Cilawo cibelesya myaambo yakunze aacisi ku Germany ciyaabukomena akaambo kamweelwe mupati wabazangalisi alimwi abamuzwakule ibakanjila mucisi eeci. Mumyezi iili fwuka yainda, tubunga alimwi atubunga tutanasitikila itubelesya myaambo yakunze aacisi itusika ku 229 twakatalisyigwa. Basikumwaya babalilwa ku 800 bali kuzikolo ziyiisya myaambo izili 30 kuti bakaiye myaambo iili 13.

Bakwesu balakambauka kuli bamuzwakule kuzilabba zyabo. Kwiinda mukubelesya twakubikkila mabbuku twakukuba mumasena aayinda ku 200, bakwesu bakamwaya mabbuku aabalilwa ku 640,000.

 Kabunga Keendelezya kakazumizya bubambe bwaalubazu bwakukambauka kuzwa mu May kusikila mu July 2016. Basikumwaya babelesya mwaambo waci Arabic ibabalilwa ku 700 ibakazwa muzisi zili ciloba bakaunka kumasena aali kkumi aaku Austria alimwi aaku Germany kuyookambaukila bantu banji baambaula mwaambo waci Arabic ibakkala kumasena aaya.

Basikumwaya ibali 50 bamumbungano ya Faber’s Road Kriol ku Belize kanji-kanji balakambauka mucilawo cabo kabeenda amaulu. Bakwesu banji mbacete, pele balasolekesya kutondezya muuya wabwaabi. Kwamyaka iili mboibede yainda, bakwesu bakatalika kudobbelela makkoini ngobakali kujana mumigwagwa ciindi nobakali kukambauka kuŋanda aŋanda. Kuzwa ciindi nobakatalika kudobbelela, kumamanino aamwaka amwaka balaswaangana antoomwe kutegwa baasanzye, alimwi akwaabala makkoini ngobakadobbelela.

Nokuba kuti bunji bwamakkoini ngamweelwe musyoonto kapati, mwaka amwaka bakali kudobbelela makkoini aabalilwa kumweelwe wa $225 (U.S.). Bakwesu balabelesya cisela camali aaya kubbadelela ziyandika zya Ŋanda ya Bwami, mpoonya cisela cimwi camali aaya, balaatuma kugwasyilizya mulimo wanyika yoonse.

Cintu cimwi cikkomanisya kapati mumakani aakaindi aajatikizya mbunga yesu mucisi ca Burundi cakacitika mu March 5, 2016, ciindi mukwesu Anthony Griffin mwiiminizi wakumaofesi mapati naakaswaya mutabi. Kutegwa mbungano zyoonse mucisi ziswiilile kupulogilamu eeyi yoonse yaalubazu, bakabelesya ŋanda yasikapepele mpati yamfwulumende. Bantu ibakaswiilila bayeeyelwa kuti bakasika kumweelwe uubalilwa ku 4 miliyoni!

 Kubelesya ŋanda yasikapepele kwakapa bumboni bupati, alimwi bantu banji bakailumbaizya pulogilamu eeyi. Umwi wabaabo ibakali kumincini wakaamba kuti: “Mweelede kunoocita mapulogilamu manji aamusyobo ooyu!” Alimwi umwi uubelekela kuŋanda yasikapepele wakalemba kuti: “Ndimukulwaizya kuti muzumanane [kuba amapulogilamu aali boobu], alo cakutadooneka aakonzya kufwutula bantu banji.” Mumabbaasi alimwi amumatakisi manji bantu bakali kuswiilila kupulogilamu eeyi muwailesi aabo.

Kakuceede buyo buzuba bomwe kuti buzuba bwa Ciibalusyo busike mu 2016, bakwesu mukabunga kasyoonto ku Nepal bakatyompwa kapati nobakazyiba kuti kuyakuba zisobano zyanyimbo acikolo icali munsi-munsi aaŋanda njobakabbadelela kuti bacitile Ciibalusyo.

Zisobano izili boobu inga zilasabila kapati. Ciindi bakwesu nobakali kusalazya ŋanda yakucitila Ciibalusyo mafwumofwumo, muntu wakali kweendelezya cisobano eeco wakabaambila kuti: “Kunyina ncomutiimvwe ccita buyo nyimbo zyesu.”

