KUZWA ciindi noyakatalika mu 2014, pulogilamu yasikapepele yaa Intaneti iitegwa JW Broadcasting yabakulwaizya kapati alimwi akubakatalusya kumuuya bantu banji ibayeebelela nyika yoonse. Pulogilamu yasikapepele eeyi yaa Intaneti ilajanika mumyaambo iinda ku 90. Mucikozyanyo, mapulogilamu aajanika muli sikapepele ooyu lino alasandululwa mumwaambo waci Ewe, Ga, alimwi aci Twi (kweelana ambokutondezyedwe), alakkomaninwa abasikumwaya bainda ku 130,000 mucisi ca Benin, Côte d’Ivoire, Ghana, alimwi a Togo. *

Ba Agatha, imukaintu wamulangizi wabbazu ku Ghana, bakaamba kuti: “Ciindi nondiswiilila kuli bamu Kabunga Keendelezya alimwi abagwasyilizi babo, ndilimvwa mbuli  kuti Jehova ubandika aandime muŋanda yangu. Ikuti pulogilamu eeyi noyataliko, ino mbuti mbondali kukonzya kuba acoolwe cili boobu ndemuntu-muntu buyo nendikkala mubusena butako ampuwo? Yatugwasya kapati kuswena kubakwesu alimwi abacizyi nyika yoonse.”

Lipooti iizwa ku Zambia yakaamba kuti: “Nokuba kuti tacili cuuba-uba, basikumwaya mumbungano zinji balasolekesya kapati kujana lugwasyo kupulogilamu ya JW Broadcasting. Mucikozyanyo, mbungano ya Misako yalo iili abusena bulampa makkilomita aali 32 kuzwa mudolopo lili afwaafwi alimwi iili mubusena mobalima ibuzingulukidwe atulonga tukunka maanzi ciindi camainza.” Ba Simon, mukutausi iwakaboola kumbungano eeyi kubelekela kubusena kubulide, bakaamba kuti: “Mwezi amwezi muntu umwi uuzwa kumbungano uleenda kwamawoola aatandila kuli obilo kuunka kumugwagwa kutegwa akakkwele mootokala kuunka kudolopo kwalo bakwesu nkobakonzya kumukkopela mapulogilamu aaya a Intaneti. Mudaala umwi uujisi myaka iili 70 abana bakwe basankwa bobilo tiibakaningajanikide kumiswaangano ya Bakamboni ba Jehova, pele mudaala ooyu wakakkomana kubona kuti mavidiyo alakonzya kweebelelwa lyamiswaangano nomuba muminzi. Mudaala ooyu wakaamba kuti: ‘Eeyi nenzila yeelede yakwiiya kujatikizya Leza.’”

Lugwalo lwakulumba kuzwa ku Russia lwakaamba kuti: “Twali kuyeebelela pulogilamu ya JW Broadcasting kwamwaka alimwi tulikkomene kuba acoolwe cili boobu. Noyakazwa broadcast yakusaanguna, mpoonya-mpoonya twakalimvwa kukamantana abunyina bwanyika yoonse! Cakali kukkomanisya kapati! Tulimvwa kuti tuli mukwasyi omwe mupati! Twakakkomana kapati kubona bakwesu bayandwa bamu Kabunga Keendelezya. Balasolekesya kapati kutupa cakulya cakumuuya aciindi ceelede, alimwi tulakonzya kucijana toonse. Lyoonse inga tulalangila ku broadcast imwi aimwi. Mane buya tulakkomana  kapati ikwiitwa azina lyakuti Bakamboni ba Jehova. Eelo kaka tulamulumba kapati bakwesu! Tulamulumba kapati Jehova a Kristo akaambo kamilimo yabo yoonse mibotu. Ilatuyumya-yumya alimwi akutukatalusya!”

Ba Horst aba Helga, banabukwetene baciswa-ciswa ibacembeede baku Germany, bakalemba kuti: “Pulogilamu ya JW Broadcasting ililibedelede. Tulayumizyigwa, ikapati azyakuluula zyabakwesu abacizyi balema. Zikozyanyo zyabo zilatukulwaizya kubeleka kusikila mpotugolela nokuba kuti tulaciswa-ciswa. Kubona mukwesu uulebukide maulu mbwabeleka kali mwaalu, twakaiya kuti toonse tulakonzya kupa Jehova cintu cimwi ciyandika kapati. Ciindi notubona zikozyanyo zibotu zyabakwesu abacizyi zili boobu, citupa kumulumba Jehova akumulomba kuti abalongezye kapati.”

Kodi waku England, wakaamba kuti: “Ndamulumba kapati akaambo kaciindi alimwi akusolekesya nkomucita kupanga webbusaiti ya jw.org, pulogilamu ya JW Broadcasting, alimwi atumavidiyo twa Caleb a Sophia. Ndamulumba akaambo kakupa kuti cuube-ube kulimvwisya Bbaibbele. Ndakabbapatizyigwa ciindi nondakajisi myaka iili lusele. Ndaakukomena ndiyakulisungula kubeleka mulimo wakuyaka Maanda aa Bwami! Alimwi ndiyanda kuyakubelekela ku Bbeteli. Lino ndijisi myaka iili fwuka, aboobo, ino-ino ndiyakukkwanya myaka iiyandika kutegwa ndeelele.”

Arabella uujisi myaka iili lusele waku England wakalemba kuti: “Ndamulumba akaambo kamavidiyo alimwi acibeela cazyakucita. Cilandigwasya kapati kumuzyiba kabotu Jehova. Cibeela cakuti zyakucita icili a jw.org candigwasya kwiiya Jehova kumwi kandikkomene. Mulicizyi kupanga nyimbo nzyobakonzya kuyeeya boonse. Tuvidiyo twa Caleb a Sophia atwalo twandigwasya. Ndamulumba kapati akaambo kakubeleka canguzu.