Kwiinda mukulwana milandu yamunkuta alimwi abukkale bukatazya, bakwesu abacizyi Banakristo batondezya kusyomeka kwabo kuli Jehova Leza. Zikozyanyo zyabo zilatukulwaizya toonse kuyuma kapati mulusyomo, akusyoma kuti ‘Jehova uyoomucitila kabotu muntu wakwe uusyomeka.’—Int. 4:3.

Ba Ruth bakakomenena mumukwasyi wa Banakristo pele bakaleka kusungwaala kabacili baniini. Mukuya kwaciindi, bakanjila mucilongwe amwaalumi kumane bakaba amwana musimbi. Bumwi buzuba, mudolopo lya La Plata, ba Ruth bakabona Bakamboni ba Jehova ibakali kubelesya katebulu kakubikkila mabbuku mpoonya bakayeeya kasimpe nkobakaiya kubwana. Cakabakulwaizya kutalika alimwi kuyanzana ambungano akutalika kuyiisya mwanaabo Bbaibbele. Bausyi mwana tiibakali kwiiyanda milimo yabukombi bwaba Ruth aboobo bakaunka kunkuta kutegwa balesye ba Ruth kuyiisya mwanaabo Bbaibbele naa kumutola kumiswaangano yambungano.

Loya waba Ruth wakaamba kuti bazyali boonse bobilo balijisi lwaanguluko lwakwaambila mwanaabo nzyobasyoma mumakani aabukombi, alimwi akuti nkuta taikonzyi kulukazya lwaanguluko oolo ccita kuti kakuli bumboni bwakuti mwana wanyonganizyigwa amakani aayo aabukombi. Bankuta bakapa malailile aakuti bazyali beelede kulemeka lwaanguluko lwamwanaabo kujatikizya makani aabukombi, nokuba kuti wakajisi buyo myaka yakuzyalwa yone aciindi eeco! Nkuta yaapilu yakacisalazya kwaamba kuti mwana wakacili muniini kapati cakuti taakali kukonzya kulisalila mumakani aabukombi alimwi akuti bazyali boonse balijisi lwaanguluko lwakuyiisya mwanaabo makani aabukombi.

Mwana waba Ruth lino ulabala Bbaibbele buzuba abuzuba ciindi camasiku alimwi ulajanika kumiswaangano antoomwe abanyina. Ulangila kumbele ciindi nayooswaya ku Bbeteli ku Buenos Aires.

Mumbungano ya Banakristo bakasimpe, mwaapostolo Paulo wakabona kuti, “ikuti naa cizo cimwi capenga, zizonyina zyoonse zipengela antoomwe ancico.” (1Kor. 12:26) Eeci cakasinizyigwa, ciindi Bakamboni ba Jehova nyika yoonse nobakalimvwa kuusa kapati akaambo kakupenga kwamucizyi Irina Zakharchenko alimwi amucizyi Valida Jabrayilova ku Azerbaijan. Mu February 2015, beendelezi bakabapa mulandu bacizyi aaba wakucita milimo yabukombi iitazumizyidwe. Mubetesi wakababikka muntolongo ciindi nobakali kulindila kubetekwa, alimwi akaambo kakusumpya-sumpya buzuba bwakuti babetekwe, bacizyi aaba bakali kuyanda kukkwanya mwaka kabali muntolongo, mwalo mobakaliyumya kukupenzyegwa kapati alimwi akubula zintu nzyobakali kuyandika.

Ciindi nocakasika cakuti mulandu wabo ubetekwe mu January 2016, mubetesi wakabajanina mulandu bacizyi alimwi akubaambila kuti babbadele, pele akaambo kakubabikka muntolongo kwaciindi cilamfwu kabatanabetekwa, wakaumwaya mulandu wakuti babbadele alimwi wakabazumizya kuti baunke kuŋanda. Ciindi nkuta iitegwa Baku Court of Appeal noyatakakubikkila maano kulomba kwabo akaambo kamilandu njobakali kupegwa, bakacita apilu ku Nkuta Mpati. Kuyungizya waawo, bakatola matongoosi aabo ku UN Human Rights Committee akaambo kakupenzyegwa alimwi akunyangwa lwaanguluko lwakutondezya nzyasyoma muntu mumakani aabukombi.

