Bunji bwabaabo mbotwabala mumapeeji aali musyule mbana ‘ibayeeya Mulengi wabo Mupati mumazuba aabukubusi bwabo.’ (Muk. 12:1) Bapainiya banji akati kabapainiya bali 3,197 mucisi ca Georgia bajisi myaka yakuzyalwa iili 25 naa kuyaansi. Nkaambo nzi bakubusi banji mucisi oomu ncobacita kabotu mukasimpe?

Kulibonya kuti kuli twaambo tunji itupa kuti cibe boobu. Kaambo kamwi nkakuti, mikwasyi mucisi ca Georgia kanji-kanji ilikamantene. Ba Konstantine, ibakakomezya bana bosanwe mukasimpe, bakaamba kuti: “Icakandigwasya kwiiya kasimpe nkulimvwa kuti Jehova ngu Taata siluyando. Ciindi nondakaba muzyali, mbaakani yangu yakali yakugwasya bana bangu kuti kabaanguluka kulindime.”

Ba Malkhazi abakaintu babo, bajisi bana botatwe alimwi balasolekesya kugwasya mukwasyi wabo kuti kauyandana kapati. Bakaamba kuti: “Ciindi aciindi, tulababuzya bana besu kuyeeya ncobalumba kujatikizya ndiswe abanabokwabo.  Mpoonya tulabaambila kwaamba nzyobayeeya notucita kukomba kwamumukwsyi. Kucita boobu, kwabagwasya kubona bubotu muli bamwi akubalumba.”

Kutegwa kabagwasya bazyali kuyiisya bana babo, baalu balababikkilizya bana mumilimo yambungano kuzwa nobacili basyoonto. Ba Nestori, ibakabbapatizyigwa ciindi nobakajisi myaka yakuzyalwa iili 11 bakaamba kuti: “Baalu bakali kundipa milimo misyoonto iindene-indene kuzwa nondakacili musyoonto kapati. Eeci candigwasya kulimvwa kuti ndili cibeela cambungano.”

Zikozyanyo zibotu alugwasyo luzwa kubaalu azyalo zilayandika kapati. Ba Koba, mwanookwabo aba Nestori, bakaamba kuti: “Kwiindana abanabokwesu, myaka yabukubusi bwangu yakali kukatazya. Mwaalu umwi iwakacili mwana-mwana, iwakali cikozyanyo cibotu kulindime, lyoonse wakali kusola kundimvwisya alimwi tanaakali kundiyeyeela zibi. Wakandigwasya kapati kutegwa ndipiluke kuli Jehova.”

 Mazuba aano, ba Nestori aba Koba, kubikkilizya amucizyi wabo, Mari, babelekela antoomwe kucilawo cili kule. Ba Koba bakaamba kuti: “Lino ndipona buumi bukkomanisya ncobeni!”

Ofesi yamutabi ilasolekesya kugwasya bazyali kuyiisya bana babo kwiinda mukubabikkilizya mumilimo ya Bunakristo. Umwi wamu Kkomiti Yamutabi wakaamba kuti: “Tulabayanda kapati bakubusi besu aboobo tulasoleka kubagwasya ciindi nobabeleka canguzu kuzuzikizya mbaakani zyabo zyakumuuya.”

Kubeleka antoomwe abakwesu alimwi abacizyi basimide kulabagwasya kapati bakubusi munzila njobatakalubi. Ba Mamuka, ibakali kubelekela antoomwe ababelesi ibakazwa kuzisi zimbi ciindi nobakali kuyaka Ŋanda Yakucitila Miswaangano Mipati mu Tbilisi, bakaamba kuti: “Mayake aali boobu nkobakali kutola lubazu basikuyaka ibazwa kumasi aambi, akandipa zyoolwe zibotu zyakwiiya kuzwa kuli bamwi. Kuyungizya aakujana luzyibo lugwasya, ndakaiya ziiyo zinji zyakumuuya.”

Kuyanzana kubotu mumikwasyi, ikukulwaizyigwa abaalu, alimwi azikozyanyo zibotu zyabamwi zyabagwasya kapati bakubusi banji mucisi ca Georgia. Bazyali babo balimvwa mbwaakalimvwa mwaapostolo Johane naakalemba kuti: “Kunyina cintu cindipa kukkomana kapati kunze lyaceeci: kuti kandimvwa kuti bana bangu balazumanana kweenda mukasimpe.”—3Joh. 4.

