KATANAZYALWA Sanel, bamadokota bakaambila bazyali bakwe kuti ikuti naa akatumbukwe kali muumi, unooli mwana uuciswa-ciswa kapati. Mbubwenya buzuba naakazyalwa, wakali kuyandika kwaandulwa. Bazyali bakwe, ibakali kukkala ku Abkhazia—cooko icakalilela kuzwa kucisi ca Georgia—tiibakali kukonzya kujana dokota iwakali kukonzya kwaandula Sanel kakunyina kubelesya bulowa.

Bazyali bakwe bakabandika aba Hospital Liaison Committee (HLC). * Bakakkalwa moyo ciindi bakwesu bamu HLC cakufwambaana nobakajana dokota mu Tbilisi, dolopo lipati lyacisi ca Georgia, iwakazumina kwaandula mwana kakunyina kubelesya bulowa. Pele banyina Sanel tiibakaningapona cakumaninina kuzwa nobakatumbuka aboobo tiibakaunka. Aboobo kwakasalwa kuti bamakaapanyina ba Sanel, boonse bobilo ibakali Bakamboni, mbebakali kuyootola mwana musimbi muvwanda kucibbadela ku Tbilisi.

Mwana wakaandulwa kabotu-kabotu kakunyina penzi. Nokwakainda ciindi cili mbocibede kuzwa naakaandulwa, bamakaapanyina bakalemba kuti: “Twakakkala mucibbadela kwamazuba aayinda ku 20. Mumazuba aaya oonse, bakwesu abacizyi bamucisi ca Georgia bakali kutuswaya akutugwasya. Banji bakeetezyegwa alimwi akutuumbulizya. Twakalibalide kujatikizya luyando lwabunyina ndobatondezya bakwesu, pele lino twakalibonena.”