Ilusyomo Lwabo Lwakafwutuka Mapenzi Oonse
Cibalo 5
Ilusyomo Lwabo Lwakafwutuka Mapenzi Oonse
1. Ino banji balimvwa buti kujatikizya kulyaaba kuli Leza alimwi akucisi cabo?
SENA mweelede kulyaaba kuli Leza naa kunyika momukkala? Ibanji inga baingula kuti ‘Ndilamulemeka Leza antoomwe acisi. Ndilamukomba Leza kweelanaa mbobwaamba bukombi bwangu; pele ndilacilemeka acalo cisi cangu.’
2. Ino mwami wa Babuloni wakali kubeleka buti mulimo wabukombi alimwi awabweendelezi?
2 Ilwaandano akati kakulyaaba kubukombi alimwi akucisi lulakonzya kalutaboneki kapati pe sunu, pele kuciindi ca Babuloni wansiku tiilwakaliko buya pe. Ee, izintu buyo alimwi azintu zisetekene zyakalinjileni kapati cakuti lwaandaano tiilwakali kuboneka zimwi ziindi. Professor Charles F. Pfeiffer wakalemba kuti: “Mu Babuloni wansiku imwami wakali kubeleka kali Mupaizi Mupati alimwi wakali mweendelezi wacisi. Wakali kutuula zipaizyo alimwi nguwakali kusala mbobeelede kukomba bantu bakwe.”
3. Ncinzi citondezya kuti Nebukadinezara wakali muntu mukombi kapati?
3 Amulange Mwami Nebukadinezara. Izina lyakwe lyaamba kuti “O Nebo, Komukwabilila Simulyazina!” Nebo wakali leza wa Babuloni wabusongo abulimi. Nebukadinezara wakali muntu mukombi. Mbubwenya mbuli mbotwabona kale musyule, wakayaka akubotya matempele aabaleza banji ba Babuloni alimwi wakali lyaabide kapati kuli Marduki walo ngwaakali kulumba akaambo kakuzunda munkondo. * Alimwi kuboneka kuti Nebukadinezara wakali kwaasyoma kapati makani aakusonda kutegwa alibambile nzila zyakulwana.—Ezekieli 21:18-23.
4. Amupandulule mbubwakadumide bukombi mu Babuloni.
4 Masimpe, ibukombi bwakali dumide kapati mu Babuloni yoonse. Oyu munzi wakajisi matempele aainda ku 50 mwalo mwakali kukombelwa baleza baalumi abakaintu bali mbobabede kubikkilizya abaleza botatwe ba Anu (leza wajulu), Enlil (leza wanyika, muwo alimwi aguwo) alimwi a Ea (leza uulanganya maanzi). Abambi baleza botatwe bakali Sin (leza wamwezi), Shamash (leza wazuba) alimwi a Ishtar (leza mukaintu waluzyalo). Busondi, bucape alimwi akulanga zyamujulu zyakali zintu ziyandika kapati mubukombi bwa Babuloni.
5. Mbuyumuyumu nzi bwakaletwaa bukkale bwabukombi bwa Babuloni kuli bama Juda baange?
5 Ikupona akati kabantu bakali kukomba baleza banji kwakali kuleta buyumuyumu kapati kubaange bana Juda. Imyaanda yamyaka iili mbwiibede musyule, Musa wakali bacenjezyede bana Israyeli kuti bayoonjila mumapenzi kuti naa basala kuzangila Similawo Mupati. Musa wakabaambila kuti: “Jehova uyoomulonzya, nywebo amwami ngomuyoolibikila, kucisi ncemutezi, nywebo nebaba bamauso, nkabela oko muyookomba baleza beenzu, baleza bazisamu abamabwe.”—Deuteronomo 28:15, 36.
6. Ino nkaambo nzi kukkala mu Babuloni ncokwakaleta penzi lilibedelede kuli ba Daniele, Hananiya, Misayeli alimwi a Azariya?
