Ku Georgia, mwaalumi wakasika aakali kakubikkila mabbuku kakukuba, akwaamba kuti: “Tandikoomuzumizya kuti mukambauke abusena obuno! Georgia ncisi cacikombelo ca Orthodox.” Mukwesu iwakaimvwi aakali kakubikkila mabbuku kakukuba wakabuzya mwaalumi ooyo kuti naa wakalaabalide kale mabbuku eesu. Mwaalumi wakaingula kuti: “Peepe, tandinaabalide.” Cabupampu mukwesu wakamwaambila kuti abale. Bupampu  oobu mbwaakabelesya mukwesu ooyu bwakamutontomeka mwaalumi ooyu, aboobo wakabweza mabbuku aamwi. Nokwakainda mazuba, mwaalumi wakapiluka akulilekelela akaambo kabukali mbwaakajisi naakaliko ciindi cakusaanguna. Wakaamba kuti wakababalila mamagazini eesu banyina batalangi. Boonse bobilo bakaakkomanina kapati alimwi bakali kuyanda aambi mapya kuti babale. Lino ulaunka lyoonse ali kakubikkila mabbuku kakukuba akubweza mamagazini mapya.

Nobakali mubukambausi ku Azerbaijan, bakwesu bobilo bakaswaanganya mwaalumi uucili mwana-mwana kaimvwi munsi-munsi aaŋanda imwi aboobo bakatalika kumukambaukila. Mwaalumi ooyo wakaamba kuti: “Tandikonzyi kuziswiilila zintu nzyomwaamba; inga caba cinyonyoono nkaambo ndizulilwa kucikombelo cimbi.” Mpoonya wakagusya naifi munkomwe akwaamba kuti: “Ndakacitilwa cakutalulama, lino ndiyanda kuunka kuyakubelesya naifi eeyi kutegwa bululami bucitwe.”

Bakwesu bakagambwa, aboobo bakaamba kuti: “Tee kayi kujaya ncinyonyoono.”

Mpoonya mwaalumi wakaamba kuti: “Ino ncinzi ncondeelede kucita?” Bakamubalila lugwalo lwa Baroma 12:17-21 alimwi akumupanduluda kuti Jehova nguupilusya cibi alimwi akuti tatweelede ‘kuzundwa abubi pe, pele tweelede kuzumanana kuzunda bubi kwiinda mukucita zibotu.’ Bakamwaambila kujatikizya nguzu nzyoujisi mulaka mubombe alimwi akuti ikuti naa wacisa muntu naa kumujaya, manjezyeezya aakwe ayakumupenzya. Kakkomene akaambo kazintu nzyaakamvwa, mwaalumi ooyo wakabasiya.

Nokwakainda ciindi citandila kuwoola, mwaalumi wakabajana bakwesu akwaamba kuti: “Ndazwa kwaakubona  muntu ngondali kuyanda kujaya. Kunyina ncondamucita pele makani twaabamba. Ndalumba kapati kuti mwandifwutula kumapenzi ngondali kuyanda kuleta.” Bakamboni bakapandulula kuti mubwini Jehova ngowamugwasya.

Kwamyaka iili mbwiibede yainda, mucizyi umwi ku Norway wakaleya kuzwa mukasimpe. Nokuba boobo, ciindi twakubikkila mabbuku twakukuba notwakatalika kubelesyegwa mubukambausi bwakubuleya, lyoonse wakali kwiinda ali ntuto naakali kuula zintu.

Nokuba kuti kunyina naakali kubandika a Bakamboni ibakali kujanika ali twakubikkila mabbuku twakukuba, wakabikkila maano kuzikwankwani ziboneka kabotu alimwi amabbuku aakabikkidwe kabotu. Eeci alimwi abulongwe akusama kabotu kwa Bakamboni, kwakamupa kuti atalike kuyeeya kupiluka kuli Jehova akubantu bakwe.

Mucizyi ooyu alimwi wakabona webbusaiti yesu ya jw.org, aboobo wakayanda kuunka awebbusaiti. Wakakkomana ciindi naakabona mbocakali cuuba-uba kujana kkeyala ya Ŋanda ya Bwami iili afwaafwi alimwi aciindi miswaangano noicitwa. Wakakkopa mabbuku alimwi akuunka ku Ŋanda ya Bwami kayandide kapati kuyooswaangana. Wakatambulwa camaanza obilo, alimwi baalu bakabamba bubambe amucizyi umwi kuti kabaiya Bbaibbele amucizyi ooyu. Kalitanalampa, wakajana balongwe mumbungano alimwi akutalika kucita zintu zyakumuuya mbuli mbwaakali kucita kaindi. Lino ulatola lubazu lyoonse lyamiswaangano alimwi amumulimo wamumuunda, ulikkomene akaambo kakuba acilongwe cibotu a Jehova alimwi.

