Ku Sierra Leone, ba Crystal, ba misyinali ibabelekela mucilawo cibelesya mwaambo wakutambaika, kabatanaunka mumulimo wamumuunda bakapaila kutegwa bajane basinke matwi mucilwo. Mafwumofwumo aayo, nobakali kuyanda kupilukila kumuntu ngobakaswaanganizyide, bakabelesya mugwagwa ngobatakali kubelesya lyoonse. Bakabuzya basimukobonyina ikuti naa kuli basinke matwi  ibakaliko mucilawo, aboobo bakabatondezya nkobakabede. Ooko bakajana mukaintu uucili mwana-mwana mubotu moyo walo iwakautambula mulumbe alimwi akutondezya luyandisisyo lwakujanika kumiswaangano yamumwaambo wakutambaika. Mpoonya bantu bamumunzi ooyo bakabuzya ba Crystal kuti naa bakali kuyanda kubona muntu aumwi musinke matwi. Aboobo bakajana aumwi muntu mubombe moyo iwakali kuyandaula kasimpe. Nokuba kuti bakali kubeleka kwaziindi zili mbozibede mumugwagwa ooyo, kunyina nobakaswaangene abantu basinke matwi bobilo mbobakaswaanganya mafwumofwumo aayo. Ba Crystal balisinizyide kuti kunyina nobakali kukonzya kujana bantu basinke matwi aabo bajisi luyandisisyo kakunyina kugwasyigwa a Jehova.

Ba Emmanuel, ibakkala ku Liberia, bakali kweenzya mootokala kuya ku Ŋanda ya Bwami kumiswaangano yakumamanino aansondo. Kumbali aamugwagwa kwakaimvwi mwaalumi mwana-mwana iwakasamide kabotu iwakali kulibonya kupenga kapati mumizeezo. Kwiinda mukubona mbwaakali kulibonya, ba Emmanuel bakaimika mootokala kutegwa babone naa balakonzya kumugwasya. Bakazyiba kuti mwaalumi ooyo zina lyakwe wakali Moses. Busiku bwakaindide, mali aakwe oonse akabbigwa, aboobo wakali kuyanda kulijaya. Ba Emmanuel bakaswiilila ncaakali kwaamba Moses mpoonya calweetelelo bakamwaambila kuti: “Atweende limwi ku Ŋanda ya Bwami.” Mpoonya boonse bobilo bakaunka ku Ŋanda ya Bwami. Ncaakamvwa Moses okuya cakamweenzya misozi. Naakamana kuswiilila makani aabuleya, Moses wakati: “Makani aaya akabambilwa ndime! Bakamboni ba Jehova mbantu  balibedelede.” Noyakamana miswaangano, Moses wakazumina kwiiya Bbaibbele, alimwi lino ulajanika lyoonse kumiswaangano yambungano.

Aminata ngusicikolo uujisi myaka iili 15 ku Guinea-Bissau. Naakajisi myaka iili 13, bayi bakwe ibakali kumuyiisya ciiyo cakuzekaula bakaambila basicikolo kudulowiŋa basyaamankwamu alimwi azintu zimwi ziswaangene amapobwe aabanamaleya. Muciindi cakudulowiŋa basyaamankwamu, Aminata wakadulowiŋa banyama alimwi azisamu mpoonya akulemba kuti “Paradaiso.” Ciindi bayi nobakabweza zyakudulowiŋa, bakaambila Aminata kuti wakadulowiŋa ziteendelani ancobakali kwiiya, aboobo kunyina mamakisi ngobakamupa. Nobakakotoka, Aminata wakaunka kuyakubonana abayi akubabuzya kuti: “Ino mbaani bakkomanina mapobwe aabanamaleya?”

Bayi bakaingula kuti: “Bantu batakombi Leza.”

