Cibalo 4

Ikubuka Akuwa kwa Cikozyanyo Cipati Kapati

1. Nkaambo nzi ncotweelede kubikkila maanu kucintu cakacitika nokwakainda myaka iili kkumi kuzwa ciindi Nebukadinezara naakatola Daniele abamwi mubwaange?

KWAINDA myaka iili kkumi kuzwa ciindi Mwami Nebukadinezara naakaleta Daniele alimwi “abapati bacisi” bamu Juda kubuzike mu Babuloni. (2 Bami 24:15) Imukubusi Daniele ubelekela munkuta yamwami ciindi nokwaba ciimo cibikka buumi bwakwe muntenda. Nkaambo nzi ncotweelede kucibikkila maanu eci? Nkaambo kakuti inzila mbuli mbwagwasilizya Jehova Leza mumakani aya tayifwutuli buyo Daniele abamwi pele ilatutondezya ambuli mbwaakali kuya buccililana imasi aayendelezya nyika aambidwe mu businsimi bwa Bbaibbele kusikila kuciindi cesu.

IBWAMI BWABAA PENZI LIKATAZYA

2. Ino ndilili Nebukadinezara naakalota ciloto cabusinsimi cakusaanguna?

² Imusinsimi Daniele wakalemba kuti: “Mumwaka wabili wabwami bwa-Nebukadinezara, Nebukadinezara wakalota ziloto, nkabela moyo wakwe wakapenga, waba acilabila.” (Daniele 2:1) Iwakalota ngu Nebukadinezara, imwami wa Bwami bwa Babuloni. Wakaba mwami wanyika yoonse mu 607 B.C.E. ciindi Jehova Leza naakamuzumizya kuti anyonyoone Jerusalemu atempele lyayo. Mumwaka wabili wabulelo bwa Nebukadinezara kali muleli wanyika yoonse (606/605 B.C.E.) Leza wakamutumina ciloto ciyoosya.

3. Mbaani bakajanika kuti tiibakali kukonzya kupandulula ciloto camwami, alimwi ncinzi ncaakacita Nebukadinezara?

³ Eci ciloto cakamutyompya kapati Nebukadinezara cakuti wakabaa cilabila. Wakali kuyandisya kuziba ncocakali kwiiminina. Pele oyu mwami mupati wakaciluba ciloto cakwe!  Aboobo wakayita basondi bamu Babuloni, bacape alimwi abaŋanga elyo wakalailila kuti bamulwiide ciloto akucipandulula. Bakaalilwa kucita boobo. Ikwaalilwa kwabo kwakamunyemya kapati Nebukadinezara cakuti wakalailila kuti “basongo boonse ba-Babuloni banyonyoonwe.” Aya malailile akapa kuti musinsimi Daniele abandike ayooyo wakabikkidwe kujaya. Nkaambo nzi? Nkaambo kakuti walo antoomwe abeenzinyina botatwe bana Hebrayo—ba Hananiya, Misayeli alimwi a Azariya—bakali kubalilwa akati kabasongo bamu Babuloni.—Daniele 2:2-14.

DANIELE WAGWASYA

4. (a) Ino Daniele wakaciziba buti ciloto ca Nebukadinezara alimwi abupanduluzi bwancico? (b) Naakali kulumba Jehova Leza, ncinzi ncaakaamba Daniele?

⁴ Naakamana kuziba kaambo Nebukadinezara ncaakalailida cabukali boobo, “Daniele wakainka kumwami kuyookumbila kuti amu[pe] ciindi, apandulwide mwami makani.” Wakazumizigwa. Daniele wakapiluka kuŋanda yakwe elyo walo abeenzinyina botatwe bana Hebrayo bakakomba ikukumbila “luzyalo kuli Leza wakujulu, abagwasye mumakani aya aasisidwe.” Imasiku ngaonya ayo, Jehova wakatondezya Daniele maseseke aaciloto eco mucilengaano. Akaambo kakulumba Daniele wakaamba kuti: “Lilumbwe izina lya-Leza lyoonse mane kukabe kutamani. Ngonguwe uujisi busongo anguzu. Ngonguwe uupindaula ziindi amazuba. Ulagwisya bami, alimwi ulabusya bami. Ulapa basongo busongo bwabo, abaabo bali abucenjezu ngonguwe uubapa luzibo. Ulayubununa makani aasisidwe aakataazya. Ulizi zintu zyoonse zili mumudima; kulinguwe mumuni nkuubede.” Daniele wakatembaula Jehova akaambo kakupegwa maanu aali boobu.—Daniele 2:15-23.

5. (a) Naakaimvwi kunembo lyamwami, mbuti Daniele mbwaakamulumbaizya Jehova? (b) Ino nkaambo nzi bupanduluzi bwa Daniele ncobuyandikila kulindiswe sunu?

⁵ Ibuzuba bwakatobela, Daniele wakaunka kuli Arioki silutwe wabasilumamba walo wakabikkidwe kuti ajaye basongo  bamu Babuloni. Mbwaakazibila buyo kuti Daniele wakali kukonzya kupandulula ciloto, Arioki wakamutola kumwami cakufwambaana. Kakunyina akulilumbaizya mwini, Daniele wakaambila Nebukadinezara kuti: “Nkwali Leza wakujulu uuyubununa makani aasisidwe. Ngonguwe wazibya mwami Nebukadinezara makani aayooba kumamanino aaciindi.” Daniele tanaakali bambilide buyo kwaamba ciyoocitika ku Bwami bwa Babuloni pele wakali libambide akutondezya bukkale bwanyika kuzwa kuciindi ca Nebukadinezara kusikila kuciindi cesu akuya kumbele.—Daniele 2:24-30.

ICILOTO—CAYEEYEGWA

6, 7. Ino nciloto nzi Daniele ncaakalwiida mwami?