Cisobano eeci cakatalika masyikati, alimwi cakali kusabila mbubonya mbocakali kuyeeyelwa. Nokuba kuti bakwesu bakabelesya sipika mpati kwiinda njobakali kuyanda kubelesya kusaanguna, tiibakali kukonzya kumvwa naaba majwi aakusola maikkulofooni. Bakwesu bakacimwa kapati pele bakapaila camoyo woonse kujatikizya makani aaya. Mpoonya kakuceede maminiti aali 30 kuti Ciibalusyo citalike, ciindi bakwesu banji nobakali kusika, nyimbo zyakaleka kulila cakutayeeyela. Kwakazikucitika nkondo kucisobano akati kabantu ibakali kunywa bukoko , mpoonya bamapulisa bakacilesya cisobano. Bakwesu bakacikonzya kucita Ciibalusyo mubusena buumwine kapati, bwaluumuno, alimwi acabulemu.

Ba Giuseppe mbapainiya baciindi coonse ku Italy. Babelekela aŋanda yabo kukkampani iilanga-langa zya Intaneti. Mwaka wamana mu May bakajanika kumuswaangano antoomwe ababelesinyina babalilwa ku 70 kutegwa babandike nzila zipya zikonzya kubelesyegwa mukkampani. Mupati-pati wakkampani wakaamba kuti kutegwa kkampani yabo icite ncoiyanda kucita, yeelede kwiiya mawebbusaiti aamwi. Kumane wakatondezya cikozyanyo cawebbusaiti imwi asikkilini. Ba Giuseppe bakagambwa kubona home page ya webbusaiti ya jw.org asikkilini. Mupati-pati wakkampani wakaamba kuti: “Eeyi newebbusaiti iinda mawebbusaiti woonse munyika! Mpoonya wakatalika kulanga-langa mboipangidwe webbusaiti ya jw.org. Wakaamba majwi mabotu kujatikizya mboitakatazyi kujana zintu nzyoyandaula alimwi azifwanikiso zikwelelezya.

 Ba Giuseppe bakaamba kuti: “Beenzuma bakagambwa kubona myaambo minji njoijisi webbusaiti. Kumamanino aamuswaangano, uutulanga amulimo wakaambila bantu alimwi amupati-pati wakkampani kuti: ‘Ba Giuseppe mbaa Kamboni ba Jehova.’ Aboobo, mupati-pati wakkampani wakandaambila kuti: ‘Mbunga yanu yeelede kulumbaizyigwa. Mwakabamba webbusaiti njoikonzya kulombozya kkampani, naa mbunga iili yoonse munyika. Kweelede kuti kuli kubeleka canguzu kutegwa lyoonse kaijisi zintu ziyandika, kaitakatazyi kubelesya alimwi akubikkila maano kujatikizya twaambo amakani aajanika mpawo.’ Ndakalisenda akaambo kakulumbaizyigwa kapati kucintu ncondatakacita. Pele ndakakkomana kapati kuti bumboni bwakapegwa kubantu banji ibatakazyi cili coonse kujatikizya Bakamboni ba Jehova. Lino ndilabandika lyoonse ababelesima bamwi alimwi buya ndakatalisya ziiyo zya Bbaibbele zyotatwe.” Kukkampani nkobabeleka ba Giuseppe bazumanana “kwiiya” kujatikizya webbusaiti ya jw.org, mpoonya ba Giuseppe bazumanana kubandika makani aamu Bbaibbele ababelesinyina.

Jorge, mukubusi uukkala ku Argentina. Kumatalikilo aamwaka wa 2010, Jorge wakamvwa makani mabotu aamu Bbaibbele ciindi cakusaanguna kuli sicikolonyina. Mpoonya wakatalika kwiiya Bbaibbele kubelesya bbuku lyakuti Ino Ncinzi Cini Bbaibbele Ncoliyiisya? Aciindi eeci, wakali kuuma bbola. Wakazwidilila mucisobano eeci, mpoonya wakeelela kuti akaume bbola kukkilaabbu mpati. Mu April 2014, wakapegwa coolwe cakali kusunka lusyomo lwakwe cakuti akaume bbola mutiimu imwi yaku Germany. Wakaukkomanina muzeezo wakuba sikuuma bbola uucibwene kucisi cimbi, aboobo wakacizumina coolwe eeci. Kakuceede mazuba masyoonto aakuti aunke ku Europe, bakkoocci bakwe bakamwaambila kuti: “Uli Kamboni wa Jehova, tee kayi? Utanyonyooni buumi bwako  kuunka kunze aacisi. Nondakacili mukubusi, andime ndakali Kamboni. Ndakatambwa kusangana tiimu imwi yabbola mucisi cimwi caku Asia. Bakandisyomezya zintu zinji, alimwi zyoonse nzyobakandisyomezya zyakandikwelelezya. Ndakaunka ookuya amukwasyi wangu, pele twakapiluka katutyompedwe kapati.” Jorge wakaamba kuti: “Majwi aabo akandinjila kapati, aboobo ndakasala kuti nditaunki ku Europe. Mu 2015, ndakaba sikumwaya wamakani mabotu alimwi ndakabbapatizyigwa.”