Mubbaasi lyacikolo ku Norway, musimbi wazina lya Ronja uujisi myaka iili 15 wakajisi mubandi kujatikizya makani aakusanduka kwazintu abasankwa botatwe mbaakali kwiiya limwi kkilasi yomwe. Basankwa aaba tiibakali kuzilemeka  nzyasyoma, aboobo eeci cakapa kuti mucizyi wesu ooyu katalikwayi. Akaambo kakuti kwakaindide ciindi cilamfwu kuzwa ciindi naakabandikide makani aaya, wakalimvwa kuti tanaakalibambilide, aboobo wakaakulomba banyina kutegwa bamugwasye kujana twaambo tumvwika tusinizya kuti Mulengi nkwali.

Kali mubbaasi lyacikolo buzuba bwakatobela, Ronja wakatubelesya twaambo ntwaakalibambila. Nokuba boobo, basankwa aaba bakaile kumusampaula akaambo kalusyomo lwakwe muli Jehova. Umwi wabasankwa aaba wakaamba cakupozya kuti: “Mubbaasi muno kunyina uusyoma muli Jehova! Ndalomba kuti mutambike maanza. Ino mbaani basyoma mukusanduka kwazintu, alimwi mbaani basyoma muli Jehova?” Icakamugambya Ronja ncakuti, kasankwa kajisi myaka iili 12 ikakakkede munsi-munsi lyakwe kakatambika janza akwaamba kuti: “Mebo ndisyoma muli Jehova!” Atwana tumbi tobilo twakayungizya kuti: “Andime ndisyoma muli Jehova!” Mubandi ngwaakajisi Ronja  abasicikolonyina mbaakali kwiiya limwi kkilasi yomwe, wakamvwugwa abasicikolo bamwi, alimwi bamwi bakatusyoma twaambo ntwaakali kwaamba!

Buzuba bumwi kumazuba, baalumi bobilo ibabelesya mwaambo waci Arabic ibazwa ku Syria bakaunka kuofesi yamutabi ku Denmark. Bakaambila bacizyi ibakali abusena aatambudwa beenzu kuti bakali kuyandaula Bakamboni ba Jehova. Ciindi bacizyi nobakabaambila kuti kubusena nkobasika nkonkuko nkobajanika Bakamboni, baalumi aaba bakakkomana kapati. Ino bakaijana buti kkeyala? Bakatondezya babelesi baku laibbulali cifwoto ncobakakkopede kubelesya fooni yabo. Cifwoto eeco ncobakakkopa cakali cifwoto capeeji lijisi makani aabasikumwaya mubbuku lya Ino Ncinzi Cini Bbaibbele Ncoliyiisya? lyamumwaambo waci Arabic. Aboobo babelesi bamu laibbulali bakabapa kkeyala yaofesi yamutabi.

Bamaalumi bobilo aaba bakajisi penzi kubandika mwaambo waci Danish. Mpoonya mukwesu uuzyi mwaambo waci Arabic wakaitwa kubusena butambudwa beenzu. Cakalibonya kuti umwi wabaalumi aaba wakali kuyandisya kapati kwiiya zinji kujatikizya Bbaibbele. Mpoonya mukwesu wakabweza kkeyala yakwe, e-mail adilesi yakwe alimwi anamba yafooni akusyomezya kumuswaya kwainda buyo ciindi cisyoonto antoomwe amukwesu uumbi iwakauzyi mwaambo waci Arabic.

Nobakamuswaya kuŋanda yakwe mwaalumi ooyu, bakwesu bakazyiba kuti tanaakaningaswaidwe a Bakamboni ba Jehova. Wakabaambila kuti wakajana bbuku mukabbokesi kakwe kamagwalo, nokuba boobo kabbokesi kamagwalo tiikakajisi zina ilyakali kutondezya kuti kakali kuzulilwa kumuntu waambaula mwaambo waci Arabic. Akaambo kakuti tanaakacizyi kubala akulemba, wakalomba mweenzinyina umwi kuti amubalile bbuku eelyo, aboobo bakamanizya kulibala mumazuba otatwe. Nzyaakamvwa nokuba kuti zyakali  buyo zisyoonto, zyakamupa kuti asyome kuti wakajana kasimpe.