Kwacecino ciindi, bacizyi aaba bayaabulimvwa kabotu kumacise aabo. Batondezya kulumba kwabo kupati akaambo kamipailo  alimwi amajwi aatondezya kubabikkila maano. Mucizyi Jabrayilova wakalembela ba Kabunga Keendelezya kuti: “Mipailo yanu yakatugwasya kuliyumya mubukkale bukatazya, alimwi ndakalimvwa kugwasyigwa kapati. Tandikalulubi luyando akubikkilwa maano nkwaakatondezya Jehova, alimwi abakwesu abacizyi nyika yoonse.”

Kuzikusika mu July 2016, mfwulumende ya Eritrea yakaanga Bakamboni ba Jehova bali 55 akaambo kalusyomo lwabo. Bakwesu botatwe—ba Paulos Eyassu, ba Isaac Mogos, alimwi aba Negede Teklemariam—bali muntolongo kuzwa mu September 1994, alimwi mfwulumende yaanga abambi bakwesu bali fwuka kwamyaka iili kkumi.

Cintu cikkomanisya cakacitika mu January 2016 ciindi nkuta noyakazumina kubeteka Bakamboni ibakaangwa lya Ciibalusyo ku Asmara mu April 2014. Eeci cakali ciindi cakusaanguna beendelezi nobakababeteka Bakamboni akubapa “mulandu” alimwi akubapa coolwe cakuliiminina. Kweelana ambocakali kulangilwa, bunji bwabakwesu abacizyi ibakali kubetekwa bakapegwa mulandu akaambo kakujanika kumuswaangano “watakazumizyidwe” alimwi bakabbadelesyegwa mpoonya akwaangununwa. Nokuba boobo, ba Saron Gebru, umwi wabacizyi bakapegwa mulandu, bakakaka kubbadela. Aboobo, bakaangwa kwamyezi iili cisambomwe. Mucizyi Gebru wakali kuswaigwa ciindi comwe ansondo alimwi wakaamba kuti wakali kweendelezyegwa kabotu. Walo a Bakamboni bambi ibali 54 ibali muntolongo balalumba kapati akaambo kamipailo minji njobapaililwa ciindi toonse ‘notubayeeya aabo bali muntolongo mbuli kuti twaangidwe limwi ambabo.’—Heb. 13:3.

Mu December 21, 2015, cooko ca Bremen, mucisi ca Germany nkocili kunyika lwaambo, cakapa lwaanguluko kumbunga ya Religious Association of Jehovah’s Witnesses mu Germany kwiinda mbocakabede kaindi kwiinda mukuzumizyigwa amulawo. Nkuta zyaku Germany zyakatola myaka yone kutegwa babweze  ntaamu eeyi. Kutobela ncoyakasala nkuta iitegwa Higher Administrative Court mu Berlin, bunji bwazyooko zili 16 zyamu Germany zyakazumizya mumulawo kupa lwaanguluko kuli Bakamboni ba Jehova lwiitwa kuti mulawo uubazyibya caantangalala kubanamaleya. Nokuba boobo, beendelezi bamucooko ca Bremen bakakaka kubapa lwaanguluko oolu Bakamboni ilubazyiba caantangalala kubanamaleya, akaambo katwaambo twakubeja twakaambwa abasikukazya.

Mu 2015, nkuta iitegwa Germany’s Federal Constitutional Court yakaamba kuti kukaka kwacooko ca Bremen kwakupa lwaanguluko lwiitwa kuti mulawo uubazyibya caantangalala kubanamaleya, cakatyola mulawo walwaanguluko ndobajisi Bakamboni. Eeci ncoyakaamba nkuta eeyi cisinizya kuti mulawo walwaanguluko lwabukombi ukwabilila milimo ya Bakamboni ba Jehova mucooko ca Bremen. Mbungano izili kubusena oobu tazyeelede kupa mutelo alimwi azyalo zyeelede kuba azyoolwe zyoonse nzyozijisi zikombelo zipati-pati zyamu Germany.