6 Lino bama Juda bakalijana mumapenzi ngaonya ayo. Ikuzumanana kusyomeka kuli Jehova cakali cintu cikatazya ikapati kuli Daniele, Hananiya, Misayeli alimwi a Azariya. Aba bakubusi bone bana Hebrayo bakasalidwe kuti bayiisigwe mulimo wamfwulumende. (Daniele 1:3-5) Amuyeeye kuti mane bakapegwaa mazina aabuna Babuloni—Belitsazara, Sadrake, Mesaki alimwi a Abedinego—ambweni kutegwa babakulwaizye kuzibila mubukkale bwabo bupya. * Ikukaka kwabaalumi aaba kukomba baleza bamucisi kwakali kunoolibonya buya atuba akaambo kazyuuno zyaatala nzyobakapedwe—mane nokwakaambwa kuti bayanda kubukila mfwulumende.
ICIKOZYANYO CANGOLIDA CALETA KULIBILIKA
7. (a) Amucipandulule cikozyanyo ncaakaimika Nebukadinezara. (b) Ino cakaimikilwa nzi cikozyanyo eco?
7 Kulibonya kuti Nebukadinezara wakaimika cikozyanyo cangolida mucibanda ca Dura mukusoleka kuyumya lukamantano lwabwami bwakwe. Mubulamfwu cakali atukokola tuli 60, mubwamba cakali atukokola tuli 6. * Bamwi basyoma kuti cikozyanyo eci cakali musemu buyo. Cilangilwa kuti cakalijisi cikkazikilo cilamfwu kapati alo aakabikkidwe cikozyanyo cipati cili mbuli muntu ambweni cakali kwiiminina Nebukadinezara lwakwe naa leza Nebo. Kufwumbwa mbocinga cayeeyelwa, eci cikozyanyo cilamfwu cakali kwiiminina Bwami bwa Babuloni. Aboobo cakabikkilwa kuti cibonwe akulemekwa.—Daniele 3:1.
8. (a) Ino mbaani bakatambidwe kupobwe lyacikozyanyo, alimwi ncinzi ncobakeelede kucita boonse abo bakaliko? (b) Ncisubulo nzi cakabikkidwe akaambo kakukaka kuvwundama kumbele aacikozyanyo?
8 Nebukadinezara wakabamba pobwe lyakuti citalike kukombwa. Wakabunganya beendelezi bazisi, bangambela, bami, basinkuta, basimubambamali, babetesi, basikwiiminina abasilutwe boonse bazisi. Sikoongolola wakaambilizya ategwa: “Mwalaililwa nubantu bamisyobo yoonse azisi zyoonse amyaambo yoonse, kuti kufumbwa ciindi nimuswiilila ijwi lyamweembo amilozi akantimbwa anyeele acinamondonga amutetele aziimbyo zyoonse, muleelede kuvundama akukotamina cikozyanyo cangolida mwami Nebukadinezara ncaimikide. Lino kufumbwa muntu uukaka kuvundama akucikotamina, uyootolwa ndilyonya akuwaalwa mubbila lyamulilo wamabangabanga.”—Daniele 3:2-6.
9. Ino kuvwundamina cikozyanyo ncaakaimika Nebukadinezara kwakali kwiiminina nzi?
9 Bamwi basyoma kuti Nebukadinezara wakabamba pobwe eli kutegwa asinikizye bama Juda kuti baleke kukomba Jehova. Aka tiikakali nkakaambo pe, nkaambo balikke babelesi bamfwulumende mbibakatambidwe kupobwe eli. Aboobo bama Juda bakali kukonzya kujanika mbabaabo balikke ibakali kubeleka mumfwulumende. Elyo kulibonya kuti ikuvwundamina cikozyanyo cakali cilengwa cakakanzidwe kuti ciyumye lukamantano kuciinga cabeendelezi. Haabupampu John F. Walvoord waamba kuti: “Ikubatamba boobu babelesi yakali nzila imwi yakutondezya nguzu zyabwami bwa Nebukadinezara pele alimwi cakali kuyandika ikutegwa baleza bazibwe balo ibakali kugwasilizya mukuzunda kwabo kweelana ambubakali kuyeeya.”
IBABELESI BA JEHOVA BAKAKA KUJOKOLOKA
10. Nkaambo nzi ncokwakali kunga takubi penzi kuli baabo batali bama Juda ikutobela malailile aa Nebukadinezara?
10 Nokuba kuti bunji bwabantu bakabungene kumbele aacikozyanyo ca Nebukadinezara bakalilyaabide kuli baleza babo baandeene-andeene, kunyina mbubakali kunga balimvwa pe ikujatikizya kucikomba. Umwi sikwiiya Bbaibbele wakapandulula kuti: “Boonse bakalizibide kukomba mituni elyo ikukomba leza omwe tiikwakabakasya kulemeka baleza bambi.” Wakazumanana ategwa: “Cakaleelenye buyo amizeezo yakadumide yabasikukomba mituni yakuti kwakali baleza banji . . . akuti kunyina nocakalubide pe ikulemeka leza wabantu bambi naa cisi.”
