeela cimwi acimwi cilijisi zyooko zili mbozibede ziindi zyamwaka, zilengwa, nyimbo, zizyano, alimwi azyakulya.

Bantu Cisi eeci cilijsi bantu basika ku 3.7 miliyoni. Bantu batandila ku 20 pesenti tiibakazyalilwa mucisi ca Georgia.

Bukombi Bunji bwabantu bakkala mucisi eeci mbacikombelo ca Orthodox. Mpoonya ibabalilwa ku 10 pesenti mba Mozilemu.

Mwaambo Mwaambo waci Georgian taukozyani amyaambo iili yoonse yamuzisi zyeengelede. Makani aakaindi atondezya kuti alufabbeti iilibedelede yaci Georgian yakatalisyigwa kautanatalika mwaanda wamyaka wakusaanguna.

 Bukkale Bunji bwabantu mucisi eeci basyoma bulimi kutegwa bajane nzyobayandika mubuumi. Caino-ino, kulanganya basikuswaya masena (tourism) caba cibeela cagwasyilizya kapati mubuvwubi bwacisi ca Georgia.

Ziindi Zyamwaka Cibeela cakujwe cacisi eeci cilijisi ziindi zyamwaka zili kabotu. Inkomwe yalwizi lutegwa Black Sea, iili mucibeela cakumbo mucisi ca Georgia ijisi ziindi zyamwaka mwalo micelo mbuli malemoni, mafuleenke, naa misaansa mwiikomena kabotu kapati.

 Cakulya Kanji-kanji cinkwa cilajanika ciindi nobalya cakulya cili coonse bantu baku Georgia. Cinkwa cabo bacipangila muoveni yakulipangila abulongo. Cakulya cini ncobasyoma inga musinza mulemu-lemu uubikkidwe tununkilizyo alimwi amatewo matete. Kupanga waini ncintu cakatalika kaindi. Kweelana acilengwa cabo, waini ulasasikwa akuyobolwa munongo zipati. Mikwasyi minji ilalilimina misaansa alimwi akulipangila waini. Cisi ca Georgia mbusena bujanika misyobo yamisaansa iindene-indene yamucisi eeci iibalilwa ku 500.