Mu March 2013, beendelezi mudolopo lya Osh ku Kyrgyzstan, bakabapa milandu ba Oksana Koriakina abanyina ba Nadezhda Sergienko. Loya wamfwulumende wakabejekezya Bakamboni kuti baunina bantu ciindi nobayiisya Bbaibbele kuli basimukobonyina, alimwi mubetesi wankuta wakabapa mulawo wakuti tabeelede kuzwa mumaanda ciindi nokucilindilwa kuti mulandu ubandikwe munkuta. Mu October 2014, nkuta iyakali kulanga-langa mulandu yakajana kuti bumboni bwakali bwakubeja, milawo tiiyakatobelwa, aboobo bacizyi bakajanwa kuti banyina mulandu. Mu October 2015, ayalo nkuta yaapilu yakazuminizya mbwaakakosolwa makani.

Nokuba boobo, loya wamfwulumende wamudolopo lya Osh wakacita apilu alimwi, pele aciindi eeci ku Nkuta Mpati yaku Kyrgyzstan. Nkuta eeyi yakaamba kuti bacizyi aaba bacijisi mulandu alimwi yakalailila kuti babetekwe alimwi. Ciindi makani naakali kubetekwa mu April 2016, bamaloya baiminina bacizyi aaba bakalomba kuti mulandu umane nkaambo ciindi cibikkidwe amulawo cakuti makani abandikwe munkuta cakaliindide. Mubetesi  kunyina ncaakali kukonzya kucita pele buyo kuumanizya mulandu.

Mumapenzi aabo oonse, bacizyi aaba bakazumanana kuzilanga munzila iili kabotu zintu. Mucizyi Sergienko wakaamba kuti: “Kanji-kanji bantu inga balakalala ikuti naa tiibeendelezyegwa kabotu abamwi, pele mebo ndakalimvwa kuyandwa a Jehova alimwi akubikkilwa maano kwiinda mubakwesu abacizyi—tiitwakali kulimvwa kulendelelwa pe.” Bacizyi aaba bakalibonena lwabo beni kuti Jehova ulazumanana kucizuzikizya cisyomezyo icili mulugwalo lwa Isaya 41:10 lwalo lwaamba kuti: “Utayoowi pe. . . Ncobeni ndinookujatilide ajanza lyangu lyalulyo lyabululami.”

Mu August 9, 2015, bamapulisa bali kkumi bakanjila cakutayeeyelwa mumiswaangano yambungano mudolopo lya Osh, ku Kyrgyzstan. Bakalailila kuti miswaangano eeyi “iitazumizyidwe” iime mpoonya-mpoonya alimwi mane akukonga kuti balabadubula aabo ibakaliko balo ibakali kwiinda ku 40. Bamapulisa bakatola bakwesu bali kkumi kupolisi, kwalo bamapulisa nkobakabatundulula bakwesu bali fwuka akubauma kapati mpoonya akubaleka. Nokwakainda mazuba obilo, bamapulisa bakaanga ba Nurlan Usupbaev, umwi wabakwesu ibakaumwa citaambiki, kumane wakapegwa mulandu wakucita milimo yabukombi iitazumizyidwe amulawo kwiinda mukweendelezya miswaangano.

Ciindi mulandu wamukwesu Usupbaev nowakatolwa kunkuta iitegwa Osh City Court, mubetesi wakajana kuti kwakanyina bumboni kumulandu ngwaakapegwa mukwesu aboobo mulandu wakamanizyigwa. Loya wamfwulumende wakacita apilu kunkuta iitegwa Osh Regional Court, yalo yakaka apilu eeyo, yakaamba kuti Mukwesu Usupbaev tajisi mulandu wakucita milimo yabukombi iitazumizyidwe amulawo nkaambo Bakamboni ba Jehova bakalilembya kumulawo mucisi ca Kyrgyzstan.