⁶ Nebukadinezara wakaswiililisya mbwaakali kuyabupandulula Daniele: “Webo, O mwami, wakabona cikozyano cipati. Eci cikozyano cipati cakali kubalama, alimwi kaciimvwi kumeso aako, aciwa caco kaciyoosya. Cikozyano eco, mutwe waco wakali wangolida imbotu, camba caco amaboko aaco zyakali zyansiliva, cikungu caco azibelo zyaco zyakali zyamukuba, myeendo yaco yakali yabutale, azituta zyaco zyakali zyabutale buvwelene abulongo. Lino wakali kubona mane lumwi kwakakolomonwa ibbwe, kutali amaanza aamuntu, nkabela lyakauma cikozyano azituta zyaco, izyakali zyabutale buvwelene abulongo, lyakazipwayaula. Mpawo butale, bulongo, mukuba, insiliva angolida, zyoonse buyo zyakapwayaulwa, zyakaba mbuli buungu bwakucipolelo ciindi cacilimo. Muuwo wakazipupulula, teekwakasyaala nekaceya. Pele ibbwe ilyakauma cikozyano lyakaba idundu ipati, lyakazuzya nyika yoonse.”—Daniele 2:31-35.

⁷ Wakakondwa kaka Nebukadinezara naakamvwa Daniele kaluula ciloto cakwe! Pele mutabindi! Ibasongo bamu Babuloni tabako kujayigwa ilyalo kuti naa Daniele akonzye kupandulula ciloto. Kalyaambilila mwini alimwi abeenzinyina botatwe bana Hebrayo, Daniele wakaamba kuti: “Nceeco ciloto mbucakabede. Lino tulacipandulula kubusyu bwamwami.”—Daniele 2:36.

 IBWAMI BULAALWAANDAANO LULIBONYA

8. (a) Nguni naa ncinzi ncaakaamba Daniele kuti ncecakali mutwe wangolida? (b) Ino mutwe wangolida wakalibonya lili?

⁸ “Webo, O mwami, uli mwami wabami. Leza wakujulu wakupa bwami, inguzu, bupati abulemu. Kufumbwa nkobakede bantu baansi na banyama bamusokwe na bayuni bakujulu, wabaaba mumaanza aako kuti ubeendelezye boonse. Nduwe mutwe wangolida.” (Daniele 2:37, 38) Aya majwi akali kwaamba Nebukadinezara ciindi Jehova naakamubelesya kunyonyoona Jerusalemu mu 607 B.C.E. Eci cili boobu akaambo kakuti bami bakali kubikkwa mu Jerusalemu bakali kuzwa mumazyalani aa Davida, mwami munanike wa Jehova. Jerusalemu nguwakali munzi mupati wa Juda, ibwami bwa Leza bwacikozyanyo ibwakali kwiiminina bulelo bwa Jehova anyika. Oyu munzi nowakanyonyoonwa mu 607 B.C.E., obu bwami bwa Leza bwacikozyanyo bwakamana. (1 Makani 29:23; 2 Makani 36:17-21) Imasi aayendelezya nyika aakatobelana aakali kwiimininwaa zibeela zyacikozyano zyalubulo akali kukonzya kulela lino kakunyinaa kunyonganizigwaa bwami bwa Leza bwacikozyanyo. Mbwaakali mutwe wangolida, ilubulo lwakali luyandisi nsiku, Nebukadinezara wakalijisi nguzu zyakusaala bwami obo kwiinda mukunyonyoona Jerusalemu.—Amubone “Imwami Silumamba Wayaka Bwami,” apeeji 63.

9. Ncinzi cakali kwiimininwaa mutwe wangolida?

⁹ Nebukadinezara walo wakalela kwamyaka iili 43, wakeendelezya mukowa wabami ibakali kulela mu Bwami bwa Babuloni. Wakali kubikkilizya mukwaakwe Nabonidus alimwi amwanaakwe mupati Evili-Merodaki. Oyo mukowa wabami wakazumanana kulela kwamyaka aimbi iili 43 kusikila kuciindi calufwu lwa Belisazara mwanaa Nabonidus mu 539 B.C.E. (2 Bami 25:27; Daniele 5:30) Aboobo imutwe wangolida wamucikozyanyo camuciloto tiiwakali kwiiminina buyo Nebukadinezara alikke pe, pele wakali kubikkilizya amulongo woonse wabulelo bwa Babuloni.

10. (a) Ino ciloto ca Nebukadinezara cakatondezya buti kuti Bwami bwa Babuloni tabukakkali ciindi cilamfwu? (b) Ino musinsimi Isaya wakasinsima buti kujatikizya sikuzunda Babuloni? (c) Ino muunzila nzi bwami bwa Mediya a Persia mubwatakeelene a Babuloni?

 ¹⁰ Daniele wakaambila Nebukadinezara kuti: “Kusule lyako kuyoobuka bwami bumbi buteelene abwako.” (Daniele 2:39) Ibwami bwakali kwiimininwaa camba alimwi amaboko aansiliva aamucikozyanyo bwakali kuyoobweza busena bwabami bamukowa wa Nebukadinezara. Imyaka iitandila ku 200 musyule, Isaya wakabusinsima bwami obu mane akwaamba zina lyamwami wambubo sikuzunda—Koresi. (Isaya 13:1-17; 21:2-9; 44:24–45:7, 13) Obu bwakali Bwami bwa Mediya a Persia. Nokuba kuti zisi zya Mediya a Persia zyakaleta lusumpuko kapati lwalo lwakateelane aloolo lwa Bwami bwa Babuloni, obu bwami bwa Mediya a Persia bwiimininwaa nsiliva, ilubulo lutali luyandisi mbuli ngolida. Tebwakeelene pe acisi Cakalikweendelezya Nyika ca Babuloni mukuti tiibwakajisi lubazu mukuzunda Juda, ibwami bwa Leza bwacikozyanyo antoomwe amunzi wanguwo mupati iwa Jerusalemu.

