Ciindi Olivia, uukkala ku Australia, naakacili kucikolo cabana baniini, wakatamba bayi bakwe ku Ciibalusyo. Mwaka amwaka kwamyaka iili lusele, Olivia wakali kubatamba bayi bakwe ku Ciibalusyo. Mpoonya mu 2016, bayi bakwe bakamutumina fooni kumwaambila kuti bayanda kuyoojanika ku Ciibalusyo. Bakaamba kuti bakalimvwa kubikkilwa maano akaambo kakuti Olivia wakali  kubatamba mwaka amwaka. Aboobo bayi bakajanika ku Ciibalusyo antoomwe abalumi babo. Akaambo kakuti balumi babo bakali kubeleka mukkansulo, bakayeeya ciindi Ŋanda ya Bwami yamudolopo noyakali kuyakwa. Bakaambila bakwesu kuti cakabakkomanisya kapati kubona mbobakali kubelekela antoomwe bakwesu ciindi Ŋanda ya Bwami noyakali kuyakwa. Bayi antoomwe abalumi babo bakakkomana kapati mangolezya aayo cakuti bakali akati kabantu bakacaalizya kuzwa a Ŋanda ya Bwami.

Ba Jacintu abakaintu babo bakkala ku Timor-Leste. Mbasungu kapati mucikombelo ca Katolika. Ciindi mwana aabapati babo musankwa naakaba umwi wa Bakamboni ba Jehova akuleka kuunka kucikombelo antoomwe amukwasyi, bakakatazyigwa kapati. Akaambo kakuti bakali kuyanda kutondezya kuti nzyaakali kusyoma mwana wabapati babo musankwa tiizyakali zyamasimpe, ba Jacintu bakayanda kubala bbuku lyakuti Ino Ncinzi Cini Bbaibbele Ncoliyiisya? Makanze aabo akali aakuyanda kujana njiisyo zyakubeja. Kumane bakaambila bakaintu babo kuti: “Ndalibala bbuku. Pele lyoonse ndibotu.”

Bakaintu babo bakaingula kuti: “Kweelede kuti tiimwalibala kabotu. Amulibale alimwi, pele lino amulibale kabotu-kabotu.”

Ba Jacintu bakacita oobo, kumane alimwi bakaambila bakaintu babo kuti: “Mbubwenya buyo lyoonse ndibotu.” Mpoonya bakayungizya akuti: “Zyoonse izili mubbuku eeli zizwa mu Bbaibbele. Noziba zintu nzyolyaamba kujatikizya kukomba bantu bafwide zizwa mu Bbaibbele.”

Bakaintu babo bakati: “Amulibale alimwi ciindi catatu, pele lino kamuyaabweenga muncali umwi aumwi —amulibale cakulomya. Kweelede kuti nzyolyaamba tazili zyamasimpe.”

Ba Jacintu bakalibala bbuku cakulomya, kabayaabweenga muncali umwi aumwi. Nobakamana kulibala ciindi catatu, bakaamba kuti: “Zyoonse nzyolyaamba zyamasimpe! Mwana wabapati bangu uliluzi.” Ba Jacintu lino balaiya Bbaibbele a Bakamboni ba Jehova.

Mucizyi mupainiya uukkala ku Guam, wakaswaya mukaintu muna Pohnpei akumutondezya kavidiyo kakuti Nkaambo Nzi Ncomweelede Kwiiya Bbaibbele? Mucizyi ooyu wakaamba kuti uyakumuswaya alimwi. Nokuba kuti wakali kupilukila kwaziindi zili mbozibede, kunyina naakali kumujana mukaintu aŋanda. Aboobo mwana musimbi wamukaintu ooyu naakajalula mulyango, mucizyi wakamutondezya kavidiyo kamwi akati katuvidiyo tujisi mutwe wakuti Amube Balongwe ba Jehova. Mwana musimbi ooyu kakamukkomanisya kapati kavidiyo aaka.  Ciindi cakatobela naakaswaya alimwi mucizyi ooyu, banyina mbobakajalula mulyango akuukkomanina kapati mulumbe wamu Bbaibbele. Mwanaabo musimbi wakalibaambilide banyina kuti beelede kuunka kucikombelo camukaintu iwakamutondezya kavidiyo. Kulibonya kuti eeci cakapa kuti banyina babe aluyandisisyo. Ciiyo ca Bbaibbele cakatondezyegwa mbocicitwa, abubambe bwakapangwa bwakuti bazumanane kwiiya.