Akaambo kakuti muzangalisi uukkala kulamfwu kapati amukwasyi wakwe, calo cimupa kulimvwa bubi kapati, wajana luumbulizyo mu Bbaibbele. Ciindi cakusaanguna naakaswaigwa abakwesu, wakabuzya kuti: “Ino nkaambo nzi ncomwatakali kuboola kundiswaya kaindi? Aaya makani ndakali kwaayanda kapati.” Wakazumanana kwiiya Bbaibbele abakwesu alimwi ulazikkomanina kapati nzyaiya.

Ba Dmitry bakali kubeleka mulimo wakulanganya kkampani yatombwe ku Ukraine, pele ciindi nobakamvwisya kufweba mbokwakali kuletela ntenda kubuumi bwamuntu, bakacileka kubeleka mulimo ooyu uuvwolwa mali manji. Mpoonya, mumyezi buyo yotatwe, banyina alimwi abanyinazyala bakafwa. Kusweekelwa bayandwa aaba kwakabacisa kapati. Bakali kuyeeya kuti balakonzya kujana luumbulizyo alimwi abwiinguzi kumibuzyo yabo kuzwa kucikombelo cabo, pele eeci tiicakacitika. Mweenzinyina wakabaambila kuti, kuba Munakristo wacikombelo ca Orthodox caamba kusama “ciingano munsingo pele kotazyi cintu cili coonse kujatikizya Leza.” Mubwini oobu mbobakali kulimvwa ba Dmitry. Bakazyiba kuti kunyina ncobakazyi kujatizya Leza naa Bbaibbele. Kabakatazyidwe kapati mumizeezo, bakatalika kupaila kulomba lugwasyo. Mpoonya bakayeeya kuti kuli nobakamvwide makani aajatikizya Bakamboni ba Jehova. Aboobo bakajana webbusaiti yesu a Intaneti alimwi bakakkomana kapati kujatikizya makani manji ngobakajana aamba zya Bbaibbele. Kuzwa waawo, bakalangaula Ŋanda ya Bwami iyakali afwaafwi ankobakkala. Nobakasika abusena busiilwa myootokala, sikugwasyilizya wakabatambula camaanza obilo alimwi akubabuzya mbwakonzya kubagwasya. Ba Dmitry bakaamba kuti: “Ndiyanda kwiiya Bbaibbele.” Lino balikwiiya Bbaibbele kwamyezi iili cisambomwe alimwi balajanika lyoonse kumiswaangano akutola lubazu.

Ba Paul alimwi aba Faith, ibakkala ku Britain, bakakkomana kubandika amukaintu wazina lya Susan alimwi akubamba bubambe bwakupilukila. Nobakapilukila, ba Susan tiibakaliko aŋanda. Kwiinda mukutobela malailile aajatikizya tugwalo aali mu Mulimo Wesu wa Bwami wa November 2014, ba Paul alimwi aba Faith bakasiya kagwalo kaamba kuti bayooboola alimwi buzuba butobela. Ciindi nobakaunka alimwi buzuba bwakatobela, bakagambwa kujana kagwalo amulyango waŋanda yaba Susan. Ba Susan bakapandulula kuti baunka kuyakuula zintu zyabwiinga bwamwanaabo musimbi. Ba Paul aba Faith bakasiya kagwalo kambi kaamba kuti bayooboola alimwi nsondo iitobela. Aciindi eeci, ba Susan bakali kubalindila, alimwi bakatalika kwiiya mubbuku lya Bbaibbele Ncoliyiisya.

Akaambo kakuti kwakasyeede buyo mazuba masyoonto kuti mwanaabo musimbi akwatwe, ba Susan bakalomba kuti bakabaswaye ciindi cimbi. Ciindi ba Paul aba Faith nobakaboola alimwi kunyina ngobakajana, aboobo bakasiya kagwalo  ikakajisi anamba yabo yafooni. Bakakkomana kutambula kagwalo kaafooni kuzwa kuli ba Susan kakulilekelela kuti tiibakabonana ambabo; bakali kubandika abasimukobonyina mugaadeni. Kuzwa leelyo, ba Susan balikkomene abubambe bwakwiiya Bbaibbele lyoonse, alimwi caino-ino bakajanika kumiswaangano ciindi cakusaanguna.

