Ikuziba Bakombi Beni-Beni Kumamanino Aaciindi
Cibalo 17
Ikuziba Bakombi Beni-Beni Kumamanino Aaciindi
1. Ikweelana abbuku lya Daniele caandaano ca 7, nzintu nzi zikankamanisya zyakali kulangilwa kucitikila kakamu kasyoonto kabantu banyina bukwabilizi bakuciindi cesu?
IKAKAMU kasyoonto kabantu kalwanwa acisi canguzu iceendelezya nyika. Bafwutuka kakunyina akakwambu mane babukulusigwa—eci teecakacitika kwiinda munguzu zyabo beni pele cakacitika nkaambo kakuti Jehova Leza ulabayanda. Ibbuku lya Daniele caandaano ca 7 lyakazisinsima zintu ezi zyalo zyakacitika kumatalikilo aamwaanda wamyaka wa 20. Ino bantu aba mbaani? Icaandaano ca Daniele nciconya cibaamba kuti “[m]basalali ba-Sijulu wamajulu,” Jehova Leza. Alimwi cakatondezya kwaamba kuti aba bantu bayooba basikulela mu Bwami bwabu Mesiya!—Daniele 7:13, 14, 18, 21, 22, 25-27.
2. (a) Ino Jehova ulimvwa buti kujatikizya babelesi bakwe bananike? (b) Ninzila nzi mbotu kutobela muziindi ezino?
2 Mbubwenya mbuli mbutwakaiya kucaandaano ca 11 ca Daniele, imwami wakunyika uyoonyonyoonwa aakumana kulwana nyika iikwabilidwe yabantu aba basyomeka yakumuuya. (Daniele 11:45; amweezyanisye Ezekieli 38:18-23.) Ee, Jehova ulabakwabilila kapati bananike bakwe basyomeka. Ibbuku lya Intembauzyo 105:14, 15 litwaambila kuti: “Wakatapatila bami [Jehova] nkaambo kabo. Wakati, Mutagumi bananike bangu, mutabisizyi basinsimi bangu.” Aboobo sena inga tamuzumini kuti muziindi ezi zikatazya inga cabagwasya ‘ibankamu mpati’ ibayaabuvwula kuyanzana kapati abaaba basalali? (Ciyubunuzyo 7:9; Zekariya 8:23) Jesu Kristo wakakulwaizya kuti ibantu bali mbuli mbelele bacite obo—bayanzane abanabakwabo bakumuuya ibananike kwiinda mukubagwasilizya mumulimo wabo.—Matayo 25:31-46; Ba-Galatiya 3:29.
3. (a) Nkaambo nzi ncocitali cuuba-uba ikujana basikutobela Jesu bananike akuzumanana kuyanzana ambabo? (b) Ino Caandaano ca 12 ca Daniele ciyootugwasya buti mumakani aya?
3 Nokuba boobo, Sinkondonyina Leza, Saatani walikulwana nkondo abananike. Waleta bukombi bwakubeja akuzuzya nyika yoonse a Banakristo bakubeja. Akaambo kaboobo ibantu banji beenwa. Bamwi tabakwe alusyomo lwakuti inga baakubajana abo baiminina bukombi bwakasimpe. (Matayo 7:15, 21-23; Ciyubunuzyo 12:9, 17) Nobaba baabo ibakajana “katanga kaniini” akuyanzana ankako beelede kusolekesya kuti bazumanane kusyomeka nkaambo nyika eyi isola kumana lusyomo lyoonse. (Luka 12:32) Ino mbuti nywebo? Sena mwabajana “basalala ba-Sijulu wamajulu,” alimwi sena mulayanzana ambabo? Sena mulibuzi bumboni bwini-bwini bwakuti abo mbomwajana mbambabo ncobeni mbasalide Leza? Ibumboni buli boobu bulakonzya kuyumya lusyomo lwanu. Alimwi bulakonzya kumugwasya kuti mugwasilizye bamwi ikuziba manyongwe aaliko mubukombi bwanyika yasunu. Mucaandaano ca 12 icabbuku lya Daniele muli luzibo olu lunji lufwutula buumi.
SILUTWE MUPATI WABWEZA NTAAMU
4. (a) Nzintu nzi zyobile nzyolisinsima bbuku lya Daniele 12:1 kujatikizya Mikayeli? (b) Ncinzi caambwa kanjikanji mubbuku lya Daniele noliti mwami ‘walanga’?
4 Ibbuku lya Daniele 12:1 lyaamba kuti: “Kuciindi eco uyoobuka Mikayeli, silutwe mupati uulanga bantu bako.” Aka kapango kasinsima zintu zipati-pati zyobile kujatikizya Mikayeli: icakusaanguna ncakuti “[ng]uulanga” nkokuti unooli muciimo cakucita boobo kwaciindi cilamfwu; icabili ncakuti “uyoobuka” nkokuti uyoobweza ntaamu imwi muciindi eco. Ikusaanguna tuyanda kuziba ciindi Mikayeli ‘nalanga bantu [ba Daniele].’ Amuyeeye kuti izina lyakuti Mikayeli ndizina lipedwe kuli Jesu mumulimo wakwe ngwacita wa Bweendelezi bwakujulu. Ikubelesyegwa kwabbala lyakuti “uulanga” kutuyeezya mbuli mbolibelesyedwe muzibeela zimbi mubbuku lya Daniele. Kanjikanji bbala eli lyaamba ntaamu iibwezegwaa mwami mbuli kukkala acuuno cabwami.—Daniele 11:2-4, 7, 20, 21.
