Ba Ismael, ibakkala ku Mexico, bakayanda kubala Bbaibbele lyoonse. Mumwaka omwe buyo, bakalibala ziindi zyobilo, pele mukuya kwaciindi bakoofwaala. Nokwakainda myaka iili mbwiibede, ba Ángel, Kamboni wa Jehova, bakaswaangana aba Ismael akubandika ambabo kujatikizya zisyomezyo zya Leza. Ba Ismael bakaliyandide kwiiya zinji, pele  bakaamba kuti: “Ndili moofwu; tandikonzyi kulibala Bbaibbele.”

Ba Ángel bakabasyomezya kuti: “Mutapengi pe, ndiyakumuyiisya kubala Mabbuku Aaboofwu.”

Ba Ismael bakabuzya kuti: “Sena mulicizyi kubala Mabbuku Aaboofwu?”

Ba Ángel bakaingula kuti: “Peepe, pele ndinakwiiya andinywe.” Ba Ismael tiibakasyoma kuti ba Ángel bakali kukonzya kubacitila cintu cili boobo. Aboobo ba Ángel bakaunka kuŋanda akuvwuntauzya kujatikizya mbwaabalwa Mabbuku Aaboofwu, alimwi bakapanga mabala aaboofwu acibboodi. Mpoonya bakatalika kubayiisya ba Ismael mbwaabalwa Mabbuku Aaboofwu. Muciindi buyo cisyoonto, ba Ismael bakaiya alufabbeti yaboofwu, bakatalika kujanika kumiswaangano, alimwi bakali kubala amabbuku eesu aaboofwu. Lino ba Ángel balasololela ziiyo zya Bbaibbele kubantu boofwu bone. Balayanda kubandika kujatikizya Paradaiso iiboola kumbele ciindi nobayootalika kubona alimwi.

Viannei, imucizyi uujisi myaka iili 14 waku United States, wakalemba kuti: “Muciiyo citegwa social studies, bayi bakwe bakatalika kubandika makani aazikombelo mukkilasi. Bakatwaambila kuti twaambe mazina aazikombelo zimwi, aboobo mebo ndakaamba cikombelo ca Bakamboni ba Jehova. Basicikoloma bakaseka, akwaamba kuti tubasowela buyo ciindi, tatujisi cakucita, alimwi akuti balaasowa mabbuku eesu. Nobaba bayi bakali kwaamba zintu zibyaabi kujatikizya ndiswe.

 “Mpoonya ndakapaila kuli Jehova kutegwa andipe nguzu zyakupa bumboni. Ndakabaambila kuti, tulaunka mumaanda aabo ikutali akaambo kakuyanda kubasowela ciindi, pele akaambo kakuti Jehova nguututuma kutegwa tubaambile lulayo lugwasya lwamu Bbaibbele. Ndakabalomba kuti kabataasowi mabbuku eesu; alakonzya kubacinca alimwi akubapa kufwutuka. Bayi bangu bakalilekelela, akusyomezya kuti ciindi ciboola baakubaswaya Bakamboni, bayakubatambula, kubaswiilila alimwi akubala  mabbuku eesu. Tiindakacisyoma ncobakali kwaamba.

“Nokwakainda myezi yone, ndakababona, pele icakandigambya ncakuti bakali kwiiya Bbaibbele. Alimwi nokwakainda myezi iili cisambomwe, bakandiyandaula kucikolo kutegwa bandilumbe akaambo kakubakambaukila. Ndakalibalubide nkaambo bakaligelede masusu alimwi amalezu. Lino mbaasikumwaya batanabbapatizyigwa.”

Mwaka wamana, bantu ba Jehova ku Brazil bakabikkila maano kucooko cipati ca Amazon. Bantu banji mucooko eeco tiibakaningaamvwide makani mabotu. Akaambo kaceeci, Kabunga Keendelezya kakazumizya bubambe bwaalubazu bwakukambauka kwamwaka omwe kutegwa basikile bantu banji ibakkala mumasena aamucooko ca Amazon aali kulamfwu kapati.

Ofesi yamutabi yakasala madolopo aali 53 aakali mumbali-mbali aamulongo wa Amazon kuti asikilwe basikumwaya ba Bwami muciindi eeco. Mumyezi yone buyo, basikumwaya bainda ku 6,500 bakazumina kuunka kumasena aayo.