Mu 2013, Kabunga Keendelezya kakalomba maofesi aamitabi oonse kuti avwuntauzye naa mabbuku inga ayandika mumyaambo iimbi iikananwa mucilawo cabo mwalo mabbuku eesu mwaatasandululwi. Makanze akali aakuti bantu banji basikilwe amakani mabotu.

 Aboobo ofesi yamutabi yakucisi ca Georgia yakasala kusandulula mabbuku amwi mumwaambo waci Svan awaci Mingrelian, myaambo yobilo iikozyenye kapati amwaambo waci Georgian.

Bapainiya basungu kuzwa kucooko ca Svaneti bakalemba kuti: “Bantu baambaula mwaambo waci Svan balazikkomanina zintu zyakumuuya alimwi balalilemeka Bbaibbele. Nobaba baabo ibakali kuwayawaya kutambula mabbuku eesu kaindi, bakazumina kwaatambula aayo aakasandululwa mumwaambo wabo.”

Basikumwaya boonse ibakanana mwaambo waci Mingrelian bakakkomana kapati ciindi nobakatalika kuba amiswaangano mumwaambo wabo. Giga, mupainiya mukubusi, ulazumina kuti: “Lino ndilakonzya kwaambaula kubelesya majwi aangu notuli kumuswaangano.  Tandiciyandiki kusandulula mumizeezo nzyondiyanda kwaamba kanditanaingula.”

Ba Zuri, mwaalu mumbungano iibelesya mwaambo waci Mingrelian mu Tkaia, bakaamba kuti: “Ndamvwa twaambo tunji tusika amoyo mubuumi bwangu, twaambo tukkomanisya alimwi atuusisya, pele taakwe notwakandipa kulila. Pele ciindi nyimbo zya Bwami zyamumwaambo waci Mingrelian nozyakaimbwa kumuswaangano ciindi cakusaanguna, baswiilizi boonse kubikkilizya andime yakatweenda misozi.”

Cintu cikkomanisya kapati icakacitika icijatikizya Bakamboni mucisi ca Georgia cakacitika mu Mujibelo, April 6, 2013, ciindi mukwesu David Splane wamu Kabunga Keendelezya naakapa makani aakwaaba mutabi  iwakabambululwa akuyungizyigwa, Ŋanda Yakucitila Miswaangano Mipati alimwi aŋanda yakucitila cikolo cakuyiisya Bbaibbele. Bakamboni banji bakabatambula mumaanda aabo beenzu ibali 338 ibakazwa kuzisi zili 24.

Buzuba bwakatobela, Mukwesu Splane wakapa makani aalubazu kubaswiilizi ibali 15,200, ibakaswiilila kwiinda mukubelesya Intaneti a TV kumasena aakucitila miswaangano yambungano cisi coonse mbocizulwa. Eeci cakali ciindi cakusaanguna kuba amuswaangano wamasi mupati boobu mucisi ca Georgia. Kukulwaizyanya alimwi alukkomano ndobakajisi bakwesu abacizyi zyakali kukkomanisya ncobeni. Mukwesu umwi mukubusi wakaamba kuti: “Lino ndazyiba mboiyooba nyika mpya.”

Cikolo Cakwiiya Bbaibbele ca Banabukwetene Banakristo, lino iciitwa kuti Cikolo Cabakambausi ba Bwami, cabagwasya kapati bantu ba Jehova mucisi ca Georgia. Kutalikila mu 2013, basicikolo ibainda ku 200 bakamanizya cikolo eeci. Akaambo kakulumba kapati lwiiyo ndobakatambula, basikumanizya cikolo balilisungwide kubeleka cabusungu kufwumbwa nkobayandika.

Tulalumba kapati akaambo kakusolekesya cabusicamba kwabakambausi ba Bwami bakusaanguna, nkaambo makani mabotu asika mucisi coonse ca Georgia. Jehova wabalongezya akaambo kaluyando ndobajisi kulinguwe akuli basimukobonyina, lusyomo lwabo, busicamba alimwi abupampu bwabo.

Bakwesu abacizyi ibainda ku 18,000 mucisi ca Georgia balikkomene kuzumanana kubeleka mulimo ngobakatalika ibakabasaangunina akugwasya basimukobonyina kulibonena lwabo beni nguzu zya Jwi lya Leza.—Flp. 3:13; 4:13.