5, 6. (a) Nkuuciindi cili Mikayeli nalanga bantu ba Leza? (b) Ino Mikayeli ‘ubuka’ lili alimwi muunzila nzi, alimwi ncinzi cicitika?
5 Cilalibonya kuti imungelo awa wakali kwaamba ciindi cimwi icaambidwe mumabbuku aambi mubusinsimi bwa Bbaibbele. Eci Jesu wakacaamba kuti “[n]kubako” (mu Cigiliki, pa·rou·siʹa) kwakwe, azoolela kali Mwami kujulu. (Matayo 24:37-39, NW) Alimwi ciindi nciconya eci ciitwa kuti “mazuba aakumamanino” alimwi akuti “kumamanino aaciindi.” (2 Timoteo 3:1; Daniele 12:4, 9) Ikuzwa nocakatalika ciindi eco mu 1914, Mikayeli walikulanga bantu ba Leza kali Mwami kujulu.—Amweezyanisye Isaya 11:10; Ciyubunuzyo 12:7-9.
6 Ino ono Mikayeli “uyoobuka” lili? Uyoocita obo aakutola ntaamu iilibedelede. Eci ncayakucita Jesu kumbele. Ibbuku lya Ciyubunuzyo 19:11-16 lilamupandulula Jesu munzila yabusinsimi kuti Mwami wabu Mesiya iweendela kumbele aankamu yabangelo abo baleta lunyonyooko kuli basinkondonyina Leza. Ibbuku lya Daniele 12:1 lilazumanana kuti: “Kuyooba ciindi camapenzi aayoosya aatana kubonwa kuzwa kuciindi nebakaba musyobo mane kusikila kuciindi eco nciconya.” Mbwali Silutwe Wabasikalumamba wa Jehova, Kristo uyoogwisya bweende obu bubyaabi bwazintu kuciindi “[ca]mapenzi mapati” icakasinsimwa.—Matayo 24:21; Jeremiya 25:33; 2 Ba-Tesalonika 1:6-8; Ciyubunuzyo 7:14; 16:14, 16.
7. (a) Mbulangizi nzi buliko kuli baabo boonse basyomeka ‘kuciindi camapenzi’? (b) Ino bbuku lya Jehova liiminina nzi, alimwi nkaambo nzi ncokuyandika kapati kuti katulembedwe?
7 Ino ncinzi ciyoocitika kubantu basyomeka kuciindi eci camapenzi? Daniele wakaambilwa kuti: “Kuciindi eco bantu bako bayoovunwa, nkokuti boonse bajanika balilembedwe mubbuku.” (Amweezyanisye Luka 21:34-36.) Ino ndibbuku nzi eli? Liiminina kuyeeya nkwayoobayeeya Jehova Leza ibacita kuyanda kwakwe. (Malaki 3:16; Ba-Hebrayo 6:10) Abo balembedwe mubbuku eli mbabantu bainda kuliiba munyika nkaambo Leza ulabakwabilila. Naaba buti mapenzi aanga abasikila ayoomanizigwa. Nokuba kuti bafwa kacitanasika “ciindi camapenzi” eci, Jehova tabalubi pe. Uyoobayeeya akubabusya mu Myaka iili Cuulu ya Bulelo bwa Jesu Kristo.—Incito 24:15; Ciyubunuzyo 20:4-6.
IBASALALI ‘BABUKA’
8. Mbulangizi nzi bubotu mbolitupa bbuku lya Daniele 12:2?
8 Masimpe ibulangizi bwabubuke bulakkazika moyo. Ikujatikizya bubuke ibbuku lya Daniele 12:2 lyaamba kuti: “Bantu banji baona mubulongo bwaansi bayoobuka; bamwi bayoobukila buumi buteeli, abamwi bayoobukila insoni, babe cisesemyo citeeli.” (Amweezyanisye Isaya 26:19.) Aya majwi atuyeekezya cisyomezyo ca Jesu Kristo icikulwaizya cijatikizya kubusigwa kwabantu. (Johane 5:28, 29) Bulakondelezya kaka bulangizi obo! Amuyeeye buyo balongwe besu bayandwa abanamukwasyi—ibafwide lino—ikuyakupegwa coolwe cakupona alimwi kumbele! Pele eci cisyomezyo icili kubbuku lya Daniele caamba bubuke bwamusyobo umbi—ibucitikide kale. Ino inga caba buti obo?
9. (a) Nkaambo nzi ncocili camaanu ikulangila kuti ibbuku lya Daniele 12:2 liyoozuzikizigwa mumazuba aakumamanino? (b) Mbubuke bwamusyobo nzi ibwaambwa mubusinsimi alimwi tuzi buti obo?
9 Amulange makani aabandikwa mucibalo eci. Mbubwenya mbuli mbutwabona kale, ikapango kakusaanguna kacaandaano ca Da 12 takaambi buyo ciindi cakumamanino aabweende bwazintu pele kajatikizya ciindi coonse camazuba aakumamanino. Atwaambe kuti, icibeela cipati cacaandaano eci cizuzikizigwa kumamanino aaciindi ikutali munyika yaparadaiso iiboola. Sena kuli kubusyigwa kwacitika muciindi eci? Imwaapostolo Paulo wakalemba kuti bubuke ‘bwabana ba-Kristo’ bucitika ‘kuciindi cakubako kwakwe.’ Nokuba boobo abo babusigwa kubuumi bwakujulu balabusigwa “mbuli batafwiki.” (1 Ba-Korinto 15:23, 52) Mbubwenya mbukwakasinsimwa kuli Daniele 12:2, kunyina “bayoobukila insoni, babe cisesemyo citeeli.” Sena kuli kubusigwa kwamusyobo umbi? Zimwi ziindi mu Bbaibbele, ibubuke bujisi bupanduluzi munzila yakumuuya. Mucikozyanyo, imabbuku aa Ezekieli alimwi a Ciyubunuzyo ajisi zibalo zyabusinsimi zyalo izyaamba kubukulusigwa munzila yakumuuya naa bubuke.—Ezekieli 37:1-14; Ciyubunuzyo 11:3, 7, 11.