Mu September 2015, muswaangano wacooko iwakajisi mutwe wakuti “Amumwiiye Jesu!” wakacitwa mu Kampala, ku Uganda. Icakabakkomanisya kapati baswiilizi, nkumwaigwa kwa Bbaibbele lya Busanduluzi Bwanyika Mpya mumwaambo waci Luganda amukwesu wamu Kabunga Keendelezya Mark Sanderson.

Sikwiiya Bbaibbele umwi wakaamba kuti: “Kutambula Bbaibbele eeli libotu kwakandikkomanisya kapati! Aciindi eeco, bantu bakali kulibambila kuswaya kwapaapa. Kutegwa bajane mali, bakali kusambala malozaliyo ‘aalelekedwe’ amuulo wa $30 (U.S.). Bantu bakali kuyanda zileleko, pele banji tiibakajisi mali. Kulubazu lumwi, mebo ndakajana cilongezyo cini-cini kakunyina kubbadela. Jehova wakabapa boonse ibakajanika kumuswaangano wacooko, mpoonya umwi aumwi wakalaangulukide kusanga kuzwa ansi aamoyo. Abuzuba, nondibala Jwi lya Jehova mumwaambo wangu alimwi akumuzyiba kabotu, ndilimvwa kulelekwa kapati. Ndilamulumba Jehova akaambo kakundipa kkopi lya Bbaibbele.”

Mukusola kusampaula webbusaiti ya www.pr418.com, basololi bazikombelo bamwi mucooko cimwi caku Congo (Kinshasa) bakali kuyiisya batobeli babo kuti mabbuku aa  Bakamboni ba Jehova asimbilwa kubusena bwamyuuya. Kutegwa basumpule kusampaula ooko, bakaamba mabala aakuti “www,” kuti aleendelana anamba ya 666 iijanika mubbuku lya Ciyubunuzyo. (Ciy. 13:18) Akaambo kaceeci, basikwiiya Bbaibbele bamwi bakakaka kwiiya.

Nobakamana kwaapailila makani aaya, bapainiya banabukwetene bakatamba basikwiiya Bbaibbele babo abamakaintu babo kuŋanda yabo. Mikwasyi yabanabukwetene yotatwe yakazumina kuunka, aboobo nobakamana kulya, Bakamboni banabukwetene bakabatondezya vidiyo yakuti Jehovah’s Witnesses—Organized to Share the Good News. Basikwiiya babo ncobakabona cakagusya mizeezo yakubeja njobakamvwide kujatikizya mabbuku eesu nkwaasimbilwa. Nsondo yakatobela, mulumi waumwi wabasikwiiya Bbaibbele aaba, wakasinikizya Bakamboni banabukwetene kuti bakuzumine kusanga kwakwe kwamali aasika ku $100 (U.S.) kumulimo wanyika yoonse, nokuba kuti walo tanaakaningatalika kwiiya.

Nokuba kuti bakwesu ibakkala kubusena bwakulamfwu ku Papua New Guinea tabakonzyi kuunka a Intaneti, balayandisya kwiiya nyimbo zya Bwami zipya. Aboobo mbungano iitegwa Mundip ilatuma mukwesu kudolopo lili afwaafwi, musinzo iweendwa amaulu kwamawoola obilo alimwi akukkwela bbaasi kwamawoola obilo. Asika okuya, ulaunka a Intaneti akukkopolola majwi aanyimbo zipya mubbuku lyakulembela mpoonya akupiluka kuŋanda, kwalo nkwalemba majwi aanyimbo abboodi ku Ŋanda ya Bwami kutegwa boonse babone. Mpoonya basimbungano balakkopolola nyimbo zipya kutegwa kababelesya kumiswaangano. Masimpe balakkomana kwiimbila antoomwe ambungano zili munyika yoonse kacili cibeela cabukombi bwabo kuli Jehova.