Kataleki munyama wakatala, loya ooyu wakacita apilu ku Nkuta Mpati yamucisi ca Kyrgyzstan. Mukwesu Usupbaev wakalemununwa ciindi Nkuta Mpati eeyi noyakaamanizya makani aakwe mu March 2016, ikutondezya kuti nkuta zyaapilu zyakaabeteka kabotu makani aamulandu ooyu alimwi akusinizya kuti Bakamboni  ba Jehova balijisi lwaanguluko lwakucita miswaangano yabukombi mu Kyrgyzstan. Mulandu uumbi bakwesu ngobakapa bamapusila baku Osh ucilangwa-langwa munkuta.

Nokuba kuti dipatimenti yaku Russia iilanganya milawo iikwabilila lwaanguluko lwabantu yasolekesya kukazya nzyoicita mfwulumende, mfwulumende ya Russia yazumanana kudyaaminina Bakamboni ba Jehova alimwi amilimo yabo yabukombi. Kusikila lino mfwulumende ya Russia yakaamba kuti mabbuku eesu aali 88 “mabi kapati” alimwi yakalesya webbusaiti ya Bakamboni ba Jehova, ya jw.org. Mu 2015, balupati-pati ibalanganya zintu zinjila mucisi  bakakasya kuti Bbaibbele lya Busanduluzi Bwanyika Mpya litanjili mucisi, alimwi nkuta yaku Vyborg icilanga-langa kuti ibone naa mubwini Bbaibbele eeli “ndibi kapati.” Mu March 2016, ofesi iitegwa Prosecutor General’s Office yakabweza ntaamu akukonga kuti ilajala maofesi aa Bakamboni ba Jehova mu Solnechnoye mudolopo lya St. Petersburg, akaambo kakuyeeyelwa kuti nkokwakali kucitilwa “milimo mibi kapati.”

Nokuba kuti mfwulumende yali kukulwaizya bantu kulwana Bakamboni ba Jehova, kuli makani mabotu. Mu October 2015, loya wamfwulumende wakaamba kuti mbunga iitegwa Local Religious Organization (LRO) iili kulamfwu amakkilomita aali 2,100 kujwe lya Moscow mudolopo lya Tyumen, yeelede kujalwa. Nokuba kuti kwakali bumboni bwakuti bamapulisa bakajisi bumboni bwakubeja kulwana Bakamboni, nkuta iitegwa Tyumen Regional Court yakaamba kuti mbunga ya LRO yaku Tyumen yakalijisi mulandu. Nokuba boobo, mu April 15, 2016, nkuta iitegwa Supreme Court of the Russian Federation, yakakaka kusala nkoyakacitide nkuta nsyoonto, akwaamba kuti “kwakanyina twaambo itwakali kukonzya kupa kuti ijalwe mbunga ya LRO ya Bakamboni ba Jehova mudolopo lya Tyumen.” Ciindi mubetesi mupati naakabala mbowakakosolwa mulandu, bakwesu abacizyi bali 60 ibakali munkuta bakanyamuka akukambilila kapati.

 Bantu ba Jehova mu Russia balikanzide kuzumanana kumukomba kunyina makani ‘acilwanyo cili coonse icipangilwa kulwana mbabo.’—Is. 54:17.

Mumyaka misyoonto iyainda, bana ba Bakamboni ku Rwanda bali kutandwa muzikolo akaambo kakukaka kutola lubazu muzintu zijatikizya bukombi naa milimo iitondezya kuyandisya cisi. Kutegwa bamane penzi eeli, mu December 14, 2015, mfwulumende yakabikka mulawo wakumana lusalululo lwabukombi muzikolo. Mulawo ooyu wakali kwaamba kuti zikolo zyeelede kulemeka lwaanguluko lwakukomba lwabana bacikolo.

