BANTU ba Jehova mucisi ca Georgia balikubeleka canguzu kukambauka makani mabotu, alimwi Jehova waulongezya mulimo wabo. Akaambo kaceeci, makani mabotu asika mumasena manji aamucisi eeci.

Nokuba boobo, mumyaka misyoonto yainda, basikumwaya abapainiya balikubikkila maano kukambaukila mumasena aatavwuli kubelekelwa. Mumasena aamumalundu, minzi iili kulamfwu ilakonzya kusikilwa buyo amyootokala iilaanguzu naa myootokala yeendela antambo.

 Mwaka amwaka kutalikila mu 2009, mutabi wacisi ca Georgia wakatumina mbungano zyoonse mulongo wazilawo zitazulilwi kumbungano iili yoonse, akulomba basikumwaya kuti bagwasyilizye mulimo wakukambauka mumasena aaya. Kutegwa batole lubazu mumulimo ooyu, banji bakeelede kulyaaba ncobeni.

Ba Temuri aba Ana Bliadze bakazwide akukwatana ciindi nobakazyiba kuti kwakali kuyandika basikumwaya kucilawo cakumalundu citegwa Ajaria. Kwakaindide buyo ciindi cisyoonto kuzwa nobakaulide puloti kutegwa bayake ŋanda mpya. Pele lino bakajisi coolwe cakuti bayungizye mulimo wabo.

Kusaanguna bakakkala nsondo yomwe mucooko eeci ca Ajaria. Nobayeeya mbobakalimvwa ciindi eeci cakusaanguna, ba Temuri bakati: “Basikumwaya banyenzi bakali kweenda kapati kutegwa basike kutunzi tusyoonto-syoonto. Twakajisi mootokala uulaanguzu zyakutanta mumalundu, aboobo cakufwambaana twakayeeya kuti wakali kuyoogwasya kapati.”

Ba Ana bakayungizya kuti: “Kulonga tiicakali cuuba-uba pe nkaambo twakali kwiiyanda kapati mbungano yesu alimwi amukwasyi wesu. Pele twakabona kuti Jehova wakatulongezya.” Kwamyaka yotatwe, ba Temuri aba Ana balikugwasya kabunga mu Keda, idolopo ilili mucooko ca Ajaria.

Lugwasyo lwabapainiya baalubazu ibaciindi cisyoonto lwagwasya kapati mumulimo wakukambauka kuzilawo zili kule. Nocakamana ciindi ncobakaambilwa kubeleka, bapainiya banji bakasala kukkala mubusena mobakali kubelekela kutegwa bagwasye bantu mbobakatalika kwiiya Bbaibbele ambabo.

Bapainiya bobilo bacizyi, boonse ibaitwa kuti Khatuna, bakaambilidwe kuyoobelekela kukadolopo kamwi kakumunzi ikaboneka kabotu ikategwa Manglisi. Kunyina  Bakamboni ibakali kukkala nkuko, pele bacizyi aaba bobilo bakazwidilila kapati mumulimo wakukambauka. Bakasololela ziiyo zya Bbaibbele zili 9 mumwezi wakusaanguna, izili 12 mumwezi wakatobela, izili 15 mumwezi uumbi iwakatobela, mpoonya bakazikusololela ziiyo zili 18! Kutegwa bazumanane kubagwasya bantu mbobakali kuyiisya Bbaibbele, bakasala kukkala mu Manglisi.

Kutegwa kabajana mali aakubelesya, bacizyi besu bakeelede kubelesya nzila zigwasya. Bantu banji ibasika ku Manglisi balazikkomanina zintu zibotu zipangwa mubusena oobu—musamu uupa kuti zintu kazitaboli kufwambaana uupangwa kuzwa kucisamu citegwa pinecone, alimwi ciponya malwazi. Aboobo, kumatalikilo bacizyi bakali kupanga akusambala kumusika musamu uupa kuti zintu kazitaboli kufwambaana. Mpoonya bakajana nzila njobatakali kuyeeyela yakujana mali.

Bumwi buzuba muntu ngobakali kuyiisya Bbaibbele wakabaletela twana twankuku tuli mbotubede. Wakapandulula  kuti nkuku yakwe imwi yakatulide mayi mubusena busisidwe aboobo yakakonkona akuleta twana kuŋanda. Mukaintu ooyu wakayanda kuti ape bamuyiisya Bbaibbele twana twankuku nkaambo twakali tunji mucaanda cankuku. Mucizyi umwi wakalijisi luzyibo lwakuvwuba nkuku, aboobo bakayeeya kuvwuba nkuku kutegwa kabajana mali aakuligwasya.

Umwi wabacizyi wakati: “Kwiinda mukugwasyigwa a Jehova alimwi abakwesu abantu mbotwakali kuyiisya Bbaibbele, twakacikonzya kukkala mu Manglisi myaka yosanwe.” Lino mu Manglisi muli kabunga kabakwesu abacizyi basungu.

Mumyaka misyoonto yainda, cisi ca Georgia catambula bamuzwakule banji. Bapainiya banji bakajana kuti kukambaukila bantu aaba cakaba cilawo cipya. Aboobo bakatalika kwiiya myaambo mipya mbuli Arabic, Azerbaijani, Chinese, Chingisi, Persian, alimwi a Turkish.

Bapainiya banji bakatalika kuyanzana atubunga alimwi ambungano zibelesya myaambo yakunze aacisi, mpoonya bamwi bakalongela kuzisi zimbi ikubulide kapati. Ba Giorgi aba Gela bakajisi myaka yamuma 20 ciindi nobakalongela kucisi cimwi icili afwaafwi. Ba Giorgi bakaamba kuti: “Twakali kuyanda kubelekela Jehova camoyo woonse, alimwi kulongela nkuko cakali coolwe cibotu kapati.”

Nobayeeya mbocakabede ciindi nobakali nkuko, ba Gela bakaamba kuti: “Kubeleka kandili mwaalu mucilawo cili boobu kwandiyiisya zinji. Cilakkomanisya kapati ciindi nobelesyegwa a Jehova kugwasya ‘tubelele’ twakwe.”—Joh. 21:17

Ba Giorgi bakayungizya kwaamba kuti: “Kwakali buyumuyumu bumwi, pele twakali kubikkila maano kumulimo wesu alimwi taakwe notwakayeeya kucinca kusala kwesu.  Twakali kulimvwa kuti twakali kucita buyo ncotwakeelede kucita.”

Mukwesu umwi awalo wiitwa kuti Gela, wakabelekela ku Turkey kwamyaka misyoonto. Wakati: “Kumatalikilo, nondakajisi buyumuyumu bwakwiiya mwaambo uukananwa kubusena ooku, cakali ciyumu kuzumanana kandikkomene. Nokuba boobo, nondakacizyiba kubandika abakwesu abacizyi alimwi abantu bamucilawo mumwaambo wabo, ndakali muntu uukkomene lyoonse.”

Ba Nino, ibali kubeleka mulimo wabupainiya mu Istanbul, kucisi ca Turkey, kwamyaka iinda ku 10, bakaamba mbobalimvwa kuti: “Ndakalimvwa kuti Jehova wandigwasya kuzwa mubuzuba bwakusaanguna nondakalonga. Kubeleka mulimo wabupainiya kucisi cimbi kukupa coolwe buzuba abuzuba cakuba ‘azyakuluula zikonzya kulembwa mu Bbuku Lyaamwaka.’”