11. Nkaambo nzi ncobakakakila kuvwundama kumbele aacikozyanyo ba Sadrake, Mesaki alimwi a Abedinego?
11 Nokuba boobo, kuba Juda izintu zyakalaandeene. Bakalaililwa a Leza wabo Jehova kuti: “Utalicitili cikozyanyo cibezedwe cacintu cili buti cili kujulu nanka cili ansi ano nanka cili mumaanzi kunsi anyika. Utazikotamini nekuba kuzimanina milimo, nkaambo ndime Jehova Leza wako, ndi Leza sibuzuba.” (Kulonga 20:4, 5) Aboobo, inyimbo nozyakatalika elyo abo bakabungene nobakavwundamina cikozyanyo, ibakubusi bana Hebrayo botatwe—Sadrake, Mesaki alimwi a Abedinego—bakacaala kabaimvwi.—Daniele 3:7.
12. Ino ba Kasidi bamwi ntwaambo nzi ntobakabejelezya bana Hebrayo botatwe, alimwi nkaambo nzi?
12 Ikukaka kukomba cikozyanyo nkobakakaka babelesi botatwe bana Hebrayo kwakabanyemya ba Kasidi bamwi. Tiibakasowa ciindi pe, bakaunka kumwami ‘akubikkila ba Juda twaambo.’ * Tiibakali kuyanda pe kuti bamvwe bupanduluzi. Akaambo kakuti bakali kuyanda kuti bana Hebrayo bapegwe cisubulo akaambo kakutasyomeka alimwi akubukila mfwulumende, basikubatamikizya bakaamba kuti: “Kuli bamwi ba-Juda mbobikide mumilimo yacisi ca-Babuloni, nkokuti Sadrake, Mesaki a-Abedinego. Aba bantu tababiki myoyo yabo kumajwi aako, O mwami. Tabakombi baleza bako, acikozyanyo cangolida ncoimikide tabacikotamini pe.”—Daniele 3:8-12.
13, 14. Ino Nebukadinezara wakalimvwa buti kujatikizya nzila njobakasala ba Sadrake, Mesaki alimwi a Abedinego?
13 Cakamutyompya kaka Nebukadinezara kuti bana Hebrayo botatwe tiibakatobela malailile aakwe! Tiicakadoonekwa pe kuti tanaakazwidilila ikucinca mizeezo yaba Sadrake, Mesaki alimwi a Abedinego kuti babe baiminizi basyomeka ba Bwami bwa Babuloni. Sena tanaakabayiisya mubusongo bwaba Kasidi? Kayi wakaacinca amazina aabo! Pele ikuti naa Nebukadinezara wakali kuyeeya kuti lwiiyo lusumpukide lwakali kuyoobayiisya nzila impya yabukombi naa kuti ikucinca mazina aabo kwakali kuyoocinca ziimo zyabo, wakalilubizide kapati. Sadrake, Mesaki alimwi a Abedinego bakazumanana kuba babelesi ba Jehova basyomeka.
14 Imwami Nebukadinezara wakanyema kapati. Ndilyonya wakaita ba Sadrake, Mesaki alimwi a Abedinego. Wakabuzya ategwa: “Sa aya makani ngaakusinizya, O Sadrake a-Mesaki a-Abedinego? Sa tamulemeki baleza bangu nekuba kukotamina cikozyanyo cangolida ncendakaimika?” Icakutadooneka Nebukadinezara wakaamba majwi ayo kagambidwe kapati. Kayi ambweni wakali kuyeeya kuti, ‘Ino baalumi botatwe ibalaamanu buya inga baalilwa buti kutobela malailile aya mauba-uba—alo aakali kwaamba cisubulo kuti naa atatobelwa?’—Daniele 3:13, 14.
15, 16. Ino Nebukadinezara wakabapa coolwe nzi bakubusi bana Hebrayo?