11. Ino bami bamukowa wa Nebukadinezara bakamana lili?

¹¹ Nokwakainda myaka iitandila ku 60 kuzwa ciindi naakapandulula ciloto, Daniele wakalibonena mamanino aabami bamukowa wa Nebukadinezara. Daniele wakaliko mubusiku bwamu October 5/6, 539 B.C.E., ciindi mpi zya Mediya a Persia nozyakazunda Babuloni walo wakali kuboneka mbuli kuti takonzyi kuzundwa akujaya Mwami Belisazara. Naakafwa Belisazara, imutwe wangolida wamucikozyanyo camuciloto—Ibwami bwa Babuloni—bwakamana.

IBWAMI BWAANGULULA BANTU BAKALI MUBUZIKE

12. Ino mulawo wakaambwaa Koresi mu 537 B.C.E. wakabagwasya buti baange bama Juda?

¹² Ibwami bwa Mediya a Persia bwakabweza busena bwa Bwami bwa Babuloni akuba anguzu zyabweendelezi bwanyika mu 539 B.C.E. Dariyo mu Medi kajisi myaka yakuzyalwa iili 62 nguwakaba muleli wakusaanguna wamunzi wakazundwa wa Babuloni. (Daniele 5:30, 31) Walo a Koresi bakalela antoomwe  mu Bwami bwa Mediya a Persia kwaciindi cisyoonto. Naakafwa Dariyo, bweendelezi bwa Bwami bwa Persia boonse bwakaba mumaanzaa Koresi. Kuli bama Juda bakali mu Babuloni, ikulela kwa Koresi kwakali kwaamba lwaanguluko kuzwa mubuzike. Mumwaka wa 537 B.C.E., Koresi wakapa mulawo wakali kuzumizya bana Juda ibakali mu Babuloni kuti bapiluke kumunzi wabo akuya kuyakulula Jerusalemu atempele lya Jehova. Nokuba boobo, bwami bwa Leza bwacikozyanyo kunyina nobwakatalisigwa alimwi pe mu Juda alimwi amu Jerusalemu.—2 Makani 36:22, 23; Ezara 1:1-2:2a.

13. Ino camba cansiliva alimwi amaboko aacikozyanyo camuciloto ca Nebukadinezara zyakali kwiiminina nzi?

¹³ Icamba cansiliva alimwi amaboko aamucikozyanyo camuciloto zyakali kwiiminina mulongo wabami bana Persia ikutalikila kuli Koresi Mupati. Imulongo oyo wabami wakazumanana kwamyaka iinda ku 200. Koresi uyeeyelwa kuti wakafwa naakali kunkondo mu 530 B.C.E. Akati kabami batandila ku 12 ibakalela munsi lyakwe acuuno ca Bwami bwa Persia, bobile bakabeendelezya kabotu bantu ba Jehova basalwe. Umwi wabaaba wakali Dariyo Wakusaanguna (muna Persia) alimwi umwi wakali Aritasasta Wakusaanguna.

14, 15. Ino ndugwasyo nzi ndobakapa ba Dariyo Mupati a Aritasasta Wakusaanguna kuli bama Juda?

¹⁴ Dariyo Wakusaanguna wakali watatu mumulongo wabami ba Persia kuzwa kuli Koresi Mupati. Abo bobile bakalela katana walo bakali ba Cambyses Wabili alimwi amwanaakwabo Bardiya (naa oyo wakali kulicengeezya kuti ngwakuciinga cabwami wazina lya Gaumata). Ikusika kuciindi Dariyo Wakusaanguna walo wiitwa akuti Dariyo Mupati naakakkala acuuno cabwami mu 521 B.C.E., imulimo wakuyakulula tempele mu Jerusalemu wakalilesyedwe. Dariyo naakacijana buyo cipepa cakajisi mulawo wa Koresi akati kamapepa aakaindi ku Akimeta tanaakazumizya buyo mulimo kuti uzumanane mu 520 B.C.E., pele wakacita azimbi. Wakapa mali kuzwa muciyobwedo cabwami aakuti kuyakululwe tempele.—Ezara 6:1-12.

¹⁵ Imuleli muna Persia iwakatobela mukugwasilizya kubambululwa  kwabana Juda wakali Aritasasta Wakusaanguna walo wakalya zina lyausyi Ahasuera (Xerxes Wakusaanguna) mu 475 B.C.E. Izina lya Aritasasta limwi lyakali lyakuti Longimanus akaambo kakuti ijanza lyakwe lyakululyo lyakali lilamfwu kwiinda lyakulumwensi. Mumwaka wa 20 wabulelo bwakwe, mu 455 B.C.E. wakatuma sikumukutaukila muna Juda Nehemiya kuti abe mweendelezi wa Juda akuyakulula bwaanda bwa Jerusalemu. Oyo mucito nguwakatondezya kuti zyatalika ‘nsondo zyamyaka izili makumi aali musanu mwaabili’ izyaambidwe kucaandaano ca 9 ca Daniele alimwi akubikka mazuba aakulibonya alimwi akufwa kwa Mesiya naa Kristo Jesu waku Nazareta.—Daniele 9:24-27; Nehemiya 1:1; 2:1-18.