10. (a) Muunzila nzi mobakabusigwa bananike basyeede muciindi cakumamanino? (b) Ino bamwi bananike ibakabusigwa bakabukila buti ‘kunsoni alimwi akuba cisesemyo citeeli’?
10 Sena kuli nobabusigwa munzila yakumuuya babelesi bananike ba Leza kumamanino aaciindi? Inzya! Mu 1918 Banakristo basyomeka bananike ibasyoonto bakalwanwa kapati calo cakapa kuti mulimo wabo wakubuleya unyonganizigwe. Mpoonya, mu 1919 bakaba baumi munzila yakumuuya nokuba kuti cakali kuboneka kuti ncintu citakonzyeki. Eci cakacitika ceelela bupanduluzi bwabubuke ibwakasinsimwa kuli Daniele 12:2. Bamwi ‘bakabuka’ munzila yakumuuya kuciindi eco alimwi akumazuba aakatobela. Pele kwiina nobakazumanana pe ikuba baumi munzila yakumuuya. Abo ibakakaka Mwami wabu Mesiya nobakamana kubusigwa alimwi ibakaleka mulimo wa Leza ‘bakabaa nsoni alimwi bakaba cisesemyo citeeli’ icipanduludwe kuli Daniele 12:2. (Ba-Hebrayo 6:4-6) Nokuba boobo, ibananike basyomeka bakacibelesya kabotu ciimo cabo cakumuuya nobakabusigwa, bakagwasilizya Mwami wabu Mesiya cakusyomeka. Mbubwenya mbuli mbobwaamba businsimi, ilusyomo lwabo lutola ‘kubuumi buteeli.’ Ikusungwaala kwabo munzila yakumuuya nokuba kuti kuli kukazigwa kutugwasya kuti tubazibe sunu.
‘BALABEKEMA MBULI INYENYEEZI’
11. Ino mbaani “basongo” sunu, alimwi muunzila nzi mobabekema mbuli nyenyeezi?
11 Itupango tobile tutobela itwakuli Daniele caandaano ca 12 tulatugwasya kapati ikuziba “basalali ba-Sijulu wamajulu.” Mukapango ka 3 imungelo waambila Daniele kuti: “Lino basongo bayoobekema mbuli kubekema kwajulu, abaabo bapilusya bantu banji kubululami mbuli inyenyeezi mane kukabe kutamani.” Ino sunu abo “basongo” mbaani? Kulibonya kuti “[m]basalali ba-Sijulu wamajulu” mbabona alimwi. Kayi kunyina bambi kunze lyabananike basyomeka ibasyeede bakajisi busongo ibwakuziba kuti Mikayeli, Silutwe Mupati wakatalika kulanga bantu ba Leza kali Mwami mu 1914. Ikwiinda mukukambauka makani aakasimpe aali boobu—antoomwe akuzumanana mubukkale bwabo bwa Bunakristo—bali kubala mbuli “mimuni yakumunika” munyika eyi iili mumudima munzila yakumuuya. (Ba-Filipi 2:15; Johane 8:12) Jesu wakasinsima boobu kujatikizya mbabo: “Lino baluleme bazoobala mbuli izuba mu-Bwami bwawisaabo.”—Matayo 13:43.
12. (a) Kuciindi eci cakumamanino munzila nzi bananike mobajatikizigwa ‘kukupilusya bantu banji kubululami’? (b) Ino bananike bayoopilusya buti bantu banji kubululami alimwi ‘akubekema mbuli nyenyeezi’ mu Myaka iili Cuulu ya Bulelo bwa Kristo?
12 Mane ibbuku lya Daniele 12:3 litwaambila mulimo ngobanoojisi Banakristo bananike muciindi eci cakumamanino. Banooleta “bantu banji kubululami.” Ibananike bakatalika kuyobolola basyeede kumweelwe wabasikulelanyina Kristo ibali 144,000. (Ba-Roma 8:16, 17; Ciyubunuzyo 7:3, 4) Nowakamana mulimo oyo—akati-kati kamyaka yakuma 1930—bakatalika kuyobolola “inkamu impati” ya “mbelele zimwi.” (Ciyubunuzyo 7:9; Johane 10:16) Abalo aba balacisyoma cipaizyo cacinunuzyo ca Jesu Kristo. Aboobo balaaciimo cibotu mumeso aa Jehova. Sunu aaba basika kutuulunzuma tuli mbotubede, balijisi bulangizi bwakufwutuka lunyonyooko luboola lwanyika eyi mbyaabi. Mubulelo bwa Kristo bwa Myaka iili Cuulu, Jesu antoomwe abaminyina alimwi bapaizi ibali 144,000 bayoobelesya mpindu yacinunuzyo mubuzwide kubantu bamvwa anyika akugwasya baabo boonse ibasyoma kuti bagwisye cibi coonse cakakonwa kuli Adamu. (2 Petro 3:13; Ciyubunuzyo 7:13, 14; 20:5, 6) Ibananike bayootola lubazu mubuzwide mukupilusya “bantu banji kubululami” elyo ‘bayoobekema mbuli inyenyeezi’ kujulu. Sena mulabuyandisya bulangizi bwakupona anyika mubweendelezi bwamfwulumende yakujulu yabulemu ya Kristo abasikulelanyina? Ncoolwe kaka ikubelekelaamwi ‘abasalali’ mumulimo wakukambauka makani mabotu aa Bwami bwa Leza!—Matayo 24:14.
