Cibalo 7

Imabala One Aakasandula Nyika

1. Ino mabala one aakalembwa abwaanda kaindi akazijatikizya buti zintu?

IMABALA buyo one alilembedwe abwaanda. Pele mabala ayo one akayoosya muleli singuzu mane kuyanda kumucita ciyanga buya. Akali kwaambilizya kuwisigwa kwabami bobile, ilufwu lwaumwi wabo alimwi amamanino aacisi canguzu ceendelezya nyika. Aya mabala akapa kuti ibukombi bwakali kulemekwa busampaulwe. Ikapati, akasumpula bukombi bwa Jehova ibusalala akusinizya bulelo bwakwe kuciindi nobatakali kubikkila kapati maanu bantu kutwaambo toonse tobile otu. Kayi mabala ngaonya ayo akaamba akujatikizya zintu zicitika munyika sunu! Ino mabala one buyo inga azicita buti zintu zyoonse ezi? Atubone.

2. (a) Ncinzi cakacitika mu Babuloni naakafwa Nebukadinezara? (b) Mwami nzi lino wakali kulela?

² Makumi aamyaka aali mbwaabede akainda kuzwa ciindi nozyakapandululwa zintu zilembedwe kucaandaano 4 mubbuku lya Daniele. Ibulelo bwa Mwami Nebukadinezara sikulisumpula bwamyaka iili 43 mu Babuloni bwakamana naakafwa mu 582 B.C.E. Imulongo wabasimulya zina bakazwa kumukwasyi wakwe pele bulelo bwabo bwakali kumana ambweni akaambo kakufwa kufwambaana naa kujayigwa. Limwi mwaalumi uutegwa Nabonidus wakakkala acuuno cabwami kwiinda mukuzanga. Mbwaakali mwanaa mupaizi mukaintu waleza wamwezi Sin, kulibonya kuti Nabonidus tanaakali simukowa waciinga cabwami ca Babuloni. Imabbuku amwi aamba kuti wakakwata mwanaa Nebukadinezara ikutegwa bulelo bwakwe bube mumulawo, wakabikka mwanaakwe Belisazara kuti abe sikulelanyina elyo wakali kumusiya kuti kayendelezya Babuloni  kwaciindi cilamfwu kwamyaka iili mbwiibede. Ikuti kacili boobo, Belisazara wakali muzyukulu wa Nebukadinezara. Ikwiinda muzintu zyakacitikila basyaanyinakulu, sena wakaziba kuti Jehova ngo Leza Mupati uukonzya kusampaula mwami uli woonse? Peepe!—Daniele 4:37.

IPOBWE LYABULA BWEENDELEZI

3. Ino pobwe lya Belisazara lyakali buti?

³ Icibalo ca Daniele casanu citalikaa makani aapobwe. “Mwami Belisazara wakacita ipobwe ipati, watamba cuulu cabasilutwe bakwe, wanywa waini kumeso aabantu abo bali cuulu.” (Daniele 5:1) Mbuli mbomunga mwayeeyela kweelede kuti ŋanda yakabelesyegwa yakali mpati ikutegwa baalumi boonse aba bakkwane antoomwe abamakaintu abasimamambe bamwami. Haabupampu umwi waamba kuti: “Imapobwe aamu Babuloni akali sumpukide kapati nokuba kuti kanjikanji kumamanino bantu bakali kukolwa kapati. Waini iwakali kuulwa kumasi ambi alimwi azyakulya zimwi zinono nzyezyakali kuzuzya matafwule. Mafwuta aanunkilila akali kunga asansailwa muŋanda mukkede bantu; alimwi basikwiimba bakajisi bubi kukkomanisya beenzu babungene.” Kakkede abusena mpobakali kukonzya kumubona boonse, Belisazara wakanywa waini wakwe—wakanywa citaambiki.

4. (a) Nkaambo nzi ncocigambya kuti bana Babuloni bakajisi pobwe masiku mu October 5/6, 539 B.C.E.? (b) Ncinzi cilibonya kuti ncicakabakulwaizya bana Babuloni nobakaboola basikusaala?