Aminata wakaingula kuti: “Tandikombi baleza bakubeja, aboobo tanditoli lubazu mumapobwe aamusyobo ooyu. Ndisyoma kuti ino-ino Leza uyoocinca nyika kuti ibe paradaiso, aboobo ncencico ncondadulowiŋa.” Bayi bakaamba kuti balawiinduluka musunko kubelesya mibuzyo iilembedwe. Ino ncinzi cakacitika? Aminata wakajana mamakisi aali 18 kuzwa mumamakisi aali 20.

Kabunga ikali kulamfwu mukanzi kasyoonto ku Malawi, kajisi basikumwaya bali ciloba. Baswaanganina muŋanda iyakidwe azisamu, bwizu, alimwi aminseme. Akaambo kakukulwaizyigwa akuswaya kwamulangizi wabbazu, bakwesu bakatondezya busungu mukutamba bantu kuti  bakajanike ku Ciibalusyo calufwu lwa Kristo. Mwaambi wakacikonzya kupa makani aa Ciibalusyo kwiinda mukubelesya malambe aabikkwa mafwuta aakabikkidwe mujulu. Pele tanaakali kukonzya kweenda akaambo kabantu banji ibakamuzingulukide bakajisi luyandisyisyo. Amweezyeezye buyo lukkomano ndobakajisi basikumwaya ibali 7 ciindi nobakamvwa kuti ibakajanika bakali 120!

Zilongezyo iziboola akaambo kabukambausi bwaalubazu bwakukambauka kubuleya mumadolopo mapati kanji-kanji tazifwambaani kulibonya. Mu Lomé, dolopo lipati lyacisi ca Togo, cakuwayawaya mukaintu wakasika ali kakubikkila mabbuku akubweza broshuwa yakuti Mulakonzya Kukkomana Mumukwasyi Wanu. Mubufwaafwi bakabandika lugwalo lwa Baefeso 5:3. Mukaintu alimwi a Kamboni bakapedana manamba aamafooni. Nokwakainda nsondo zyobilo, mukaintu ooyo wakatuma fooni akwaamba kuti: “Tiindakali kubayanda Bakamboni ba Jehova. Pele ndakaibala broshuwa, alimwi ili kabotu. Yandigwasya kale kumana mapenzi aangu amwi aamucikwati, alimwi ndabagwasya abanabukwetene bamwi. Bakamboni ba Jehova ndakali kubabona munzila iitali kabotu. Ndalomba mukaboole kundiyiisya Bbaibbele.” Ciiyo ca Bbaibbele cakatalisyigwa kumukaintu ooyo alimwi akuli banabukutene bamwi mbaakagwasya.

Dolopo lya Ankasie ndidolopo lisyoonto mu Ghana. Basikusambala basyoonto balasambala zintu zyabo munsi-munsi amugwagwa mupati. Nokuba boobo, nsondo ansondo mu Muhulo, kakubikkila mabbuku kakukuba ikabelesyegwa mubukambausi bwakubuleya kalabikkwa. Ba Enoch nobakamana kukambaukilwa amukwesu wazina lya Samuel, iwakaimvwi ali kakubikkila mabbuku kakukuba, bakazumina kubweza broshuwa yakuti Amumuswiilile  Leza akubuzya ba Samuel kuti naa kwakali mabbuku aali woonse mumwaambo waci Kusaal.

Ba Samuel bakaingula kuti: “Mutujatile, tatujisi. Pele tulijisi mabroshuwa mumwaambo waci Frafra,” uukozyenye amwaambo waci Kusaal. Kuzwa waawo, ba Enoch kabatanaunka kumunzi wabo kulubazu lwakunyika, bakalomba mabbuku manji kutegwa bakape babbululu babo.

Nobakapiluka ku Ankasie, bakapa ba Samuel pepa. Ba Enoch bakaisandulula broshuwa yakuti Amumuswiilile Leza mumwaambo waci Kusaal! Bazumanana kujanika kumiswaangano alimwi akwiiya Bbaibbele lyoonse.