16. Ino Bwami bwa Mediya a Persia bwakamana lili alimwi nguni wakali mwami?

¹⁶ Iwamamanino akati kabami bali cisambomwi ibakatobela Aritasasta Wakusaanguna acuuno cabwami mu Bwami bwa Persia wakali Dariyo Watatu. Ibulelo bwakwe bwakaide kumana aciindi aatayeeyelwi mu 331 B.C.E. ciindi naakazundwaa Alesandro Mupati ku Gaugamela, aafwaafwi aku Nineve yansiku. Ikuzundwa oku kwakamanizya bwami bwakali kweendelezya Nyika bwa Mediya a Persia mbubwenya mbubwakaimininwaa cibeela cansiliva mucikozyanyo camuciloto ca Nebukadinezara. Ibwami bwakali kulangilwa kuboola bwakali sumpukide munzila zimwi pele muli zimwi bwakali kulela. Eci tulaciteelelesya mbotuyabuswiilila bupanduluzi bwa Daniele abumbi bwaciloto ca Nebukadinezara.

IBWAMI BUPATI—PELE BULAANSI

17-19. (a) Ino cikungu alimwi azibelo zyamukuba zyakali kwiiminina bwami nzi, alimwi bulelo bwambubo bwakali bupati buti? (b) Ino Alesandro Watatu wakali ni? (c) Ino mwaambo waba Giliki wakazyooba buti mulaka uubelesyegwa koonse-koonse, alimwi mulimo nzi nguwakeelela kucita?

¹⁷ Daniele wakaambila Nebukadinezara kuti cikungu alimwi azibelo zyacikozyanyo eci cipati zyakali kwiiminina “bwami abumwi bwatatu, bwami bwamukuba [i]buyooendelezya nyika yoonse.” (Daniele 2:32, 39) Obu bwami bwatatu bwakali  kuyootobela bwa Babuloni abwa Mediya a Persia. Mbwaanga mukuba taweelene ansiliva, obu bwami bupya tiibwakali kuyooelana abwa Mediya a Persia mukuti tiibwakali kuyoopegwa coolwe cili mbuli cakwaangulula bantu ba Jehova. Nokuba boobo obu bwami ibuli mbuli bwamukuba bwakali ‘kuyooendelezya nyika yoonse,’ icitondezya kuti bwakali kuyooba bupati kwiinda bwa Babuloni abwa Mediya a Persia. Ino makani azyaciindi atondezya nzi kujatikizya bwami obu bwanguzu?

¹⁸ Mbwaakamanina buyo kukona cuuno cabwami ku Makedoniya mu 336 B.C.E., sikuyandisya bwami Alesandro Watatu kalaamyaka yakuzyalwa iili 20 wakatalika mulimo wakuzunda. Akaambo kakuzwidilila mulumamba lwakwe wakatalika kwiitwa kuti Alesandro Mupati. Naakali kuya buzunda awa awaawa, wakanjila mukati mwini mubwami bwa Persia. Naakazunda Dariyo Watatu munkondo yaku Gaugamela mu 331 B.C.E., Ibwami bwa Persia bwakatalika kuwa elyo Alesandro wakabikka cisi caba Giliki kuti nceceendelezya nyika cipya.

¹⁹ Naakamana kuzunda ku Gaugamela, Alesandro wakazumanana wabweza minzi mipati ya Persia, Babuloni, Susa, Persepolis alimwi a Akimeta. Naakamana kuzunda busena bwakasyeede mu Bwami bwa Persia, wakaya kukuzunda mucisi ca India nkocili kumbo. Iba Giliki bakatalika kweendelezya mumasena aakazundwa. Aboobo, imwaambo waba Giliki alimwi azilengwa zyakasakamina koonse-koonse munyika. Atwaambe, Ibwami bwaba Giliki bwakakomena kwiinda bumwi boonse bwamusyule. Mbubwenya mbuli mbwaakasinsima Daniele, ibwami bwamukuba ‘bwakeendelezya nyika yoonse.’ Icakacitika akaambo kaboobo ncakuti, imwaambo waba Giliki (Koine) wakaba nguubelesyegwa mumasi oonse. Akaambo kakuti twaambo twakali kulondoka twaambwa mumwaambo oyu, oyu mwaambo wakeelela kapati mukulemba Magwalo aa Bunakristo aa Cigiliki alimwi akwaambilizya makani mabotu aa Bwami bwa Leza.

20. Ncinzi cakacitika ku Bwami bwaba Giliki naakafwa Alesandro Mupati?

²⁰ Alesandro Mupati wakapona buyo myaka iili lusele kali  mwami weendelezya nyika. Nokuba kuti wakacili mwana, Alesandro wamyaka yakuzyalwa iili 32 wakaciswa naakamana kupobola akufwa mpoonya-mpoonya mu June 13, 323 B.C.E. Muciindi, bwami bwakwe bupati bwakaandaanizigwa muzibeela zyone, acimwi kaceendelezyegwaa aumwi wabapati babasilumamba bakwe. Aboobo, ikuzwa kubwami bomwe bupati kwakazyooba mami one alo muciindi aakazyoonjila mu Bwami bwa Roma. Icisi ceendelezya nyika camukuba cakazumanana mane kusikila mu 30 B.C.E. ciindi bwami bwamamanino akati kaone—ibwabami bamukowa wa Ptolemy ibakali kulela mu Egepita—nobwakazundwa abana Roma.

IBWAMI BUPWAYAULA AKUKOMAUNA

21. Ino Daniele wakabupandulula buti “bwami bwane”?

²¹ Daniele wakazumanana abupanduluzi bwakwe bwacikozyanyo camuciloto: “Bwami bwane [kuzwa bwa Babuloni, bwa Mediya a Persia alimwi abwaba Giliki] [m]buyumu nta mbuli butale, nkaambo butale bulapwayaula akujaya zintu zyoonse, nkabela obo bwami buyoopwayaula akukomauna ezi zyoonse mbubonya mbuli butale mbobupwayaula.” (Daniele 2:40) Eci cisi ceendelezya nyika cinooli mbuli butale kumakani aanguzu zyakukonzya kupwayaula—iciinda kuyuma kumami aakali kwiimininwa angolida, insiliva naa mukuba. Obu mbubwakabede Bwami bwa Roma.