Ba Terence, imulangizi wabbazu, bakaunka abakaintu babo ba Stella, ku Inakor, icilawo citavwuli kubelekwa ku Papua New Guinea. Ba Terence bakaamba kuti: “Ciindi notwakacili koona mafwumofwumo buzuba bwakusaanguna, twakamvwa muntu uukonkomona kumulyango.  Bantu banji bakali kulindila anze, aboobo twakabakambaukila kuzwa ciindi ca 06:00hrs kusikila masyikati. Twakaima kutegwa tusambe pele notwakamana twakajana bayungizyika buya bantu ibakali kutulindila. Aboobo twakatalika kukambauka alimwi kuzwa ciindi ca 14:00hrs kusikila akaandabwe kamasiku.” Mafwumofwumo aakatobela, banabukwetene aaba bakafwuma kuzwa kutegwa bakaswaye kubusena bumbi. Alimwi bantu banji bakaunka kubusena nkobakali kukkala kabayaabubayandaula, nokuba boobo tiibakabajana. Ba Terence bakaamba kuti: “Ciindi nobakazyiba nkotwakaunkide, bakaboola eelyo bakatujana. Twakatalika kukambauka alimwi kusikila masyikati. Notwakapiluka kubusena nkotwakali kukkala, twakajana nkamu iimbi ilalindila. Buzuba abuzuba zintu zikozyenye zyakali kucitika. Bantu bakubusena ooku bakali ‘mbuli mbelele zitakwe mweembezi.’”—Mt. 9:36.

Ba Agnès, imupainiya uukkala ku New Caledonia, bakaunka kuli syaazibwene mubusilisi bwamilambi, manungo alimwi ansinga (physiotherapist) akaambo kapenzi ndyobakajisi kujanza. Naakali kulanga-langa ba Agnès, musilisi wakabaambila kuti wakabona bantu banji kabapenga aboobo wakali kukatazyigwa ikuti naa Leza ulalanganya. Ba Agnès bakamulumba Jehova mumoyo akaambo kakubapa coolwe cakumwiiminina. Kuzwa waawo, bakatondezya musilisi katulakiti kakuti Sena Kupenga Kuli Nokuyoomana? akumubalila lugwalo lwa Ciyubunuzyo 21:3, 4.

Musilisi wakaamba kuti: “Tandisyomi kuti lugwalo ndomwabala lulajanika mu Bbaibbele lyangu; lijisi buyo mabbuku aa Makani Mabotu.” Mpoonya, naakazyiba kuti ba Agnès bakali umwi wa Bakamboni ba Jehova, wakaamba kuti wakaswaanganizyide Bakamboni kucisi nkwazwa ku Chile.

Ba Agnès bakayeeya kuti lipooti yamutabi kujatikizya cisi ca Chile yakaliko a JW Broadcasting. Aboobo mukuswaya  kwakatobela, ba Agnès bakaletelezya tabbuleti yabo akutondezya musilisi kavidiyo kajatikizya lipooti yacisi ca Chile. Musilisi wakakkomana kapati kubona Bbeteli alimwi a Ŋanda Yakucitila Miswaangano Mipati mu Chile. Kuzwa waawo, ba Agnès bakaamba kuti: “Eeci ncecintu cabili ncendamuletela, Bbaibbele likkwene, kutegwa mukalubale lugwalo lwa Ciyubunuzyo 21:3, 4, lwalo ndondakamubalila nsondo yamana!” Musilisi wakanyamuka acuuno cakwe kakkomene akukumbata ba Agnès kaamba kuti: “Ndalumba kapati akaambo kazipego zyobilo eezyi zikkomanisya!”

Mukuswaya kwakatobela, ba Agnès bakamuletela bbuku lyakuti Ino Ncinzi Cini Bbaibbele Ncoliyiisya? akumupandulwida azimbi kujatikizya mapenzi ncaaliko munyika. Musilisi wakaamba kuti ulazwa mu New Caledonia kuunka ku Chile kuyoolyookezya alimwi akuti ulalitolelezya bbuku lyakwe kutegwa akalibale lyoonse.