CISI ca Georgia cakalilela mu 1991, imwaka bweendelezi bwa Soviet Union nobwakamana. Pele kucinca mutwaambo twacisi alimwi amanyongwe aamucisi kwakapa kuti kube kucinca kwabukkale mukaindi kasyoonto buyo. Ba Genadi Gudadze, ibakali kubeleka kabali balangizi babbazu mumyaka eeyo, balayeeya kuti bantu bakali kwiima mumulaini kwaciindi cilamfwu kutegwa baule cinkwa.

Aciindi eeci, Bakamboni kanji-kanji bakali kubandika mulumbe wamu Bbaibbele atubunga twabantu ibakali kulindilila kuula cinkwa mumulaini. Ba Genadi bakaamba kuti: “Mumyaka eeyi iyakali kukatazya kapati, cakali kulibonya kuti bantu boonse bakali kukabikkila maano kasimpe. Twakatambula myaanda-myaanda yatupepa itwakajisi makkeyala aabaabo ibakali kuyanda kwiiya Bbaibbele.”

 Kumamanino aamuswaangano umwi aumwi, ibakwesu basalidwe bakali kubala mulongo wamazina alimwi amakkeyala aabantu ibakalomba kuswaigwa. Mpoonya basikumwaya bakali kulyaaba kutegwa bakabaswaye mumaanda aabo.

Mukwesu Levani Sabashvili, iwakali kubeleka kali mwaalu mu Tbilisi, ulayeeya kujatikizya banabukwetene bamwi ibakalombede kuswaigwa. Wakaamba kuti: “Makkeyala woonse akabwezyegwa abasikumwaya, pele kunyina sikumwaya iwakalyaaba kuyooswaya banabukwetene aaba. Bakali kukkala kulamfwu kapati, alimwi bunji bwesu twakalijisi kale ziiyo zya Bbaibbele izili mbozibede.”

Nokwakainda buyo myezi misyoonto, banabukwetene aaba mbamunya bakatuma alimwi kagwalo kakulomba kuswaigwa. Mukuya kwaciindi alimwi bakatuma ciindi catatu, pele aciindi eeci bakabikkilizya akagwalo ikakali kukombelezya Bakamboni kuti batabi aamulandu wabulowa. (Milimo 20:26, 27) Ba Levani bakaamba kuti: “Cakali ciindi cakumatalikilo aa Mwaka Mupya, alimwi kanji-kanji tiitwakali kuswaya bantu aciindi eeci. Pele twakalimvwa kuti lino tiitwakeelede kusumpya bubambe bwakubaswaya banabukwetene aaba.”

Banabukwetene aaba ibakajisi nyota yakumuuya ba Roini aba Nana Grigalashvili, bakakkomana kapati bumwi buzuba mafwumofwumo ciindi ba Levani amukwesu uumbi nobakasika aŋanda yabo. Mpoonya-mpoonya bakatalika kwiiya Bbaibbele. Ba Roini aba Nana lino balabeleka kabali bapainiya baciindi coonse antoomwe abana babo.

Akaambo kakuti bakalumba kapati, aabo ibakatambula kasimpe cakulitakata bakaaba ciindi cabo, nguzu, alimwi azintu zyabo kutegwa baambile bamwi makani mabotu. Nokuba kuti bakajisi mikuli yamukwasyi, ba Badri aba Marina Kopaliani, bakali akati kabaabo ibakabeleka canguzu kuunka muminzi yakali kule kuyoogwasya babombe myoyo.

Kumamanino aansondo, ba Badri aba Marina, antoomwe abana babo basankwa bakubusi, Gocha alimwi a Levani,  bakali kuunka kucooko ca Dusheti, busena bubotu bwamalundu ku Tbilisi nkoili kunyika. Zimwi ziindi bakali kweenda makkilomita aali 150 kubelesya migwagwa iizinguluka kutegwa bakasike kuminzi eeyo yakali kulamfwu.