15 Nebukadinezara wakalilibambilide ikupa bana Hebrayo botatwe ciindi cimbi. Wakaamba kuti: “Amuswiilile! Na mwazumina kuti, kufumbwa ciindi nemumvwa ijwi lyamweembo, milozi, kantimbwa, nyeele, cinamondonga, mutetele, aziimbyo zyoonse, kuvundama akukotamina cikozyanyo ncendakapanga, mbubo. Pele na mwakaka kukotama, muyoowaalwa ndilyonya mukati kabbila lyamulilo wamabangabanga. Lino nguli Leza uuyoomuvuna mumaanza aangu?”—Daniele 3:15.
16 Kuboneka kuti iciiyo cacikozyanyo camuciloto (icilembedwe kuli Daniele caandaano ca 2) kunyinaa mbucakaijatikizya pe mizeezo alimwi amoyo wa Nebukadinezara. Ambweni wakali kalubide kale kaambo nkakaambide kuli Daniele kakuti: “Leza wanu ngu-Leza wabaleza, mupati wabami.” (Daniele 2:47) Lino Nebukadinezara wakaboneka mbuli kuti wakali kukazyanyaa Jehova kaamba kuti naba Nguwe tanaakali kukonzya kufwutula bana Hebrayo kucisubulo cakali kumbele lyabo.
17. Ino ba Sadrake, Mesaki alimwi a Abedinego bakacicita buti coolwe eco camwami?
17 Sadrake, Mesaki a Abedinego tiibakali kuyandika kuliyeeya mumakani aya. Cakutasowa ciindi bakaingula ategwa: “O Nebukadinezara, taakwe cintu ncetukonzya kukwaambila mumakani aya. Na Leza wesu ngotukomba ulijisi inguzu zyakutuvuna kuzwa kubbila lyamulilo, wamabangabanga, uyootuvuna mumaanza aako, O mwami. Nekubaboobo na tacili boobo kuzibwe kulinduwe, O Mwami, kuti twakaka kukomba baleza bako akukotamina cikozyanyo cangolida ncowakabika.”—Daniele 3:16-18.
MUBBILA LYAMULILO WAMABANGABANGA!
18, 19. Ncinzi cakacitika ciindi bakubusi botatwe bana Hebrayo nobakawaalilwa mubbila lyamulilo wamabangabanga?
18 Akaambo kakunyema kapati, Nebukadinezara wakalailila babelesi bakwe kuti bbila lisoselwe ziindi zili musanu azibili kwiinda mbolyakali kuumpwa lyoonse. Mpoonya wakalailila “bamwi bantu, baalumi basintaze” kuti baange ba Sadrake, Mesaki a Abedinego akubawaala “mubbila lyamulilo wamabangabanga.” Bakaatobela malailile aamwami akuwaala bana Hebrayo botatwe mumulilo kabaangidwe kabasamide zikobela zyabo—ambweni kutegwa bafwambaane kupya. Nokuba boobo, ibabelesi ba Nebukadinezara mbibakajayigwaa mulilo.—Daniele 3:19-22.
19 Pele kuli cintu cimwi cigambya cakali kucitika. Nokuba kuti ba Sadrake, Mesaki alimwi a Abedinego bakali mubbila lyamulilo, imabangabanga kunyina naakabaumpa pe. Amuyeeye buyo mbwaakagambwa Nebukadinezara! Bakawaalwa mumulilo uuyakisya kabaangidwe kabotu-kabotu pele bakacili baumi. Bakali kweendeenda cakulikwaya mumulilo! Pele kuli acimbi ncaakabona Nebukadinezara. Wakabuzya basinkuta bakwe basyomeka ategwa: “Sa teensi bantu botatwe mbetwawaala kabaangidwe mukati kabbila lyamulilo?” Bakaingula ategwa: “Mbukabede, O mwami.” Nebukadinezara wakati: “Ma! Ndabona bone baagunwidwe baleendeenda mukati kamulilo. Tabapiide, pe, abuni[i]ni. Alimwi ciwa camuntu wane cili mbuli ciwa caumwi wabaleza.”—Daniele 3:23-25.
20, 21. (a) Ncinzi ncaakabona Nebukadinezara kujatikizya Sadrake, Mesaki alimwi a Abedinego ciindi nobakazwa mubbila lyamulilo? (b) Ncinzi ncaakasinikizigwa kuzumina Nebukadinezara?
