CIINDI nondakamvwa kasimpe kamu Bbaibbele mu 1989, ndakali muntu uuzyibidwe kapati wamunkamu ya Kkomyunizimu mudolopo mondakali kukkala, mu Senaki, alimwi lyoonse ndakali kujanika mu Supreme Soviet of Georgia, yalo mazuba aano iyeelene aŋanda yamilawo. Alimwi ndakalisyabidwe kumwaalumi umwi iwakacili mwana-mwana, aboobo ndakalimvwa kuzwidilila mubuumi.

Bamaama abataata bakandigwasya kutalika kumuyanda Leza. Aboobo, ndakali kusyoma muli Leza, nokuba kuti ndakali munkamu ya Kkomyunizimu. Nondakatalika kwiiya Bbaibbele, ndakajana bwiinguzi bulimvwisya kumibuzyo yangu yoonse, aboobo ndakasala kwaaba buumi bwangu kuli Jehova. Pele bamukwasyi wangu, balongwe, alimwi amusankwa wangu tiibakakukkomanina kusala kwangu.

Akaambo kalusyomo lwangu lupya babbululu bangu bakandikaka, alimwi mulimo ngondakali kubeleka tiiwakali kweendelana  anzyondakali kwiiya. Aboobo ndakabona kuti ndakeelede kuzwa buyo aŋanda, kumana cisyabo cangu, kuleka mulimo ngondakali kubeleka alimwi akuzwa munkamu ya Kkomyunizimu amu Supreme Soviet. Nondakamana kubbapatizyigwa, balongwe bangu alimwi abacibbululu bakaindila buya kundikatazya. Akaambo kakuti ndakalizyibidwe kapati mudolopo mondakali kukkala, ndakalongela kudolopo lya Kutaisi, kwalo nkondakacikonzya kutalika bupainiya kakunyina kusowa ciindi.

Ciindi bantu nobandibuzya kuti naa buyumuyumu mbondakajana buli buyo kabotu akaambo kalusyomo lwangu, inga ndilaingula kakunyina kuwayawaya kuti ndilikkomene kapati akaambo kakusala kwangu. Nokuba kuti bazyali bangu kunyina nobakakumvwisya kusala kwangu, ndilalumba kapati kuti bakandiyiisya kutalika kuyanda Leza alimwi abasimukoboma. Eeci candigwasya kapati mubuumi.