BASIKULISUNGULA bamucisi mumonya alimwi abakuzisi zimbi bakabeleka canguzu kwamwaka omwe acisela kubambulula akukomezya mayake aamutabi mudolopo lipati lya Bishkek, ku Kyrgyzstan. Pulogilamu yakwaaba mutabi yakacitika mu October 24, 2015, nokwakainda buyo mwezi omwe kuzwa nowakamana kuyakwa. Bantu ibainda ku 3,000 ibakaswaanganina mu Maanda aa Bwami aali 18 alimwi amumasena aambi osanwe bakakkomana kapati kuswiilila kupulogilamu eeyi. Ba Stephen Lett bamu Kabunga Keendelezya mbebakapa makani aakwaaba mutabi aakajisi mutwe uukulwaizya wakuti: “Amubelekele Jehova Camoyo Woonse.” Buzuba bwakatobela kwakacitwa pulogilamu iyakayumya lusyomo lwabasikumwaya banji mucisi.

Mu Mujibelo, May 14, 2016, bantu ibasika ku 6,435 bakajanika nokwakali kwaabwa ofesi yamutabi yakucisi ca  Armenia, maanda aali 6 kuya mujulu aaŋanda iijisi maanda aali 18 kuya mujulu. Ŋanda Yakucitila Miswaangano Mipati alimwi amaanda aakucitila Cikolo Cabakambausi ba Bwami aalo akaabwa. Makani aakali kupegwa lyapulogilamu eeyi akatondezya mbobakatalika asyoonto-syoonto babelesi ba Jehova mucisi ca Armenia. Mulimo wakatalika akati kabana Armenia ibakali kukkala ku United States kumatalikilo amwaanda wamyaka wa 20 kumane mucisi ca Armenia mwini wakatalika akati-kati kamyaka yakuma 1970, ciindi cisi nocakacili kuzulilwa mubweendelezi bwa Soviet Union. Caino-ino, mbunga yakalilembya kumulawo aboobo mutabi wakapangwa. Bunji bwabaabo bakajanika tiibakali kuyeeyela kuti balakonzya kubona kuyaambele kuli boobu kukkomanisya mumilimo ya Leza. Icakali kukkomanisya kapati kujatikizya pulogilamu eeyo cakasika ciindi bantu boonse ibakajanika nobakazuminizya camoyo woonse majwi ngobakaamba ba David Splane bamu Kabunga Keendelezya aakuti baabe maanda aayo mabotu kuli Jehova.