Ba Paul aba Faith mbasungu kusiya tugwalo kutegwa bazumanane kubandika abantu. Bakaamba kuti: “Tulijisi abamwi bantu mbotuswaya ibakabala tugwalo ntotwakali kubasiila. Eelo kaka nzila eeyi ilagwasya kapati!”

Mu August 2014, mukwesu wakajatwa kucibbadela ku Hungary akaambo kakuciswa bulwazi bwakwaangana kwabulowa munsinga zyuunka kumapunga (pulmonary embolism). Cuusisya ncakuti, tiilyakalampa mukwesu ooyu wakafwa. Kujatikizya nesi, wazina lya Tünde, iwakali kumugwasya kapati, mukaintu wamukwesu ooyu wakalemba kuti:

“Muciindi cacilimo mumwaka wa 2015, ndakajanika amwanaangu musankwa kumusaangano wacooko iwakajisi mutwe wakuti, ‘Amumwiiye Jesu!’ Kumamanino aabuzuba bwatatu, notwakali abusena aasiilwa myootokala katulibambila kupiluka kuŋanda, mukaintu umwi wakaima kumbele lyangu, wakalekezya zibbeeke zyakwe, akundikumbata, mpoonya wakatalika kulila. Ooyu ngonesi iwakali kulanganya balumi bangu mwaka wamana nobakali muwaadi yabantu bacisidwe kapati. Wakapandulula kuti kumatalikilo aaciindi cakubeleka, nesi umwi aumwi ulapegwa mulwazi omwe ngwayelede kulanganya. Lyoonse wakali kupailila kuti kapegwa kulanganya balumi bangu. Eeco ncecico icakali kucitika lyoonse!

“Kweelana ambobakaamba ba Tünde, bukkale bubotu bwabalumi bangu akaambo kalusyomo lwabo alimwi akwaamba bulangizi mbobakajisi lyoonse nkokwakakulwaizya banesi kuti babone kuti bayandika kwiiya Bbaibbele a Bakamboni ba Jehova.

 “Ba Tünde balo lino ibaiya Bbaibbele, balangila kumbele ciindi cabubuke nobayootambula balumi bangu. Bayanda kuti bakabaambile kuti bukkale bwabo alimwi alusyomo lwabo luyumu nzyezyakapa kuti bamuzyibe Jehova alimwi azisyomezyo zyakwe zitaliboteli.”

Akaambo kamazwanga alimwi akukasyigwa kwazintu kuti kazitanjili mucisi akuzwa, masena aalangilwa-langilwa bantu ciindi nobanjila mucisi akuzwa akati kacisi ca Greece a Bulgaria akali kujalwa zimwi ziindi, aboobo myootokala minji yakali kwiima kailindila kuti masena aayo ajalulwe. Mbungano iyakali munsi-munsi amasena aaya ku Bulgaria yakabelesya coolwe eeci kwaabila basimyootokala mabbuku aamba zyamu Bbaibbele. Bakwesu bakali kuunka mumasena aaya kabajisi mabbuku mumyaambo iili 12. Bunji bwabanamutekenya bakalikatede alimwi akucimwa, pele bakali kuyanda kubandika. Bakwesu bakali kuswiilila calweetelelo akubakulwaizya alimwi akubaambila kuti zintu zilaba kabotu. Namutekenya umwi wakababuzya kuti: “Sena muli Bakamboni ba Jehova?” Nobakamwiingula kuti inzya, wakayungizya kuti: “Ndalizyi, nkaambo Bakamboni ba Jehova balikke mbobakambauka mbuli mbomucita.” Namutekenya muna Austria wakaamba kuti: “Akokuno mulajanika! Mucita kabotu! Amuzumanane kuumbulizya bantu alimwi akubapa bulangizi.” Aumbi wakati: “Kunyina nondakayandide kubala mabbuku aanu. Pele lino aaya ngomwandipa ndilaabala kandikkomene.” Namutekenya umwi yakamweenda misozi ciindi mukwesu uumwi naakamukambaukila. Wakaamba kuti wakali Kamboni myaka minji yainda. Bakwesu bakamukulwaizya kutabala buyo mabbuku pele alimwi akunooswaangana.