‘BATUNTULIKA’
13. Ino muunzila nzi majwi aa Daniele mwaakanamatikidwe akuba maseseke?
13 Imulumbe wamungelo ngwaakaletela Daniele iwakatalikila kuli Daniele 10:20 lino wasika kumamanino amajwi aaya aakkazika moyo aakuti: “Pele yebo, O Daniele, jala majwi akunamatika ibbuku mane kusikila kumamanino aaciindi. Bantu banji bayootuntulika, aboobo luzibo luyooyungizizigwa.” (Daniele 12:4) Masimpe ibunji bwazintu nzyaakasololelwa kulemba Daniele zyakaba zyamaseseke alimwi zyakanamatikwa ikuti batazimvwi bantu. Daniele mukamwini wakazyoolemba boobu kumbele ategwa: “Ndakamvwa, pele nsikwe nendakamvwisya pe.” (Daniele 12:8) Munzila eyi, ibbuku lya Daniele lyakacaala kalinamatikidwe kwamyaanda yamyaka iili mbwiibede. Ino mbuti sunu?
14. (a) Mbaani ‘batuntulika’ “kumamanino aaciindi,” alimwi nkuli nkobacitila boobo? (b) Mbumboni nzi buliko butondezya kuti Jehova wakulongezya ‘kutuntulika’ oku?
14 Tulaacoolwe kuti tupona “kumamanino aaciindi” icakasinsimwa mubbuku lya Daniele. Mbubwenya mbuli mbukwakasinsimwa, ibantu banji basyomeka ‘batuntulika’ mukusola kuteelela Jwi lya Leza. Ncinzi cacitika? Iluzibo lwini-lwini lwavwula kwiinda mukulongezyegwaa Jehova. Ibananike basyomeka akati ka Bakamboni ba Jehova balongezyegwa kwiinda mukupegwa busongo ibupa kuti bakonzye kuteelela kuti Mwanaa muntu wakaba Mwami mu 1914 akuziba zinyama izyamubusinsimi bwa Daniele alimwi akucenjezya kujatikizya “cisesemyo cabusaale”—pele ezi nzikozyanyo zisyoonto buyo. (Daniele 11:31) Aboobo ikuvwula kwaluzibo ncecintu acimbi cizibya “basalali ba-Sijulu wamajulu.” Pele Daniele wakatambula abumbi bumboni.
‘BAMWAISIGWA’
15. Mubuzyo nzi ngwaabuzya lino mungelo, alimwi utuyeekezya nzi mubuzyo oyu?
15 Tulayeeya kuti Daniele wakatambula milumbe eyi kuzwa kubangelo kunkomwe “yamulonga mupati” wa Hidekeli walo uuyitwa akuti Tigrisi. (Daniele 10:4) Lino awa wabona bangelo elyo ulaamba: “Mpoonya mebo nde Daniyeli ndakalanga, lino kumbele kwakaimwi bantu bambi bobilo, umwi wakaimvwi mutala lino lyankomwe yalwizi, umwi mutala liya. Umwi wabo wakabuzya yooyo wakasamide zisani zyandeketela, wakali atala lyamaanzi aamulonga wakati, ‘Ino zintu eezi zigambya ziyoocitika lili?’” (Daniyeli 12:5, 6, BT) Imubuzyo ngwaakabuzya mungelo awa ulakonzya kutuyeekezya “basalali ba-Sijulu wamajulu” alimwi. Mu 1914, kumatalikilo ‘aaciindi cakumamanino’ bakaluubikkilide kapati maanu mubuzyo wakuti naa kwakasyeede ciindi cilamfwu buti kuti zisyomezyo zya Leza zizuzikizigwe. Icitondezya kuti businsimi obu bwakali kwaamba basalali aba, mbwiinguzu bwamubuzyo oyu.
16. Ino mbusinsimi nzi mbwaamba mungelo, alimwi wakankaizya buti kuti buyoozuzikizigwa?
16 Icibalo ca Daniele cilazumanana kuti: “Mpawo oyo muntu iwakasamine masani aatuba, iwakali ajulu amaanzi aalwizi, wakasumpula ijanza lyakwe lyalulyo ajanza lyakwe lyalumwe[n]si, nkabela ndakamumvwa kakonka kuliyooyo uupona lyoonse kuti kuyooba ciindi aziindi zyobile acisela, lino nazoomana kumwaisya bantu basalala, aya makani oonse ayoomana.” (Daniele 12:7) Aka kaambo nkapati. Imungelo watambika maanza oonse obile mujulu akukonka ambweni kutegwa bangelo bobile bali kulubazu lwakooku alwakooku lwamulonga mupati babone. Mpoonya wakankaizya mbuli mbobuyoozuzikizigwa ncobeni businsimi obu. Ino ono ciindi eci cibikkidwe ciyooba lili? Ibwiinguzi tabuli buyumu mbuli mbomubuyeeyela.
17. (a) Ino nkukozyanya nzi kujanika mubusinsimi bulembedwe kuli Daniele 7:25, Daniele 12:7 alimwi a Ciyubunuzyo 11:3, 7, 9? (b) Ino mazuba otatwe acisela nciindi cilamfwu buti?