22. Ino Bwami bwa Roma bwakali buti mbuli bwabutale?

²² Ibwami bwa Roma bwakapwayaula akukomauna Bwami bwaba Giliki akubweza masi aakacaala kubwami bwa Mediya a Persia alimwi a Babuloni. Akaambo kakutatondezya bulemu ku Bwami bwa Leza mbwaakali kwaambilizya Jesu Kristo, bwakamujaya acisamu cakupenzezya mu 33 C.E. Nobwakali kusoleka kuti bukomaune Bunakristo bwini-bwini, ibwami bwa Roma bwakapenzya basikwiiya ba Jesu. Kunze lyaboobo, ibana Roma bakanyonyoona Jerusalemu antoomwe atempele lyayo mu 70 C.E.

23, 24. Kunze lyakwiiminina Bwami bwa Roma, ino myeendo yacikozyanyo iiminina nzi?

²³ Imyeendo yabutale yamucikozyanyo camuciloto ca  Nebukadinezara tiiyakali kwiiminina buyo Bwami bwa Roma pele yakali kutondezyaa ciyoocitika kuli mbubo kumakani aabweendelezi. Amulange majwi aya aalembedwe ku Ciyubunuzyo 17:10: “Nkubali bami bali musanu ababili. Bosanwe bakamana kale, umwi mpacili sunu, umwi tana kusika. Lino asika oyo, uleelede kukala kaindi kaniini.” Ciindi mwaapostolo Johane naakalemba majwi aya wakalaangidwe aba Roma ku Patmo. Imami osanwe aakamanide kale naa masi aayendelezya nyika akali Egepita, Asuri, Babuloni, Mediya a Persia alimwi acisi caba Giliki. Ibwacisambomwi—Bwami bwa Roma—bwakacili kweendelezya. Pele abwalo bwakali munzila yakuwa elyo mwami waciloba wakali kuyoobuka kuzwa mucooko cimwi ca Roma icakazundwa. Ino bwakali kuyooba bwami nzi obo?

²⁴ Kucimwi ciindi, icisi ca Britain cakali kulubazu lwakunyika mu Bwami bwa Roma. Pele ikusika mumwaka wa 1763 bwakazyooba Bwami bwa Britain—icisi ca Britain icakali kweendelezya milonga mipati-pati iili ciloba. Ikusika mu 1776, imasi ngocakali kweendelezya aali 13 aaku Amelika akaanguluka ikutegwa abambe cisi ca United States of America. Nokuba boobo, mumyaka yakatobela Britain a United States bakaba balongwe munkondo amuluumuno. Aboobo, kwakaba lukamantano akati kacisi ca Britain alimwi a Amelika (Anglo-America) elyo bwakaba bwami bwaciloba ibweendelezya nyika bwakaambwa mu businsimi bwa Bbaibbele. Mbubwenya mbuli Bwami bwa Roma, obu bwami bwajanika kuti ‘mbuyumu mbuli butale’ akubaa bweendelezi buli mbuli bwabutale. Aboobo, imyeendo yabutale yamucikozyanyo camuciloto ibikkilizya Bwami bwa Roma alimwi abwa Britain alimwi a Amelika (Anglo-America).

ILUKAMANTANO LUTAJISENI

25. Ncinzi ncaakaamba Daniele kujatikizya zituta a aminwe yacikozyanyo?

²⁵ Mpoonya Daniele wakaambila Nebukadinezara kuti: “Mbuli mbowabona zituta aminwe yazyo, kuti nzezyabulongo bwasikubumba buvwelene abutale, nkokuti obo bwami buyooanzaana, pele bumwi buyumu bwabutale bunooyoocisyeede mulimbubo, mbubonya mbowabona butale buvwelene  abulongo bwamatope. Alimwi minwe yazituta mbuyakali yabutale buvwelene abulongo, nkokuti obo bwami buyooba azipanzi ziyumu zivwelene azipanzi zipwayika buyo. Mbubonya mbowabona butale buvwelene abulongo bwamatope, nkokuti buyooliswanaanya alunyungu lwabantu, pele tabakooyoojatana kabotu, mbubonya mbuli butale mbobutaswanaani abulongo.”—Daniele 2:41-43.

26. Ino bulelo bwiimininwaa zituta aminwe bulibonya lili?

²⁶ Ikutobelana kwamasi aayendelezya nyika ikwiimininwaa zibeela zyaandeene-andeene zyacikozyanyo camuciloto ca Nebukadinezara kwakatalikaa mutwe mane kuyakusika kuzituta. Aboobo, izituta aminwe ‘yabutale buvwelene aabulongo bwamatope’ ziiminina bulelo bwabantu bwamamanino bwalo ibunooliko “kumamanino aaciindi.”—Daniele 12:4.

27. (a) Ino nciimo nzi munyika iciimininwaa zituta aminwe yabutale ibuvwelene aabulongo? (b) Ino minwe iili kkumi yacikozyanyo iiminina nzi?

²⁷ Kumatalikilo aamwaanda wamyaka wa 20, Bwami bwa Britain bwakali kweendelezya cibeela cane camweelwe wabantu munyika. Aambi mami aamu Europe akali kweendelezya tuulunzuma twabantu bambi bali mbobabede. Pele Nkondo Yanyika Yakusaanguna yakapa kuti kube nkamu zyamasi muciindi camami. Noyakamana Nkondo Yanyika Yabili, eci cilengwa cakaya kumbele. Imuzeezo wakuyandisisya cisi mbuwakali kuyabuya kumbele, imweelwe wamasi munyika wakakomena. Iminwe iili kkumi yamucikozyanyo iiminina mami alimwi amfwulumende zyoonse zili boobu iziliko nkaambo mu Bbaibbele zimwi ziindi namba ya 10 yiiminina kuzulila kwanyika.—Amweezyanisye Kulonga 34:28; Matayo 25:1; Ciyubunuzyo 2:10.