Mudolopo lyakulamfwu lya Anamã, kwalo ikwakanyina basikumwaya ba Bwami, bakwesu alimwi abacizyi bali 10 bakakkala kwamazuba aali 11, bakamwaya mabbuku aainda ku 12,500 akutalisya ziiyo zya Bbaibbele izili 200, zyalo lino zisololelwa kwiinda mukubelesya mafooni. Kabacili kokuya, bakwesu bakali kuba amiswaangano. Lyamuswaangano wamamanino ngobakacita kabatanazwa, bakakkomana kubona bantu bali 90 ibakajanika. Micelo yamulimo ooyu waalubazu iyoolibonya kumbele.

Kwamyaka iili cisambomwe yainda, Jehizel alimwi a Mariana bakali kwiiya limwi mukkilasi yomwe ku Venezuela. Akaambo kakuti Jehizel wakali Kamboni wa Jehova, kanji-kanji wakali kufwubaazyigwa kuli Mariana. Mariana wakalisinizyide kuti Jehizel tanaakazyi mboikkalwa nyika. Buzuba bumwi, naakamana kufwubaazyigwa, Jehizel wakaamba kuti: “Mariana, ulange awebbusaiti yesu ya jw.org. Mpoonya uunke aalembedwe kuti ‘Mavidiyo,’ akutyanka akabbokesi kalembedwe kuti ‘Bakubusi.’”

 Buzuba mbubwenya oobo kumazuba, Mariana wakatumina Jehizel fooni akumwaambila kuti: “Lino ndazyiba ncocitila boobu zintu.”

Katazyi ncaakali kupandulula, Jehizel wakabuzya kuti: “Sena undifwubaazya buya alimwi?”

Mariana wakati: “Peepe, tandikaciinduluki kukufwubaazya. Ndiyanda kukulumba, lino ndazyiba kuti ncondakali kuyeeya kuti ‘mboikkalwa nyika’ mubwini ncecindiletela mapenzi ngondijisi.” Kwakabambwa bubambe bwakuti Mariana atalike kwiiya Bbaibbele lyoonse, alimwi lino ulajanika kumiswaangano yoonse.

Ba Gérole, ibakabeleka kabali balembi mucikombelo cabo ku Haiti, bakakkomana kapati kuti Bakamboni  bakacikonzya kubaingula mibuzyo yoonse njobakajisi kubelesya Bbaibbele. Balo alimwi amwanaabo musimbi bakazumina kwiiya Bbaibbele. Akaambo kakuti nzyobakali kwiiya zyakabasika aamoyo, bakalomba kuti kabaiya ziindi zyobilo ansondo.

Nokwakainda myezi yotatwe kabaiya, ba Gérole bakaunka kumusololi wabo wacikombelo akumubuzya mibuzyo yone yakuti: “Ino mwaka nzi Jesu ngwaakabikkwa kuba Mwami? Ino bantu bali kabotu baya kuunka kuli baakufwa? Ino basizibi baya kuunka kuli baakufwa? Ino Jesu wakafwida aali, aciingano naa acisamu?” Musololi wacikombelo wakaamba kuti inga wacikonzya buyo kwiingula mubuzyo wabili awatatu. Wakaamba kuti: “Bakamboni ba Jehova baamba kuti, bantu ibali 144,000 mbabayakuunka kujulu. Pele mebo ndaamba kuti, bantu boonse bacita kuyanda kwa Leza bayakuunka kujulu. Mpoonya basizibi, bayakuumpwa mumulilo wahelo kukabe kutamani.” Ciindi naakabuzyigwa kujatikizya Magwalo aapandulula zintu eezyi, tanaakaamba noluba lomwe. Ba Gérole bakatyompwa pele lino bakayumya makanze aabo aakuzumanana kwiiya Bbaibbele kwiinda kaindi. Bakazyibya bacikombelo kuti bacileka kuzulilwa kucikombelo cabo akwaamba kuti bakaiya zinji kapati mumyezi yotatwe buyo njobakaiya a Bakamboni ba Jehova kwiinda myaka iinda ku 30 njobakali kuzulilwa mucikombelo cabo. Ba Gérole amwanaabo musimbi bakabbapatizyigwa caino-ino alimwi balasololela ziiyo zya Bbaibbele izili 23 mumunzi mobakkala.