20 Nebukadinezara wakaswena afwiifwi kumulyango wabbila lyamulilo wamabangabanga. Wakaita wati: “Noba-Sadrake, a-Mesaki a-Abedinego, balanda ba-Leza wakujulu, amuzwe, muboole okuno.” Ibana Hebrayo botatwe bakazwa mukati kamulilo. Icakutadooneka boonse abo bakalibonena maleele aya—kubikkilizya abeendelezi bazisi, bangambela, bami abasinkuta—bakagambwa kapati. Cakali mbuli kuti aba bakubusi botatwe kunyina anobakanjila buya amubbila lyamulilo! Kunyina anobakanunka mulilo pe, alimwi kunyina susu lyabo lyakumutwe lyakakokonyana.—Daniele 3:26-27.
21 Lino Mwami Nebukadinezara wakasinikizigwa kuziba kuti Jehova ngu Leza wakujulu. Wakaamba kuti “Alumbwe Leza waba-Sadrake a-Mesaki a-Abedinego, iwakatuma angelo wakwe akuvuna balanda bakwe ibakamusyoma, ibakakaka ijwi lyamwami akwaaba mibili yabo kuti batakombi na kukotamina leza naba umwi cita Leza wabo beni.” Mpoonya mwami wakayungizya kucenjezya oku: “Ndabika mulao wakuti, akati kabantu bamisyobo yoonse amyaambo yoonse, kufumbwa muntu uuamba cakusampaula Leza waba-Sadrake, a-Mesaki a-Abedinego uyoogonkelwa zizo zyakwe, aŋanda yakwe iyooba mafwisila. Nkaambo taakwe Leza umbi uukonzya kuvuna obo.” Lino aba bana Hebrayo botatwe bakayandwa alimwi kumwami elyo ‘bakasumpuka mucisi ca Babuloni.’—Daniele 3:28-30.
ILUSYOMO MBOLUSUKUSIGWA SUNU
22. Ino bukkale bwababelesi ba Jehova basunu bukozyenye buti abwaba Sadrake, Mesaki alimwi a Abedinego?
22 Ibakombi ba Jehova sunu bali mubukkale bukozyanya aboobo bwaba Sadrake, Mesaki alimwi a Abedinego. Ee, ibantu ba Leza balakonzya kabatali mubuzike ncobeni. Pele Jesu wakaamba kuti basikumutobela ‘tabakabi banyika’ pe. (Johane 17:14) ‘Mbaamuzwakule’ mukuti tabatobeli zilengwa, iziimo alimwi amicito yabaabo babazingulukide iiteendelani amagwalo. Mbubwenya mbuli mbwaakalemba mwaapostolo Paulo, Ibanakristo tabeelede ‘kukozyanisigwaa ziyanza zyaciindi ecino.’—Ba-Roma 12:2.
23. Ino bana Hebrayo botatwe bakatondezya buti kusyomeka, alimwi mbuti mbobanga batobela cikozyanyo cabo Banakristo basunu?
23 Ibana Hebrayo botatwe bakakaka kukozyanisigwaa bweende bwa Babuloni. Ikuyiisigwa kubotu mubusongo bwaba Kasidi kunyina nokwakabazungaanya pe. Iciimo cabo kumakani aabukombi tiicakali kukonzya kucincwa kwiinda mukubandika alimwi bulemu boonse bakali kubupa kuli Jehova. Abalo Banakristo sunu beelede kwiima nji mbubwenya obo. Tabeelede kulisenda akaambo kakuti balaandeene abaabo bali munyika. Masimpe “nyika ilamana, azisusi zyayo.” (1 Johane 2:17) Aboobo inga waba muzeezo wabufwubafwuba alimwi wabuyo ikuti twatobela bweende obu bwazintu ibuya kumamanino.
24. Ino ciimo ca Banakristo beni-beni cikozyenye buti acabana Hebrayo botatwe?
24 Ibanakristo beelede kwiicenjelela misyobo yoonse yamituni kubikkilizya ayeeyo iitalibonyi kabotu. * (1 Johane 5:21) Ba Sadrake, Mesaki alimwi a Abedinego bakaima cakulibombya alimwi cabulemu kumbele aacikozyanyo cangolida pele bakaziba kuti ikucivwundamina teekwakali kwaamba kucipa bulemu kwalo. Kwakali kucikomba elyo kutola lubazu nokwakanyemya Jehova. (Deuteronomo 5:8-10) John F. Walvoord wakalemba kuti: “Oku kwakali kusuluta ndembela nokuba kuti akaambo kakunjilana kwabulemu bwabukombi alimwi abwacisi kulakonzya kwakali amuzeezo wabukombi.” Abalo Banakristo beni-beni sunu balaima nji kukukaka kukomba mituni.