28, 29. (a) Ikweelana a Daniele, ino bulongo bwakali kwiiminina nzi? (b) Ncinzi cikonzya kwaambwa kujatikizya kuvwelana kwabutale abulongo?

²⁸ Mbwaanga lino tukkede “kumamanino aaciindi” twasika kumyeendo yacikozyanyo. Imfwulumende zimwi ziimininwaa myeendo alimwi aminwe yacikozyanyo yabutale buvwelene aabulongo zili mbuli zyabutale—nzyakazundo-zundo naa  kudyaaminina. Zimwi zili mbuli bulongo. Munzila nzi? Daniele wakajatikizya bulongo “alunyungu lwabantu.” (Daniele 2:43) Nokuba kuti bulongo bupwaika buyo bwalo mbolubambizidwe lunyungu lwabantu, ibulelo bwabutale bwasinikizigwa kuswiililisya kuzintu nzyobaamba bantu buyo balo ibayanda kuteelelwaa mfwulumende izibeendelezya. (Jobu 10:9) Pele kunyina kuswaangana akati kabulelo obu budyaaminina alimwi abantu buyo—mbubwenya mbokutakwe kuswaangana akati kabutale abulongo. Kuciindi cakunyonyoonwa kwacikozyanyo, masimpe ibweendelezi munyika yoonse tabunookamantene!

²⁹ Sena kukomaunwa kwazituta aminwe kuyoopa kuti cikozyanyo coonse ciwe? Ncinzi ciyoocitika kucikozyanyo?

IMAMANINO AAGAMBYA!

30. Amupandulule mamanino aaciloto ca Nebukadinezara.

³⁰ Amulange mamanino aaciloto. Daniele wakaambila mwami kuti: “Lino wakali kubona mane lumwi kwakakolomonwa ibbwe, kutali amaanza aamuntu, nkabela lyakauma cikozyano azituta zyaco, izyakali zyabutale buvwelene abulongo, lyakazipwayaula. Mpawo butale, bulongo, mukuba, insiliva angolida, zyoonse buyo zyakapwayaulwa, zyakaba mbuli buungu bwakucipolelo ciindi cacilimo. Muuwo wakazipupulula, teekwakasyaala nekaceya. Pele ibbwe ilyakauma cikozyano lyakaba idundu ipati, lyakazuzya nyika yoonse.”—Daniele 2:34, 35.

31, 32. Ncinzi cakasinsimwa kujatikizya cibeela camamanino caciloto ca Nebukadinezara?

³¹ Mukupandulula ceeci, ibusinsimi bulazumanana ategwa: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani. Buyooba mbubonya mbuli ibbwe elyo ndowabona, ilyakakolomonwa kuzwa kucilundu kutali kumaanza aabantu, ilyakapwayaula zyoonse buyo—butale, mukuba, bulongo, insiliva angolida. Leza mupati watondezya  mwami makani aaciza. Ciloto ncakasimpe, akupandulula kwaco nkwalusinizyo.”—Daniele 2:44, 45.

³² Naakabona kuti ciloto cakwe caluulwa alimwi akupandululwa, Nebukadinezara wakaziba kuti alikke Leza wa Daniele ‘ngomupati wabami, sikuyubununa makani aasisidwe.’ Alimwi imwami wakabapa zyuuno zyabweendelezi ba Daniele abeenzinyina botatwe bana Hebrayo. (Daniele 2:46-49) Ino ono ibupanduluzi bwa Daniele ‘bwalusinizyo’ bwiiminina nzi sunu?

‘IDUNDU LYAZUZYA NYIKA YOONSE’

33. Ino “bbwe” lyakakomonwa kuzwa ‘kudundu’ nzi, alimwi ndilili nocakacitika eci alimwi muunzila nzi?

³³ Nocakazulila “ciindi cabamasi” mu October 1914, “Leza wakujulu” wakakkazikizya Bwami bwakujulu kwiinda mukubikka Mwanaakwe munanike Jesu Kristo kuti abe “MWAMI WABAMI, MWEENDELEZI WABEENDELEZI.” * (Luka 21:24; Ciyubunuzyo 12:1-5; 19:16) Aboobo “ibbwe” lya Bwami bwabu Mesiya lyakakomonwa kuzwa ku “dundu” lyabulelo bwa Jehova bwakujulu aansi ikutali kwiinda mumaanzaa muntu, pele kwakacitwa kwiinda munguzu zya Leza. Eyi mfwulumende yakujulu ili mumaanzaa Jesu Kristo walo Leza ngwapede buumi butafwiki. (Ba-Roma 6:9; 1 Timoteo 6:15, 16) Aboobo, obu ‘bwami bwa Mwami Leza abwa Kristo wakwe’—ibulelo bwa Jehova bwakujulu aansi—tabukapegwi kuli umbi muntu pe. Buyooima nji kukabe kutamani.—Ciyubunuzyo 11:15.

34. Ino Bwami bwa Leza bwakazyalwa buti “mumazuba aabaami abo”?

³⁴ Ikuzyalwa kwa Bwami kwakacitika “mumazuba aabaami abo.” (Daniele 2:44) Aba tiibakali buyo bami bakali kwiimininwaa minwe iili kkumi yacikozyanyo pele balabikkilizya abaabo bakali kwiimininwaa zibeela zyabutale, zyamukuba, zyansiliva alimwi azyangolida. Nokuba kuti masi aa Babuloni, Persia, cisi caba Giliki alimwi a Roma akalilekede kale kuba masi aayendelezya nyika, imasena mwaakabede akaciliko mu 1914. Kuciindi eco Bwami bwabana Turkey bwa Ottoman bwakajisi  busena bwabana Babuloni elyo kwakali mfwulumende zyacisi zyakali kubelekela mu Persia (Iran) alimwi akucisi caba Giliki alimwi a Roma amu Italy.

