BAMAAMA bakanyema kapati ciindi mebo abakaintu bangu, ba Tsitso notwakaba Bakamboni ba Jehova. Bumwi buzuba, bakaita babbululu besu boonse, kabayeeya kuti balacikonzya kundilesya kuyanzana a Bakamboni. Bakandaambila kuti ndisale—akati kakuyanzana a Bakamboni naa kukakwa amukwasyi.

Ndakasala kuzwa mudolopo motwakali kukkala. Mbwaanga ndakali kucita mulimo wakupanga-panga zintu zyalubulo, ndakayeeya kulongela kudolopo limbi lipati lyamucisi ca Georgia, ku Kutaisi, kwalo nkondakali kukonzya kujana mulimo cakufwambaana. Alimwi ndakalizyi kuti mudolopo eeli kwakabulide basikumwaya, aboobo ndakasyoma Jehova kuti andisololele.

Nokwakainda ciindi cisyoonto, ndakaswaanganya muntu umwi ngondakali kuyiisya Bbaibbele iwakali kukkala mudolopo lisyoonto litegwa Jvari. Naakamvwa kuti ndakali kuyanda kulongela ku Kutaisi, wakandilomba kuti ndilongele mudolopo mwaakali kukkala. Wakandaambila kuti: “Tulijisi ŋanda. Mebo abakaintu bangu alimwi abana, tuyoonjila muluumu iimwi mpoonya nywebo abakaintu banu mulakonzya kubelesya luumu iimbi.”

 Mbwaanga ndakali kuyanda kusololelwa a Jehova, ndakamwaambila kuti ndilacita oobo, pele lilikke kuti ndafwambaana kujana mulimo alimwi aŋanda yakubbadelela mu Jvari. Icakandigambya ncakuti, wakaboola alimwi mbubonya buzuba oobo kumangolezya kajisi mulongo wamasena nkobakali kuyanda basimilimo.

Nokwakainda mazuba masyoonto, mebo amukwasyi wangu twakalongela ku Jvari. Mbubwenya buzuba bwakusaanguna, ndakajana mulimo iwakali kuvwolwa mali manji ngondatakali kuyeeyela. Basikundilemba mulimo bakandipa ŋanda mpati yakukkala iyakali yakkampani. Nokwakainda ciindi cisyoonto, bakwesu bakandilomba kugwasyilizya kupulinta mabbuku cakusisikizya aamba zyamu Bbaibbele. Twakajisi busena bupati muŋanda yesu mpya, aboobo mebo abakaintu bangu twakazumina kuti mulimo ooyu kuucitilwa aŋanda yesu.

Kwamyaka minji, ŋanda yesu mpati yakali kubelesyegwa kucitila Ciibalusyo alimwi amiswaangano iimbi yaalubazu. Bantu bainda ku 500 bakabbapatizyigwa muŋanda yesu! Eelo kaka ndilikkomene kapati kuti ndakabubona busolozi bwa Jehova alimwi akubutobela