⁴ Cilagambya kuti bana Babuloni bakajisi pobwe lili boobu mubuzuba obu masiku—mu October 5/6, 539 B.C.E. Icisi cabo cakali kulwana alimwi zintu tiizyakabeendela kabotu pe. Nabonidus wakazwaa kuzundwa kumpi zyabana Mediya a Persia elyo wakaakuyubila ku Borsippa kumusanza lwaambo aamunzi wa Babuloni. Elyo lino impi zya Koresi zyakabungene anze buyo a Babuloni. Pele takuboneki kuti Belisazara abasilutwe bakwe bakalilibilikide. Kayi imunzi wabo wa Babuloni teewakali kukonzyeka kuzundwa pe! Ibwaanda bwakwe butalikomeneni bwakaimvwi atalaa maziba malamfwu imwakali kwiinda Mulonga mupati wa Firate mbuwakali kukunka akati kamunzi. Kwamyaka  iinda kucuulu, kunyina sinkondonyina wakazundide Babuloni kakunyina buyumuyumu. Aboobo ino inga balibilikila nzi? Ambweni Belisazara wakayeeya kuti ikuyobeka kwabo kwakukkomana kwakali kunga kwatondezya basinkondonyina bakali anze kuti mbaasicamba aboobo batyompwe.

5, 6. Ncinzi ncaakacita Belisazara naakakolwa waini, alimwi nkaambo nzi kucita boobu ncokwakali kutukila kupati kuli Jehova?

⁵ Tiilyakalampa, Belisazara wakakolwa akaambo kakwiindizya kunywa. Mbubwenya bwaamba bbuku lya Tusimpi 20:1, “bukoko bulasampaula.” Masimpe, waini yakapa kuti mwami acite cintu ciinda kubija. Wakalailila kuti zinywido zisalala zyamutempele lya Jehova ziletwe kupobwe. Ezi zinywido izyakabwezegwaa Nebukadinezara naakazunda Jerusalemu zyakeelede kubelesyegwa buyo mubukombi busalala. Nobaba bapaizi bana Juda ibakazumizidwe kuzibelesya mutempele lyaku Jerusalemu musyule, bakali cenjezyedwe kuti batalisofwaazyi.—Daniele 5:2; amweezyanisye Isaya 52:11.

⁶ Nokuba boobo Belisazara wakacijisi cimpangwe mumizeezo yakwe. “Mwami abasilutwe bakwe abanakazi bakwe abasimamambe bakwe . . . bakali kunywa waini akutembaula baleza bangolida abansiliva, bamukuba ababutale, bazisamu abamabwe.” (Daniele 5:3, 4) Aboobo Belisazara wakakanzide kusumpula baleza bakubeja muciindi ca Jehova! Kuboneka kuti eci cakali cilengwa buya kubana Babuloni. Bakali kubanyansya baange bama Juda, bakali kusampaula bukombi bwabo alimwi akutabasyomezya kuyakupilukila kumunzi wabo mubotu. (Intembauzyo 137:1-3; Isaya 14:16, 17) Oyu mwami wakakoledwe ambweni wakali kuyeeya kuti ikusampaula baange alimwi akutukila Leza wabo kulakkomanisya banakazi bakwe alimwi abasilutwe akucita kuti alibonye kuti ngusinguzu kapati. * Pele ikuti naa Belisazara wakalimvwa kuti ngusinguzu kunyina ankuzyakamutola nguzu ezyo.

 MALEMBO ABWAANDA

7, 8. Ino pobwe lya Belisazara lyakanyonganisigwa buti, alimwi cakamujatikizya buti mwami eci?

⁷ Icibalo cakasololelwaa muuya caamba kuti: “Lino kuciindi eco nciconya kwakaboneka minwe yajanza lyamuntu ilalemba abulambo bwaŋanda yamwami kunembo lyaciimikilo calampi, nkabela mwami wakabona ijanza ilyakali kulemba.” (Daniele 5:5) Cakali kuyoosya kaka eci! Ijanza lyakaide kulibonya, kalyeempauka mumuwo afwaafwi acibeela cabwaanda kwakali mumuni. Nkujana boonse beenzu bakali mupobwe lyabaleka, mbubakali kuti wii kwiide kulangilila. Ijanza lyakatalika kulemba mulumbe uutabaliki pe abwaanda. * Eco cintu cakali kuyoosya kapati akutalubika cakuti kusikila sunu, mumisyobo imwi bantu babelesya kaambo kakuti “bulembo abwaanda” kuti kabacenjezya ntenda iili afwaafwi kucitika.

⁸ Wakalimvwa buti mwami oyu simatunta walo wakasolekede kulisumpula antoomwe abaleza bakwe muciindi cakusumpula Jehova? “Mpawo busyu bwamwami bwakausana, miyeeyo yakwe yakamuyoosya, manungilo aatusolo twakwe akatontola, amazwi aakwe akali kugontana.” (Daniele 5:6) Belisazara wakali kuyanda kuti alibonye kuti nguuyinda kukomena alimwi ngomwami kubalelwa bakwe. Pele wakaide kuzingimana akaambo kakuyoowa kapati—ibusyu bwakwe bwakasyulungana, itusolo twakwe twakatontola, imubili woonse wakali kukankama kapati cakuti mazwi akwe akali kugontana. Ee, majwi aa Davida akali aamasimpe ncobeni alo ngaakali kwaambila Jehova mulwiimbo aakuti: “Basikulisumpula ulabalanga kuti ubafwiinsye.”—2 Samuele 22:1, 28; amweezyanisye Tusimpi 18:12.