35. Ino ndilili “bbwe” noliyoopwayaula cikozyanyo, alimwi icikozyanyo eci ciyoonyonyoonwa kusikila ali?

³⁵ Ibwami bwa Leza bwakujulu buyoopwayaula cikozyanyo eci kuzituta zyacinco lino-lino. Akaambo kaboobo, imami oonse aaimininwaa ncico ayookomaunwa akwaamanizya. Ee, “kunkondo yabuzuba bupati bwa-Leza Singuzuzyoonse,” elo “bbwe” liyoopwaya cikozyanyo eci cakuti ciyooba lusu aboobo muwo wa Leza uyoocipupulula mbuli bungu bwakucipolelo. (Ciyubunuzyo 16:14, 16) Mpoonya, mbubwenya mbuli bbwe mbulyakakomena akuba mbuli dundu akuzuzya nyika, Bwami bwa Leza buyooba mfwulumende iyoojatikizya “nyika yoonse.”—Daniele 2:35.

36. Nkaambo nzi Bwami bwabu Mesiya ncobunga bwaitilwa kuti nimfwulumende iikkalikide?

³⁶ Nokuba kuti Bwami bwabu Mesiya mbwakujulu, inguzu zyambubo zinooli anyika yesu ikutegwa bukalongezye bantu boonse baanyika ibamvwa. Eyi mfwulumende iikkalikide ‘taikooyoonyonyoonwa abuniini pe’ naa ‘kusiilwa bantu bambi.’ Mukwiindana amami aabantu balela, “buyooima nji kukabe kutamani.” (Daniele 2:44) Amube acoolwe cakuba umwi wabalelwa kusikila kutamani.

Bupanduluzi buyungizidwe

NCINZI NCOMWAIYA?

• Mami nzi aaimininwaa zibeela zyandeene-andeene zyacikozyanyo cipati camuciloto ca Nebukadinezara?

• Ino nciimo nzi camunyika iciimininwaa zituta aminwe yabutale buvwelene aabulongo?

• Ino ndilili nolyakakomonwa “bbwe” alimwi nkuzwa ‘kudundu’ nzi?

• Ino “bbwe” liyoocinyonyoona lili cikozyanyo?

[Mibuzyo yaciiyo]

 [Kabbokesi/Cifwanikiso icili apeeji 63-67]

IMWAMI SILUMAMBA WAYAKA BWAMIA

SIMULYAZINA wa Babuloni antoomwe ampi zyakwe banyonyoona basilumamba baku Egepita iba Farao-Neko ku Karikemisi mucisi ca Aramu. Basikuzundwa bana Egepita batijila kumusanzaa Egepita elyo bana Babuloni babatandila. Pele mulumbe wazwa ku Babuloni wasinikizya mwami sikuzunda kuti aleke kubatandila. Imulumbe ngwakuti usyi, Nabopolassar wafwa. Naamana kulailila bapati babasikalumamba kuti bapilusye baange azintu nzyobabweza, Nebukadinezara wapilukila kumunzi cakufwambaana akuyakukkala acuuno cabwami icakali causyi.

Aboobo Nebukadinezara wakakkala cuuno cabwami mu Babuloni mumwaka wa 624 B.C.E. elyo wakaba muleli wabili wa Bwami bwa Babuloni. Mumyaka iili 43 yabulelo bwakwe, wakazunda masi aakali aa Bwami bwa Asuri akukomezya  bwami bwakwe, wakabweza cisi caba Aramu kunyika alimwi aca Palestine kumbo kusikila kumunyinza wa Egepita.—Amubone maapu.

Mumwaka wane wabulelo bwakwe (620 B.C.E.) Nebukadinezara wakatalika kweendelezya bwami bwa Juda. (2 Bami 24:1) Nokwakainda myaka yotatwe, ikuzanga kwa Juda kwakapa kuti Jerusalemu azundwe abana Babuloni. Nebukadinezara wakatola Joyakini, Daniele alimwi abamwi mubuzike ku Babuloni. Imwami wakabwezelezya azibelesyo zimwi zyamutempele lya Jehova. Zedekiya, acisyanyinaa Joyakini wakamubikka kuti abe mwami musyoonto mu Juda.—2 Bami 24:2-17; Daniele 1:6, 7.

  Nokwakainda ciindi, awalo Zedekiya wakazanga akuba mulongwe wa Egepita. Nebukadinezara wakazunda Jerusalemu alimwi mu 607 B.C.E., wakabuwisya bwaanda bwawo, wakaumpa tempele alimwi akunyonyoona munzi. Ibana ba Zedekiya boonse wakabajaya mpoonya Zedekiya wakamoofwaazya akumwaanga ikutegwa amutole kali mwaange ku Babuloni. Ibunji bwabantu wakabatola buzike Nebukadinezara alimwi wakatola zibelesyo zimwi zyakasyeede zyamutempele ku Babuloni. “Mbuboobo ba-Juda mbubakatolwa mubuzike akugwisigwa munyika yabo.”—2 Bami 24:18-25:21.

Alimwi Nebukadinezara wakazunda cisi ca Turo kwiinda mukulwana munzi oyu—ikulwana kwakatola myaka iili 13. Naakacili kulwisya, imitwe yabasilumba bakwe yakaba “zinkulu” akaambo kakucumba kwazihelemende zyabo, alimwi makkuko abo “akalicuzukide” akaambo kakunyamuna zibelesyo nzyobakali kuyasya aakwiinda. (Ezekieli 29:18) Limwi icisi ca Turo cakazundwa kumpi zya Babuloni.