Bumwi buzuba mukaintu umwi wakatamba ba Badri abakaintu babo kubusena nkwaakali kubelekela. Ba Badri bakaamba kuti: “Twakalijana muciluumu cipati motwakajana bantu babalilwa ku 50 kabatulindila! Kumatalikilo ndakayoowa, pele nondakamana kupaila kuli Jehova, ndakatalika kubandika tupango twamulugwalo lwa Matayo 24 kujatikizya zitondezyo zyakumazuba aamamanino. Umwi muntu iwakagambwa kapati wakabuzya kuti, ‘Nkaambo nzi bapaizi besu ncobatatwaambili zintu eezyi?’”

Ciibalusyo calufwu lwa Jesu cakabapa coolwe bana Georgia banji cakumvwa makani aajatikizya kasimpe. Mucikozyanyo, mu 1990, Ciibalusyo icakacitilwa kuŋanda yamucizyi Ia Badridze ku Tbilisi, cakapa kuti bantu banji ibakali kukkala munsi-munsi babe aaluyandisisyo.

 Mucizyi Badridze wakalyaaba kuti Ciibalusyo cicitilwe aŋanda yakwe. Kwiinda mukugwasyigwa abana bakwe, mucizyi Badridze wakagwisya zintu zyoonse izyakali muŋanda yakulyookezyela kutegwa kube busena bwakukkala bupati. Pele ino wakali kunoozijana kuli zyuuno zinji zyabeenzu? Mucisi ca Georgia, cakali cilengwa buya kumikwasyi kubbadelela matebulu azyuuno ciindi nokuli pobwe pati. Pele akaambo kakuti wakabbadelela buyo zyuuno, bamukamwini zyuuno bakali kumubuzya kuti: “Sena tamuyandi amatebulu? Ino muyoolya buti?”

Mucizyi Badridze wakacikonzya kubajanina aakukkala boonse aabo ibakasika kuzooibaluka lufwu lwa Jesu kuŋanda yakwe iyakali yanamba 13 kuya mujulu. Cikkomanisya ncakuti, bantu basika ku 200 bakajanika! Nkakaambo kaako basimukobonyina banji bakabuzya mibuzyo kujatikizya Bakamboni ba Jehova!

Mu 1992, masena mapati aakucitila miswaangano akabbadelelwa kucitila Ciibalusyo mumasena aaindene-indene aamucisi. Ba Davit Samkharadze, ibakali kukkala ku Gori, balayeeya ciindi mulangizi wabbazu naakabuzya kujatikizya bubambe bwabo bwa Ciibalusyo.

Naakamvwa kuti basikumwaya bakalibambila kuyooswaanganina muŋanda yamuntu, wakabuzya kuti: “Sena  mudolopo munyina busena bupati bwakucitila miswaangano? Sena inga tiimwasola kububbadelela kutegwa mukabubelesye?” Mbwaanga busena ibwakaliko bwakali kukonzya kunjizya bantu bainda ku 1,000, kakuli basikumwaya bakali kwiinda-inda buyo a 100—twakabona kuti tiicakali kugwasya kubbadelela busena bupati boobo.

Mpoonya mulangizi wabbazu wakapa muzeezo wakuti: “Ikuti sikumwaya umwi aumwi watamba bantu bali 10, nkokuti zyuuno zyoonse ziyoozula bantu.” Nokuba kuti kumatalikilo muzeezo wakwe wakalibonya mbuli kuti taukonzyi kubeleka, basikumwaya bakasolekesya canguzu kuutobela. Kabagambidwe alimwi akukkomana kapati, bantu bataleli ku 1,036 bakajanika ku Ciibalusyo! *

Kuzikusika mu 1992, kwakacili zyooko zinji mucisi ca Georgia kwalo bantu ba Jehova nkobatakalina kukambauka mulumbe wamu Bbaibbele. Ino zilawo eezyi zipya zyakali kunoosikilwa buti mbwaanga cakali ciindi nokwakali penzi lyakubula mali mucisi?