17 Ibusinsimi obu bulakozyanya abumbi bobile. Ibwakusaanguna mboobuya mbutwakalanga-langa mu Cibalo ca 9 mubbuku eli ibujanwa kuli Daniele 7:25, ibumwi buli ku Ciyubunuzyo 11:3, 7, 9. Amubone mbobukozyanya. Abumwi bucitika kuciindi cakumamanino. Ibusinsimi boonse bobile bujatikizya babelesi ba Leza basalali. Butondezya kuti balapenzyegwa alimwi akulesyegwa mulimo wabo wakukambaukila buleya kwakaindi kasyoonto. Ibusinsimi bumwi abumwi butondezya kuti babelesi ba Leza balabukulusigwa mpoonya balazumanana mumulimo wabo akuzunda basikubapenzya. Alimwi abumwi businsimi bulacaamba ciindi citolwa mumapenzi aya aabasalali. Ibusinsimi boonse bobile ibuli kuli Daniele (7:25 alimwi a 12:7) bwaamba “ciindi aziindi zyobile acisela.” Bahaabupampu baamba kuti eci caamba ziindi zyotatwe acisela. Ibbuku lya Ciyubunuzyo lyaamba ciindi nciconya eci kuti mmyezi iili 42 naa mazuba aali 1,260. (Ciyubunuzyo 11:2, 3) Aboobo eci cisinizya kuti iziindi zyotatwe acisela izili kubbuku lya Daniele zyaamba myaka yotatwe acisela yamazuba aali 360 omwe-omwe. Pele ino mazuba aya aali 1,260 akatalika lili?
18. (a) Ikweelana abbuku lya Daniele 12:7, ncinzi cakali kuyootondezya kuti mazuba aali 1,260 amana? (b) Ino ndilili ‘nozyakamwaisigwa’ nguzu ‘zyabantu basalala,’ alimwi eci cakacitika buti? (c) Ino mazuba aali 1,260 akatalika lili, alimwi muunzila nzi ibananike ‘mobakasinsima kabasamide masaka’ kuciindi eco?
18 Obu businsimi bulasalazya kapati kujatikizya naazoomana mazuba aali 1,260—“nazoomana kumwaisya bantu basalala.” Akati-kati kamwaka wa 1918, ibeendelezi ba Watch Tower Bible and Tract Society, kubikkilizya a J. F. Rutherford bakabejelezyegwa twaambo elyo bakajatwa kwaciindi cilamfwu alimwi akwaangwa muntolongo. Ibantu ba Leza basalala bakaibona ncobeni milimo yabo ‘kaimwaisigwa,’ inguzu zyabo zyakamana. Ikuti twabala myaka yotatwe acisela musyule ikuzwa akati kamwaka wa 1918 tusika kuciindi cakumamanino aa 1914. Kuciindi eco ikakamu kasyoonto kabananike kakali kulibambila kupenzyegwa kwakali kulangilwa. Inkondo Yanyika Yakusaanguna yakali talikide alimwi ikukazigwa kujatikizya mulimo wabo kwakali kuyabwiindila. Mu 1915 alugwalo lwabo lwamwaka lwakali kujatikizya mubuzyo oyu ngwaakabuzya basikumutobela Kristo wakuti: “Sa mulakonzya kunywida mukanywido munti nywide ime?” (Matayo 20:22) Mbubwenya mbuli mbokwakasinsimwa ku Ciyubunuzyo 11:3, imazuba aali 1,260 aakatobela cakali ciindi cakulila kubananike—cakali mbuli kuti bakali kusinsima kabasamine zisani zyamasaka. Ikupenzyegwa kwakaindila. Bamwi bakabikkwa muntolongo, bamwi bakalwanwa ankamu zyabantu alimwi bamwi bakapenzyegwa bulanga. Ibanji bakatyompwa akaambo kalufwu lwamweendelezi wa Sosaiti wakusaanguna C. T. Russell mu 1916. Ino ono ncinzi cakali kulangilwa kucitika nocakainda ciindi eci camapenzi icakamanaa kujayigwa kwambunga yabasalali aba yabasikukambauka?
19. Ino businsimi buli ku Ciyubunuzyo caandaano ca 11 butusyomezya buti kuti bananike tiibakali kulangilwa kulesyegwa kwaciindi cilamfwu?
19 Ibusinsimi bukozyanya aabobu ibujanika ku Ciyubunuzyo 11:3, 9, 11 butondezya kuti nobakajayigwa ‘bakamboni bobile,’ imitunta yabo yakasiigwa kwaciindi cisyoonto buyo—imazuba otatwe acisela—kusikila babusigwa. Abwalo ibusinsimi buli kuli Daniele 12 butondezya kuti basalali tiibakali kunooumuna buyo pe, pele bakacijisi mulimo mupati kumbele.
‘BASALAZIGWA, BABOTEZYEGWA ALIMWI AKUTUBIZIGWA’
20. Ikweelana a Daniele 12:10 nzilongezyo nzi zyakali kunoosikila bananike bamana kupenga?
20 Mbubwenya mbutwabona kale, Daniele wakazilemba zintu ezi pele kwiina naakaziteelela pe. Pele ulalangilwa kuti wakali kulibuzya naa bananike bakali kuyoonyonyoonwa abasikubapenzya nkaambo wakabuzya kuti, “Mamanino aamakani aya ayooba buti?” Imungelo wakaingula kuti: “Koya buyo, Daniele, nkaambo majwi alijalidwe akunamatikwa mane ciindi cakumamanino cisike. Bantu banji bayoolisalazya akulibotya akulitubya, pele basizibi bayoocita bubi. Taakwe naba omwe wabasizibi uuyoomvwisya pe; basongo mbebayoomvwisya.” (Daniele 12:8-10) Ibasalali bakali abulangizi bwini-bwini! Muciindi cakunyonyoonwa bakali kuyootubisigwa, akulongezyegwa kubaa ciimo cibotu kumeso aa Jehova Leza. (Malaki 3:1-3) Ibusongo mbubajisi basalali bwakuteelela zintu zyakumuuya bwakali kuyoobagwasya kuzumanana kusalala mumeso aa Leza. Mukwiimpana, ibantu babyaabi bakali kuyookaka kuteelela zintu zyakumuuya. Pele ino zintu ezi zyoonse zyakali kuyoocitika lili?