Kulibonya kuti mwami wa Babuloni wakali silumamba musongo kapati. Alimwi mabbuku amwi ikapati aazwa ku Babuloni amupandulula kuti wakali mwami uululeme. Nokuba kuti Magwalo taagami buya kwaamba kuti Nebukadinezara wakaliluleme, imusinsimi Jeremiya wakaamba kuti nokuba kuti Zedekiya wakazanga, naakalanganizigwa kabotu ‘ikuti naakalyaaba mumaanza aabasilutwe bamwami wa Babuloni.’ (Jeremiya 38:17, 18) Alimwi naakamana kunyonyoonwa Jerusalemu, Nebukadinezara wakamulanganya cabulemu Jeremiya. Ikujatikizya Jeremiya, imwami wakalailila kuti: “Umubweze, umulange kabotu. Utamubisizyi pe, pele kufumbwa ncakwaambila, uleelede kumucitila mbubonya mbwaamba.”—Jeremiya 39:11, 12; 40:1-4.

Mbwaakali mweendelezi, Nebukadinezara wakafwambaana kubona ziimo alimwi anguzu zyakajisi Daniele abeenzinyina botatwe—Sadrake, Mesaki alimwi a Abedinego—balo bakali  amazina aa Cihebrayo aakuti Hananiya, Misayeli alimwi a Azariya. Aboobo imwami wakababelesya muzyuuno zisumpukile mubwami bwakwe.—Daniele 1:6, 7, 19-21; 2:49.

Nebukadinezara ngwaakali kukomba kapati ngu Marduki imupati kuli baleza ba Babuloni. Imwami wakali kulumba Marduki akaambo kakuzunda kwakwe koonse. Mu Babuloni wakayaka akubotezya matempele aa Marduki alimwi aabaleza bamwi banji ba Babuloni. Icikozyanyo cangolida ncaakaimika mucibanda ca Dura cilakonzya cakaabidwe kuli Marduki. Alimwi Nebukadinezara uboneka kuti wakali kwaasyoma kapati makani aakusonda naakali kukanza milimo yakwe yabusilumamba.

Alimwi Nebukadinezara wakakkomana kuyakulula Babuloni, imunzi wabwaanda bupati kuciindi eco. Ikwiinda mukumanizya kuyaka bwaanda bupati bobile bwalo usyi mbwaakatalikide kuyaka, Nebukadinezara wakapa kuti munzi oyu uboneke mbuli kuti taukonzyi kuzundwa pe. Imwami wakaibambulula ŋanda yamwami yakaindi iyakali akati kamunzi akuyaka imbi yakukkalila cilimo kubusena bulampa makkilomita aatandila kwaabili kuya kunyika. Ikutegwa akkomanisye mukaintu wakwe  muna Mediya walo wakalikulilauka malundu alimwi amasamu aakumunzi nkwaakazwa, Nebukadinezara waambwa kuti wakayaka myuunda yamujulu—iyaambwa kuti ili akati kamasena aagambya aali ciloba mucisi eco cansiku.

Ibuzuba bumwi mwami naakali kweendeenda aŋanda yakwe yabwami mu Babuloni wakali kulisumpula ategwa: “Sa teensi oyu munzi mupati, Babuloni, ngunjakide kunguzu zyangu zigambya kuti ube cikalilo cabwami aŋanda yabulemu bwangu? Naakacili kwaamba majwi aya” wakasondoka. Mbwaanga tanaakacili kweelela kulela kwamyaka iili ciloba, wakali kulya bwizu mbubwenya mbuli mbwakasinsima Daniele. Kumamanino aaciindi eco, bwami bwakapilusigwa kuli Nebukadinezara walo wakalela kusikila lufwu lwakwe mu 582 B.C.E.—Daniele 4:30-36.

NCINZI NCOMWAIYA?

Ncinzi cikonzya kwaambwa kujatikizya Nebukadinezara kumakani aa

• kuba silumamba musongo?

• imweendelezi?

• mukombi wa Marduki?

• muyaki?

[Maapu]

(Kutegwa mubone bwini mbwaakkede mabala, amubone bbuku lini)

BWAMI BWA BABULONI

LWIZI LUSALALA

Jerusalemu

Mulonga wa Firate

Mulonga wa Tigrisi

Nineve

Susani

Babuloni

Uri

[Cifwanikiso icili apeeji 64]

Babuloni, imunzi wakajisi bwaanda bupati kapati kuciindi cawo

[Cifwanikiso icili apeeji 66]

Imuzoka ngowakali kwiiminina Marduki

[Cifwanikiso icili apeeji 67]

Imyuunda yamujulu ya Babuloni iyakadumide

 [Citondezyo/Cifwanikiso icili apeeji 56]

(Kutegwa mubone bwini mbwaakkede mabala, amubone bbuku lini)

IMAMI AAYENDELEZYA NYIKA AAMUBUSINSIMI BWA DANIELE

Icikozyanyo cipati kwiinda (Daniele 2:31-45)

BWA BABULONI kuzwa mu 607 B.C.E.

BWA MEDIYA A PERSIA kuzwa mu 539 B.C.E.

BWABA GILIKI kuzwa mu 331 B.C.E.

BWA ROMA kuzwa mu 30 B.C.E.

BWA BRITAIN A AMELIKA (ANGLO-AMERICA) kuzwa mu 1763 C.E.

INYIKA IIZANDUKENE BWEENDELEZI kumamanino aaciindi

 [Cifwanikiso icili apeeji 47]

 [Cifwanikiso icili apeeji 58]