MU MAY 7 a 8, 2016, bantu bakali kulimvwisya kukkomana kapati muŋanda mobasikila beenzu kumaofesi mapati ku 25 Columbia Heights, Brooklyn, New York. Nokuba kuti beenzu ibaswaya kuti beendeende tiibakali kuzumizyigwa mu Mujibelo amu Nsondo, aciindi eeci bantu ibakkala munsi-munsi aa Bbeteli bakatambwa kuti bazikweebelele zintu zyakaindi nzyotujisi kujatikizya Bbaibbele.

Mulimo wakutamba bantu wakapa bumboni bubotu kubantu bakkala afwaafwi alimwi wakali kukatalusya kumuuya kuli baabo ibakatola lubazu. Cakali kukulwaizya kapati kumvwa majwi aakulwaizya ngobakali kwaamba bantu mbotwali kukkala limwi munsi-munsi kwaciindi cilamfwu.

 Mwaalumi umwi wakaamba kuti: “Ndakkala mumaanda aindene-indene mucilawo eeci [cilawo icili afwaafwi a Bbeteli] kuzwa mumwaka wa 1960, muli basimukoboma bali kabotu kapati. Tuyoomuzimba ncobeni, alimwi tiitwali kuyanda pe kuti muzwe mucilawo omuno.”

Mukaintu umwi wakaamba kuti: “Busena oobuno nobwatakasumpuka pe nomwatalindinywe. Tulalumba kapati kuti mwali basimukoboma kwamyaka yoonse eeyi.”

Bapainiya banji ibakali kukambaukila mucilawo eeci bakali kukkomana kapati ambobakali kubasangalizya akubatambula bantu ibakkala munsi-munsi. Mwaalumi umwi uuli mukabunga kabasikubamba luumuno mucilawo eeci wakailumba kapati mbunga yesu alimwi wakaamba kuzwa ansi amoyo mbwaakabijilwa akaambo kakuti tanaakali kuyoojanika ku Bbeteli nkwaakatambidwe nkaambo kuli nkwaakali kuyakuunka.

Izyakacitika akaambo kabubambe oobu zyakali kukulwaizya ncobeni. Mumazuba obilo, beenzu batali Bakamboni ibali 48 bakasika ikwakali kutondezyegwa makani aakaindi aajatikizya Bbaibbele. Ciindi bantu nobakali kuswaya, kwakali bamukwasyi wa Bbeteli ibali mbobabede ibakalibambilide kutambula beenzu akubandika ambabo.

Ba Sally, imukaintu uujisi myaka iitandila ku 30, bakakkala kwamaminiti aabalilwa ku 30 mubusena oomo bantu mobakali kweebelela makani aakaindi aajatikizya Bbaibbele. Ciindi nobakasika, bapainiya ibakabapede kapepa kakubatamba bakali muŋanda yakutambuda beenzu. Ba Sally bakaamba kuti tiibakazyi kuti ma Bbaibbele akalibikkidwe kuti ibayanda babweze. Bapainiya bakaambila ba Sally kuti bakakkomana kapati kubandika asyaazibwene uucili mwana-mwana iwakali kulemeka Bbaibbele. Ba Sally bakati: “Lilayandika kapati. Bbaibbele nenzila ilikke iikonzya kutugwasya kuzyiba mulumbe wa Leza. Ndibbuku ligwasya mubuumi mazuba aano.”

 Ba Sally bakaamba kuti mbobalimvwa kujatikizya Bbaibbele cakabapa kwiiya mwaambo wa Chilatini a Chigiriki akuti balakukkomanina kapati kusandulula. Balimvwa kuti busanduluzi buluzi bulayandika kutegwa mulumbe utanyonganizyigwi amakanze aamuntu aatali kabotu. Ciindi bapainiya nobakabaambila ba Sally kuti webbusaiti yesu ya jw.org ilijisi makani amabbuku aamba zyamu Bbaibbele aakasandululwa mumyaambo iinda ku 800, bakagambwa kapati akukkomana. Ciindi bacizyi nobakabapanduluda ncobakacita basanduluzi kujatikizya zina lya Jehova, bakagambwa kapati akubuzya kuti: “Nkaambo nzi zina lya Jehova ncolyakagusyigwa mu Bbaibbele?” Nobakali kuunka, ba Sally bakaamba kuti: “Eeci ncecilawo cilikke mondakkala, alimwi muli basimukoboma bali kabotu kapati.”

Buzuba bwakatobela mu Muhulo, mwiiminizi wacikombelo wakabasikila ba John, bamukwasyi wa Bbeteli ibakali kucita bukambausi bwakubuleya kubelesya kakubikkila mabbuku kakukuba afwaafwi a Bbeteli. Wakaambila ba John mbobakakkomana kuswaya Bbeteli nobakatambwa ambocikkomanisya kuti tulakakatila ku Bbaibbele. Nokuba boobo, nobakamana kubandika kwaciindi cisyoonto, wakaile kwaamba kuti: “Tandikkomene pe akaambo ka Bakamboni!” Ba John bakanyongana aboobo bakamubuzya ikaambo ncaakali kulimvwa boobo. Wakati: “Nkaambo nywebo nobantu mulalonga kuzwa mubusena oobuno! AMUKKALE NKWEENA KUNO! Amuule maanda mapati, naa kuyaka kufwumbwa ncomuyanda, pele mutazwi pe okuno. Nywebo nobantu mupa kuti zintu kazyeenda kabotu mubusena oobuno. Tandikkomene pe akaambo kakuti mulazwa okuno!”

Ncobeni mulimo wakutamba bantu alimwi acoolwe cakubona ma Bbaibbele aakabikkidwe zyakapa bumboni bubotu kubantu bamucilawo, alimwi zina lya Leza lyakaambilizyigwa kubantu bakkala munsi-munsi a Bbeteli munzila iitanacitikide.