21. (a) Iciindi cakasinsimwa kuli Daniele 12:11 cakali kunootalika kwacitika nzi? (b) Ino “zipaizyo zyalyoonse” zyakali kwiiminina nzi, alimwi ndilili nozyakalesyegwa? (Amubone kabbokesi apeeji 298.)
21 Daniele wakaambilwa kuti: “Kuzwa kuciindi eco zipaizyo zyalyoonse neziyoolesegwa kukubika cisesemyo calusaalo, kuyooba mazuba aali cuulu amyaanda yobile amakumi aali musanu aane.” Aboobo eci ciindi cakali kuyootalika zyaakucitika zimwi zintu. “Zipaizyo zyabuzuba abuzuba” (BT) zyakeelede kulesyegwa. * (Daniele 12:11) Ino nzipaizyo nzi nzyaakali kwaamba mungelo? Tazili zipaizyo zyabanyama izyakali kutuulwa mumatempele aanyika. Kayi noliba tempele ilyakali mu Jerusalemu cakali “cifwanisyo buyo cabusena bwinibwini”—catempele lipati lya Jehova lyakumuuya lyalo lyakatalisigwa kubeleka ciindi Kristo naakaba Mupaizi Mupati mu 29 C.E.! Mutempele eli lyakumuuya iliiminina bubambe bwa Leza bwabukombi busalala, takuyandiki zipaizyo zituulwa buzuba abuzuba nkaambo ‘Kristo wakalituula komwe akuyumuna zibi zyabanjibanji.’ (Ba-Hebrayo 9:24-28) Pele boonse Banakristo beni-beni balatuula zipaizyo mutempele eli. Imwaapostolo Paulo wakalemba kuti: “Eno mulinguwe [Kristo] atupaile Leza lyoonse cipaizyo cakulumba, nkokuti micelo yamilomo iilumba izina lyakwe.” (Ba-Hebrayo 13:15) Aboobo, eci ciimo cakusaanguna cabusinsimi—icakulesya “zipaizyo zyalyoonse”—cakacitika akati-kati kamwaka wa 1918 ciindi mulimo wakukambauka nowakalekedwe.
22. (a) Ino “cisesemyo calusaalo” ciiminina nzi, alimwi cakaimikwa lili? (b) Ino ciindi cakasinsimwa kuli Daniele 12:11 cakatalika lili akumana?
22 Ino mbuti kumakani aaciimo cabili—‘ikwiimikwa’ naa kubikkwa ‘kwacisesemyo cabusaale’? Mbubwenya mbuli mbutwakabona mumubandi wesu wabbuku lya Daniele 11:31, kukusaanguna icisesemyo cabusaale cakali ciinga Caluumuno Lwazisi ica League of Nations mpoonya cakazyoobuka alimwi kacili ciinga ica Lukamantano lwa Zisi ica United Nations. Zyoonse zyobile nzisesemyo akaambo kakuti zyali kwaambwa kuti nzyezinga zyaleta luumuno anyika. Aboobo, mumyoyo yabantu banji, ezi ziinga zili abusena bwa Bwami bwa Leza! Iciinga eci ca League of Nations cakakanzigwa kubambwa mu January 1919. Elyo kuciindi eco iziimo zyoonse zyobile izyakuli Daniele 12:11 zyakazuzikizigwa. Aboobo imazuba aali 1,290 akatalika kumatalikilo aa 1919 ikuyakusika kuciindi cacilimo (Camumasi Aakunyika) mu 1922.
23. Ino basalali ba Leza bakaya buti ambele kumakani aakusalazigwa mumazuba aali 1,290 aakasinsimwa kuli Daniele caandaano ca 12?
23 Kuciindi eco sena basalali bakayaambele akusoleka kulitubya akulisalazya mumeso aa Leza? Inzya mbubakacita obo! Mu March 1919 imweendelezi wa Watch Tower Society antoomwe abeenzinyina bakaangululwa kuzwa muntolongo. Bakazyoojanika kuti banyina mulandu kujatikizya zintu zyobakabejelezyegwa. Akaambo kakuti bakalizi kuti mulimo wabo tiiwakaningamana, bakajata bubi ndilyonya ikulibambila muswaangano mupati wamu September 1919. Mumwaka nguwenya oyo imagazini iyeendelaamwi a Ngazi Yamulindizi yakamwaigwa kwaciindi cakusaanguna. Imagazini yakali kwiitwa kuti The Golden Age (lino iitwa kuti Awake!), yali kugwasilizya Ngazi Yamulindizi kumakani aakuyubulula lweeno luli munyika cabusicamba alimwi akugwasya bantu ba Leza kuti bazumanane kusalala. Ikuzyoosika kumamanino aamazuba aali 1,290 aabusinsimi ibasalali bakali kuyaabusalazigwa alimwi akubaa ciimo cipya. Nocakali kuyanda kumana ciindi eci mu September 1922 bakabaa muswaangano mupati ku Cedar Point, Ohio mu U.S.A. Wakabakulwaizya kapati kumakani aamulimo wakukambauka. Nokuba boobo, kwakacili kuyandika kuti kabaciyaambele. Eco ncicakacaala kuti cicitwe muciindi cakali kutobela.