Mu June 9, 2016, cibeela ca jw.org citegwa Newsroom cakajisi cibalo icakajisi mutwe wakuti “Rwanda Acts to Counter Religious Discrimination in Schools.” Cikkomanisya ncakuti, muteende wa Intaneti uuzyibidwe kapati mu Rwanda wakacibikkilizya cibalo eeci. Webbusaiti yamuteende ooyu cakufwambaana yakaba abantu bakaubala muteende ibainda ku 3,000, alimwi bunji bwabantu ibakaubala bakaamba zintu zibotu kujatikizya ntaamu njoyakabweza mfwulumende. Bakamboni ku Rwanda balalumba kapati akaambo kamulawo uuzumizya bana babo kwiiya kakunyina lusalululo lwabukombi.

Kwamyaka iinda ku 60 yainda, Bakamboni basankwa ku South Korea ibajisi myaka iili akati ka 19 alimwi a 35 bakali kusinikizyigwa kunjila mulimo wabusikalumamba. Mfwulumende ya South Korea tailubikkili maano lwaanguluko lwakukaka mulimo wabusikalumamba kweelana amanjezyeezya alimwi taipi mulimo uumbi kunze aamulimo wabusikalumamba. Mubukkale bumwi, Bakamboni bamukwasyi omwe—basyaanyinakulu, bausyi, amwana—bakali kuzumina buyo kwaangwa kuntolongo ciindi nobakaambilwa kunjila mulimo wabusikalumamba.

Nkuta iitegwa Constitutional Court yakaamba ziindi zyobilo kuti mulawo uutegwa Military Service Law ulizumizyidwe acisi,  pele nkuta zisyoonto-syoonto alimwi abamaalumi basubulwa kweelana amulawo ooyu makani aabo alimwi bacaatola kunkuta iitegwa Constitutional Court. Aboobo, mu July 9, 2015, Nkuta eeyi yakamvwa twaambo ntobakapa basikukaka kunjila mulimo wabusikalumamba kweelana amanjezyeezya. Mukwesu Min-hwan Kim, iwakakkala myezi iili 18 muntolongo akaambo kakuti manjezyeezya aakwe tanaakamuzumizya kuzumina kwiiya mulimo wabusikalumamba, wakapandulula kuti: “Lyoonse ndalikusubulwa muntolongo mpoonya akwaangununwa. Pele ndisyoma kuti bamwi batazumizyigwi amanjezyeezya aabo kunjila mulimo wabusikalumamba tabanoosubulwi. Ikuti naa bazumizyigwa kubeleka mulimo uumbi, balakonzya kugwasyilizya mucilawo.” Nkuta iitegwa Constitutional Court iyakwaambilizya ino-ino mboiyakwaakosola makani aaya.

Mukwesu Hemdemov, uujisi myaka iili 53, ulikwete alimwi ulijisi bana basankwa bone. Mwaalumi musungu kumuuya alimwi ulalemekwa kapati abantu bamucilawo mwakkala. Mu May 2015, nkuta yakamwaanga kwamyaka yone muntolongo kabeleka milimo iiminya akaambo kakucita miswaangano yabukombi “iitazumizyidwe” aŋanda yakwe. Ulaangidwe mucilabba cakupenzyezya camudolopo lya Seydi, mwalo mwaapengela kubuzyigwa-buzyigwa alimwi akuumwa citaambiki abeendelezi. Nokuba boobo, wazumanana kusyomeka kuli Jehova Leza amukwasyi wakwe. Mukaintu wamukwesu Hemdemov wazina lya Gulzira, ulamuswaya ciindi aciindi kutegwa amuyumye-yumye.

Mbotuyaabubona bantu ba Jehova kabazumanana kutondezya kusyomeka kwabo ciindi nobasunkwa, tulabapailila. Zikozyanyo zyabo zibotu zitupa kuyumya lusyomo lwesu kuli Leza, katusinizyide kujatikizya cisyomezyo cijanika mulugwalo lwa Intembauzyo 37:28 ilwaamba kuti: “Takabalekelezyi pe bantu bakwe basyomeka.”