Ba Tamazi Biblaia, ibakali kukkala mucisi ca Georgia nkocili kumbo aciindi eeco, bakaamba kuti: “Mulangizi wabbazu wakatwiita tobasyoonto buyo kuti tubandike kujatikizya cakali kukonzya kucitwa. Kunyina makani manji ngotwakazyi kujatikizya mbobweelede kucitwa bubambe bwabapainiya baalubazu. Pele twakalizyi kuti makani mabotu ayelede kukambaukwa cakufwambaana.” (2Tim. 4:2) Aboobo, bakasala bapainiya bali 16 akubatuma mumasena aaindene-indene mucisi coonse.—Amubone maapu iibikkilizyidwe.

Mu May 1992, kwakacitwa muswaangano iwakatola mawoola otatwe ku Tbilisi kutegwa bakulwaizye bapainiya ibakasalwa kuti bakabelekele muzilawo eezyi kwamyezi yosanwe. Mwezi amwezi, baalu bakali kubaswaya kutegwa babayumye-yumye  kumuuya alimwi akubagwasyilizya zintu zyakumubili ikuti kwayandika.

Bacizyi bobilo bapainiya, ba Manea Aduashvili aba Nazy Zhvania, bakatumwa kudolopo lya Ozurgeti. Ba Manea, ibakajisi myaka iili 60 aciindi eeco, bakaamba kuti: “Twakalizyi kuti kwakali mukaintu umwi iwakajisi luyandisisyo iwakali kukkala munsi adolopo lya Ozurgeti. Aboobo, mbotwakasika buyo, twakapanga bubambe bwakuti tukamubone. Ciindi notwakasika aŋanda yamukaintu ooyu, twakajana kuti ulatulindila antoomwe abantu bamwi babalilwa ku 30 mbaakatambide. Buzuba oobu twakatalisya ziiyo zya Bbaibbele izili mbozibede.”

Myezi yakatobela ayalo yakeenda kabotu. Nokwakainda buyo myezi yosanwe, bantu bali 12 bakalilibambilide kubbapatizyigwa!

Bakwesu bobilo bapainiya, ba Pavle Abdushelishvili aba Paata Morbedadze, bakatumwa ku Tsageri. Busena oobu buli mucooko bantu banji mobasyoma tunsiyansiya twansiku antoomwe anjiisyo zya Bunakristo Bwanyika.

 Mbocakali kuyaabuswena ciindi camupeyo, myezi yosanwe yamulimo wabapainiya yakali afwaafwi kukkwana, kumane ba Paata bakaitwa kuyoogwasyilizya mulimo wakusandulula kubusena bumbi. Aboobo ba Pavle bakeelede kusala. Bakaamba kuti: “Ndakalizyi kuti kukkala mu Tsageri ciindi camupeyo cinooli ciyumu. Pele bantu mbotwakali kuyiisya Bbaibbele bakacili kuyandika lugwasyo, aboobo ndakasala kuti ndizumanane kukkala kubusena ooku.”

Ba Pavle bakaamba kuti: “Ndakali kukkala amukwasyi umwi wakubusena ooku. Bunji bwaciindi ndakali kuunka mukukambauka. Mpoonya kumangolezya ndakali kusangana mukwasyi ikuyota mulilo acitofwu cibikkwa nkuni muŋanda yakulyookezyela. Pele casika ciindi cakuti nduunke mukoona muluumu yangu, ndakali kusama cisooti cangu cikasaala mpoonya akulivwumba ngubo ndemu.”

Ciindi baalu nobakacikonzya kuyoobaswaya ba Pavle kumamanino aamupeyo, bakajana bantu bali 11 ibakeelela kuba basikumwaya batanabbapatizyigwa. Tiilyakalampa, boonse bakabbapatizyigwa.