ICOOLWE CABASALALI
24, 25. (a) Ino ciindi icakasinsimwa kuli Daniele 12:12 nciindi cili, alimwi ndilili nocakatalika anocakamana? (b) Ino ciimo cakumuuya cabananike basyeede cakali buti kumatalikilo aamazuba aali 1,335?
24 Imungelo wa Jehova wamanizya businsimi bwakwe kujatikizya basalali mumajwi aaya aakuti: “Uli acoolwe uulindila akusikila kumazuba aali cuulu amya[a]nda yotatwe amakumi otatwe amusanu.” (Daniele 12:12) Imungelo kunyina naamba zintu iziyootondezya nociyootalika alimwi anociyoomana ciindi eci. Ikweelana azintu zyali kucitika musyule, eci ciindi cilatalika mbucamanina buyo ciindi cimwi. Ikuti kakuli boobo, nkokuti citalika cilimo mu 1922 kusikila kumamanino aamainza (Aakumasi Aakunyika) mu 1926. Sena basalali bakaba basicoolwe kumamanino aaciindi eco? Ee, munzila ziyandika kapati zyakumuuya.
25 Nociba ciindi kawiindide muswaangano mu 1922 (uutondezyedwe apeeji 302), bamwi basalali ba Leza bakacili kuzilombozya zintu zyamusyule. Ibbaibbele lyakacili ndebbuku libelesyegwa kapati mumiswaangano yabo antoomwe amavolyumu aakalembwaa C. T. Russell aa Studies in the Scriptures. Kuciindi eco kwakali muzeezo wakali kusyomwa kapati kujatikizya mwaka wa 1925 kuti mmwaka nobwakeelede kutalika bubuke akuti Paradaiso ipilusigwe anyika. Aboobo ibanji bakali kubeleka alusyomo lwakuti mamanino alasika mubuzuba bumwi mbobakali kuyeeyela. Ibamwi bakali kulisumpula akukaka kutola lubazu mumulimo wakukambauka kubuleya. Awa zintu tiizyakeenda kabotu pe.
26. Ino ciimo cakumuuya cabananike cakacinca buti mbwaakali kuyaabuya mazuba aali 1,335?
26 Nokuba boobo, imazuba aali 1,335 naakali kuyabuya kumbele izintu ezi zyoonse zyakatalika kucinca. Imulimo wakukambauka cakaba cintu cipati nkaambo bubambe bwakuti boonse batole lubazu mumulimo wamumuunda bwakali kucitwa lyoonse. Imiswaangano yakabambwa yakwiiya Ngazi Yamulindizi nsondo ansondo. Imagazini yamu March 1, 1925, yamu Cingisi, yakajisi cibalo cakuti “Ikuzyalwa kwa Cisi” icakazyibya bantu ba Leza icini-cini cakacitika mumyaka ya 1914-19. Nowakainda mwaka wa 1925, ibasalali bakaleka kubelekela Leza kabajisi buzuba bwini-bwini mumizeezo. Pele ikulemeka zina lya Jehova ncecakali cintu cipati. Mu Ngazi Yamulindizi ya January 1, 1926, yamu Cingisi, mucibalo cakuti “Mbaani Bayoolemeka Jehova?” aka kaambo kapati kakabandikwa kwiinda mazuba oonse. Kumuswaangano mu May 1926, ibbuku litegwa Deliverance lyakamwaigwa. (Amubone peeji 302.) Eli lyakali limwi lyamabbuku mumulongo wayaayo mapya aakabambilidwe kuti kaabelesyegwa mubusena bwa Studies in the Scriptures. Ibasalali tiibakacili kulombozya zyamusyule pe. Bakali kulangila buumi bwakumbele calusyomo amulimo wakeelede kucitwa. Mbubwenya mbukwakasinsimwa, imazuba aali 1,335 akamana ibasalali kabali acoolwe.
27. Ino kulanga-langa bbuku lya Daniele caandaano ca 12 kutugwasya buti kuziba bananike ba Jehova?
27 Aino tabali boonse bakaliyumya muciindi eco camapenzi. Nkakaambo kaako mungelo ncaakakankaizila mbuli mbokuyandika ‘kulindila.’ Abo bakaliyumya akulindila bakalongezyegwa kapati. Ikulanga-langa caandaano ca 12 cabbuku lya Daniele kulaasalazya makani aya. Mbubwenya mbukwakasinsimwa ibananike bakabukulusigwa naa kubusigwa munzila yakumuuya. Bakapegwa busongo bunji mu Jwi lya Leza, bakayumizigwa kuti ‘batuntulike’ mulindilyo alimwi akuzibya maseseke aansiku kwiinda mukusololelwa amuuya uusalala. Jehova wakabasalazya akubapa kuti babekeme munzila yakumuuya mbuli nyenyeezi zimweka. Mpoonya bakaleta banji kubululami mumeso aa Jehova Leza.
28, 29. Ino makanze eesu ayelede kuba buti mbociyabuswena afwaafwi “ciindi cakumamanino”?
28 Mbwaanga kuli zizibyo zyabusinsimi zyoonse ezi zyakutugwasya kuziba “basalali ba-Sijulu wamajulu,” sena kuli kaambo kanga katukasya kubaziba akubelekela antoomwe ambabo? Kuli zilongezyo zibotu nzyobabikkilidwe ibankamu mpati balo babelekela Jehova antoomwe abaciinga eci cabananike ibaya buceya. Toonse tweelede kulangila kuzuzikizigwa kwazisyomezyo zya Leza. (Habakuku 2:3) Kuciindi cesu, Mikayeli, Silutwe Mupati walikulanga bantu ba Leza kwamakumi aamyaka. Lino-lino uyootola ntaamu kali mujayi uubikkidwe a Leza wabweende obu bwazintu. Tunooli muciimo nzi aakutola ntaamu eyi?
