Nomuyandwa Bakwesu Abacizyi:

Kaindi mumwaanda wamyaka waciloba B.C.E., musinsimi Ezekieli wakatondezyegwa cilengaano cigambya. Wakabona nkalaki yakujulu mpati kapati, iyakali kweendelezyegwa a Mweendelezi wabubumbo boonse. Icakali kugambya kapati kujatikizya nkalaki eeyo cijatikizya mboyakali kwenda. Yakali kubalika kapati mbuli mumuni, noliba leelyo noyakali kucinca nkoyeelede kutozya—yakali kukonzya kucita oobo kumwi kaibalika kapati pele kakunyina kunyona!—Ezk. 1:4, 9, 12, 14, 16-27.

Cilengaano eciya cituyeezya kuti mbunga ya Jehova yakujulu lyoonse ileenda. Mbuti kujatikizya mbunga yaanyika? Mwaka wamulimo wamana wakatondezya kabotu-kabotu kuti Jehova uleenzya mbunga yabantu bakwe bakamantene anyika alimwi ayalo ilabalika kapati!

Okuno kucisi ca United States, bamukwasyi wa Bbeteli bajisi bubi kulonga kuzwa mu Brooklyn kuunka kumaofesi mapati mapya, ku Warwick, New York, kubikkilizya akulongela kumaofesi aambi mpoonya bamwi bazwida limwi a Bbeteli. Bamukwasyi wa Bbeteli muzisi zimwi izili mbozibede kuzinguluka nyika yoonse bajisi bubi kuyaka, kuyakulula, kulongela kumitabi iimbi akaambo kakuti iimbi yakajalwa, naa kulongela kumasena aambi mapya. Mbuti kujatikizya ndinywe? Nokuba kuti kunyina nomwali kulonga munzila iini, tacidoonekwi kuti mwajisi bubi munzila zimbi.

 Kabunga Keendelezya kalikkomene kapati akukulwaizyigwa kubona kuti bantu ba Leza kuzinguluka nyika yoonse balikubeleka canguzu kwiinda lyoonse kutegwa beendeele antoomwe ambunga ya Jehova. Banji bakalongela kumasena kubulide basikumwaya. Bamwi bakatalika kutola lubazu mumilimo iimbi iisumpula mulimo wa Bwami, mbuli kulongela kumasena naa kumbungano nkobabelesya mwaambo wakunze aacisi. Banji basola kutola lubazu mucibeela cimwi cabukambausi cipya alimwi ncobatakazyi kabotu. Alimwi bamwi banji bakayungizya mulimo wabo munzila zimbi. Banakristo basyomeka boonse, kubikkilizya abacembeede alimwi abaciswa, balatola lubazu cakusyomeka mukubalika kuya kubuumi—balazumanana mumulimo wa Jehova aboobo balagwasyilizya mukuyubununa Saatani kuti mubeji!—1Kor. 9:24.

Amusyome kuti Jehova ulabona muuya ngomutondezya. (Heb. 6:10) Muuya wanu wakulisungula utupa kuyeeya  Abrahamu a Sara. Naakali amyaka yakuzyalwa yamuma 70, Abrahamu wakalonga kuzwa mumunzi waba Kasidi wa Uri akusololela mukwasyi wakwe kubusena buli kulamfwu ku Kanana, nkwaakali kuyookkala mumatente kwamyaka iili 100 iyakaceede kuti apone munyika. Eelo kaka wakali muuya wakulisungula ngwaakatondezya walo amukaintu wakwe!—Mtl. 11:31; Mil. 7:2, 3

Sena andinywe ooyu ngomuuya ngomutondezya? Nyoonse nomuliyumya cakusyomeka muziindi eezyi zikatazya mucita Jesu ncaakatwaambila kucita. Wakati: “Aboobo kamuya mukayiisye bantu bazisi zyoonse kuti babe basikwiiya, akubabbapatizya muzina lya Taata alya Mwana alya muuya uusalala.”—Mt. 28:19.

Naaba majwi aa Jesu aakuti “kamuya” alatondezya kuti tweelede kweenda, tweelede kubeleka. Eelo kaka cilakkomanisya kubona milimo minji iyakazuzikizyigwa abasikutobela Kristo ibakabeleka cabusungu mumwaka wainda! Tacikatazyi kubona kuti Jehova waulongezya mulimo ooyu wakukambauka makani mabotu aa Bwami kumisyobo yoonse.—Mk. 13:10.

Bantu banji balautambula mulumbe. Mweelwe waatala wabasikumwaya mwaka ooyu wainda wakali 8,340,847, kakuli avaleji yaziiyo izyakali kusololelwa mwezi amwezi yakali 10,115,264. Cakutadooneka, nkalaki yakujulu ileenda, alimwi andinywe mweendela antoomwe anjiyo! Amuzumanane kubeleka mulimo mubotu muciindi cisyoonto cisyeede kuti Jehova ajale mulyango uusololela kulufwutuko.

Eelo kaka cileelela kuti lugwalo lwamwaka wa 2017 ndwakuti “Kosyoma Jehova akucita zintu zibotu”! (Int. 37:3) Ciindi nomwaatobela majwi aaya, nomucita zintu zibotu kwiinda mukubelekela Jehova mulimo uusetekene, mutondezya kuti mulamusyoma. Lyoonse amuzyibe kuti tamuli nyolikke. Majwi ngaakaamba Jesu lyoonse  anooli aamasimpe, wakati: “Amubone! Ndilaandinywe mazuba oonse mane kusikila kumamanino aabweende bwazintu.”—Mt. 28:20.

Amusyome kuti Jehova uyoozumanana lyoonse kumulongezya akaambo kamulimo ngomubeleka cakusyomeka. Tacikwe makani naa mulimo ngomubeleka musyoonto naa mupati, iciyandika kapati kuli Jehova ncakuti mulabeleka kusikila mpomugolela alimwi mulacita oobo kuzwa ansi amoyo. Zipego zili boobu zyoonse zimupa kukkomana. (2 Kor. 9:6, 7) Aboobo amuzumanane kuba acilongwe ciyumu a Taata siluyando kwiinda mumupailo, kubala Jwi lya Leza, kujanika kumiswaangano ya Bunakristo alimwi akutola lubazu cabusungu mumulimo wakukambauka.

Kusikila “kaindi kaniini” aaka nkapedwe Diabulosi kakamane, muzangi ooyu mubi ukanzide kubelesya nzila iili yoonse iikonzyeka kutegwa atunyonganye akuleka kusyomeka kuli Jehova. (Ciy. 12:12) Amuzumanane kuba acilongwe ciyumu a Jehova, mpoonya Diabulosi uyakwaalilwa mukusoleka kwakwe kuli koonse kwakuti atunyonganye. (Int. 16:8) Amuzyibe kuti tulamuyanda kapati alimwi tulalumba kugwasya nkomucita mukubeleka milimo iitola ambele ziyandika zya Bwami mumazuba aano aamamanino.

Tobanyoko,

Kabunga Keendelezya ka Bakamboni ba Jehova