25. Nciiyo nzi ncomwayiya kuzwa kucaano eci cakacitika ncobeni caba Sadrake, Mesaki alimwi a Abedinego?
25 Icibalo camu Bbaibbele ca Sadrake, Mesaki a Abedinego cipa cikozyanyo cini-cini kuli baabo boonse bakanzide kukomba Jehova alikke. Kulibonya kuti mwaapostolo Paulo wakali kuyeeya bana Hebrayo aba botatwe ciindi naakali kwaamba bantu banji ibakali kusyomeka kubikkilizya abaabo boonse “bakazimya bukali bwamulilo.” (Ba-Hebrayo 11:33, 34) Jehova uyoobalongezya boonse baiya lusyomo luli boobu. Ibana Hebrayo botatwe bakafwutulwa kuzwa mubbila lyamulilo wamabangabanga, pele tulakonzya kusyoma kuti uyoobusya boonse ibafwa kabasyomeka akubalongezya abuumi butamani. Munzila zyoonse zyobile, Jehova “ulabamba buumi bwabasalali bakwe, ulabavwuna kumaanza aabasizibi.”—Intembauzyo 97:10, NW.
Bupanduluzi buyungizidwe
^ munc. 3 Bamwi basyoma kuti Marduki walo wakali kulangwa kuti nguwakatalisya Bwami bwa Babuloni wiiminina Nimrodi wakacitwa buleza. Nokuba boobo tatuli masimpe pe kujatikizya kaambo aka.
^ munc. 6 Izina lya “Belitsazara” lyaamba kuti “Kwabilila Buumi bwa Mwami.” Ilya “Sadrake” lilakonzya kwaamba kuti “Malailile aa Aku,” leza wamwezi muna Sumariya. Ilya “Mesaki” ambweni lyaamba leza muna Sumariya, alimwi lya “Abedinego” lyaamba kuti “Mubelesi wa Nego” naa Nebo.
^ munc. 7 Balanga mbucakali cipati cikozyanyo eci, basikwiiya Bbaibbele bamwi basyoma kuti cakali cacisamu mpoonya atala cakabumbailwa ngolida.
^ munc. 12 Ibbala lya Ciaramu lyakasandululwa kuti “kubikkila twaambo” lyaamba ‘kulya zibeela-beela’ zyamuntu—mbuli kuti nkumutafwuna buya kwiinda mukumubejelezya.
^ munc. 24 Mucikozyanyo, mu Bbaibbele ikukomba mituni kubikkidwe antoomwe abusindya amunyono.—Ba-Filipi 3:18, 19; Ba-Kolose 3:5.
NCINZI NCOMWAIYA?
• Ino nkaambo nzi ba Sadrake, Mesaki alimwi a Abedinego ncobakakakila kuvwundama kumbele aacikozyanyo ncaakaimika Nebukadinezara?
• Ino Nebukadinezara wakalimvwa buti kujatikizya nzila njobakasala bakubusi botatwe bana Hebrayo?
• Ino Jehova wakabalongezya buti bana Hebrayo botatwe akaambo kalusyomo lwabo?
• Ncinzi ncomwaiya kuzwa kucaano eci cakacitika ncobeni caba Sadrake, Mesaki alimwi a Abedinego?
[[Mibuzyo yaciiyo]]
[Cifwanikiso icili apeeji 68]
[Zifwanikiso izili apeeji 70]
1. Ingazi yatempele (ziggurat) mu Babuloni
2. Itempele lya Marduki
3. Izifwanikiso izili alubulo lwa bronze izitondezya leza Marduki (kulumwensi) alimwi a Nebo (kululyo) kabaimvwi anzoka
4. Icifwanikiso ca Nebukadinezara, walo wakazibidwe kapati kumakani aamulimo wakwe wamayake
[Cifwanikiso icili apeeji 76]
[Cifwanikiso icili apeeji 78]