29 Ibwiinguzi bwamubuzyo oyo buyeeme akusala kwesu kuti katusyomeka lino. Ikutegwa tuzumamanane amakanze aakucita boobo “ciindi cakumamanino” mbociya buswena afwaafwi atulange-lange kapango kamamanino kabbuku lya Daniele. Imubandi wesu mucibalo citobela uyootugwasya kubona mbucakabede ciimo ca Daniele kuli Leza wakwe alimwi ambociyooba kumbele.
Bupanduluzi buyungizidwe
^ munc. 21 Mu Septuagint ya Cigiliki kusanduludwe buyo kuti “cipaizyo”
NCINZI NCOMWAIYA?
• Nkuuciindi cili Mikayeli ‘nalanga’ bantu ba Leza, alimwi muunzila nzi alimwi ndilili ‘nayoobuka’?
• Ino mbubuke bwamusyobo nzi mbolyaamba bbuku lya Daniele 12:2?
• Mazuba nzi aatondezya matalikilo alimwi amamanino aa
ziindi zyotatwe acisela zilembedwe kuli Daniele 12:7?
mazuba aali 1,290 aakasinsimwa kuli Daniele 12:11?
mazuba aali 1,335 aakasinsimwa kuli Daniele 12:12?
• Ino kubikkila maanu kuli Daniele caandaano ca 12 kutugwasya buti kuziba bakombi ba Jehova beni-beni?
[Mibuzyo yaciiyo]
Kabbokesi kali apeeji 298]
IKULESYEGWA KWAZIPAIZYO ZYALYOONSE
Ikaambo kakuti “zipaizyo zyalyoonse” kalajanika ziindi zyosanwe mubbuku lya Daniele. Kapandulula cipaizyo cakutembaula—“micelo yamilomo”—ikucitwa kuli Jehova Leza lyoonse ababelesi bakwe. (Ba-Hebrayo 13:15) Ikulesyegwa kwanzizyo kulaambidwe kuli Daniele 8:11, 11:31 alimwi a 12:11.
Munkondo zyoonse zyobile zyanyika, ibantu ba Jehova bakapenzyegwa kapati mumanyika ‘aamwami wakunyika’ alimwi a “mwami wakumusanza.” (Daniele 11:14, 15) “Zipaizyo zyalyoonse” zyakalesegwa noyakali kuya mukumana Nkondo Yanyika Yakusaanguna ciindi mulimo wakukambauka nowakalesyedwe akati-kati kamwaka wa 1918. (Daniele 12:7) Noyakali kulwa Nkondo Yanyika Yabili, alimwi “zipaizyo zyalyoonse” ‘zyakalesyegwa’ acisi cakali Kweendelezya Nyika ca Britain a Amelika (Anglo-America) kwamazuba aali 2,300. (Daniele 8:11-14; amubone Cibalo 10 cabbuku eli.) Alimwi cakalilesyedwe ‘abasilumamba’ ba Nazi kwaciindi citaambidwe pe mu Magwalo.—Daniele 11:31; amubone Cibalo 15 cabbuku eli.
Ccaati/Zifwanikiso izili apeeji 301]
IZIINDI ZYABUSINSIMI MUBBUKU LYA DANIELE
Imyaka iili musanu aibili October 607 B.C.E. kusikila mu
(myaka iili 2,520): October 1914 C.E.
Daniele 4:16, 25 (Bwami bwabu Mesiya bwakkazikwa.
Amubone Cibalo 6 mubbuku eli.)
Iziindi zyotatwe acisela December 1914 kusikila mu June 1918
(Imazuba aali 1,260): (Banakristo bananike bapenzyegwa.
Daniele 7:25; 12:7 Amubone Cibalo 9 mubbuku eli.)
Mangolezya June 1 naa 15, 1938, kusikila mu
amafwumofwumo aali 2,300: October 8 naa 22, 1944
Daniele 8:14 (“Inkamu Impati” yalibonya, iyabuyungi-
zigwa. Amubone Cibalo 10 mubbuku eli.)
Insondo zili 70 455 B.C.E. kusikila mu 36 C.E.
(myaka iili 490): (Ikuboola kwa Mesiya alimwi amulimo
Daniele 9:24-27 wakwe waanyika. Amubone Cibalo 11
mubbuku eli.)
Mazuba aali 1,290: January 1919 kusikila mu
Daniele 12:11 September 1922
(Banakristo bananike babuka
akuyaambele munzila yakumuuya.)
Imazuba aali 1,335: September 1922 kusikila
Daniele 12:12 mu May 1926
(Banakristo bananike baba basicoolwe)
[Zifwanikiso izili apeeji 287]
Ibabelesi ba Jehovah bakatuminwa kuntolongo ku Atlanta, Georgia mu U.S.A. Ikuzwa kulumwensyi kuya kululyo: (ibakkede) A. H. Macmillan, J. F. Rutherford, W. E. Van Amburgh; (ibaimvwi) G. H. Fisher, R. J. Martin, G. DeCecca, F. H. Robison, alimwi a C. J. Woodworth
[Zifwanikiso izili apeeji 299]
Imiswaangano mipati-pati yakali kucitilwa ku Cedar Point, Ohio mu U.S.A. mu 1919 (atala) alimwi amu 1922 (ansi)
[Cifwanikiso icili apeeji 302]