9. (a) Ino nkaambo nzi kuyoowa kwa Belisazara ncokwatakakozyene akuyoowa kwabunaleza? (b) Ino mwami ncinzi ncaakasyomezya kupa basongo ba Babuloni?

⁹ Kweelede kubonwa kuti ikuyoowa kwa Belisazara tiikwakakozyenye pe akuyoowa kwabunaleza, ikuyoowa Jehova kwini-kwini kwalo kuli ngamatalikilo aabusongo boonse. (Tusimpi  9:10) Oku kwakali kuyoowa buyo alimwi kunyina anokwakapa kuti oyu mwami wakali kukankama abe musongo. * Muciindi cakuti alombe kulekelelwa kuli Leza ngwaakazwaa kutukila, wakoongolola kwiita “basondi, ba-kasidi abaŋanga.” Mane wakaambilizya kuti: “Kufumbwa muntu uubala malembo aya akupandulula mbwaamba, uyoosamikwa zisani zisalala pyu akubikilwa luwenje lwangolida munsingo yakwe, alimwi uyooba mweendelezi watatu wamucisi.” (Daniele 5:7) Imuleli watatu wakali kunga waba singuzu kapati katobela buyo bami balela bobile, Nabonidus alimwi a Belisazara. Icuuno cili boobu cilakonzya cakabikkilidwe buyo mwanaa Belisazara mupati. Imwami wakaliyandide kapati kuti mulumbe oyo wamaleele upandululwe!

10. Ncinzi cakacitika kubaalumi basongo mukusoleka kwabo kuti bapandulule malembo aakali abwaanda?

¹⁰ Baalumi basongo bakazula muŋanda eyo mpati. Tiibakali bakuyandaula buya pe nkaambo Babuloni wakali munzi wakabbide buya mubukombi bwakubeja alimwi iwakajisi matempele aali mbwaabede. Ibaalumi bakali kutaminina kuti bakali kukonzya kupandulula malweza alimwi amalembo aatabaliki bakaliko banji. Beelede kuti bakakkomana kapati basongo aba akaambo kakubaa coolwe cili boobu. Nceeci coolwe cakucita mulimo wabo kumbele aabantu balemenede, ikutegwa bayandwe kumwami akupegwa cuuno cisumpukide kapati. Pele tiibakacikonzya pe! “Bakakacilwa kubala malembo akupandulwida mwami mbwaamba.” *—Daniele 5:8.

11. Ino nkaambo nzi baalumi basongo bana Babuloni ncobakaalililwa kubala malembo?

 ¹¹ Tacizibidwe pe kuti naa baalumi basongo bana Babuloni bakajana kuti malembo—imabala eni—taapandululiki. Ikuti kakuli boobo, aba baalumi bampelenge nocakababeda coolwe cakwaanza bupanduluzi buli boonse ambweni nobuba bomwe buyo bwakweena mwami. Imuzeezo umwi ngwakuti imabala akali kubalika. Nokuba boobo, mbwaanga milaka iili mbuli Ciaramu alimwi a Cihebrayo yakali kulembwa buyo kakunyina mavawelo, ibbala lyomwe-lyomwe lilakonzya lyakalijisi bupanduluzi buli mbobubede. Aboobo, ibaalumi basongo balalangilwa kuti nobatakakonzya pe kuyeeya kuti naa ngali mabala aambwa. Kufwumbwa naa bakakonzya kucita boobo, bakaalilwa kuziba ncaamba mabala kutegwa baapandulule. Nozitazizilwe zintu mbuzyakabede bwini, icamasimpe ncakuti: Baalumi basongo bana Babuloni bakaalilwa—icuusisya!

12. Ino kwakatondezya nzi kwaalilwa kwabasongo?

¹² Aboobo ibaalumi basongo bakazibwa kuti mbaasikuunina akuti ibukombi bwabo bwakali kulemekwa mbwakubeja. Bakali kutyompya kaka! Belisazara naakabona kuti ilusyomo lwakwe mubaalumi aba lwakali lwabuyo wakaindila kuyoowa, ibusyu bwakwe bwakaindila kuusana alimwi basilutwe bakwe “bakagamba.” *—Daniele 5:9.

IMWAALUMI MUSONGO WAITWA

13. (a) Nkaambo nzi namalelo ncaakayeeyela kuti Daniele aitwe? (b) Mbuumi bwamusyobo nzi mbwaakali kupona Daniele?

¹³ Aciindi eci cikatazide, namalelo—wakanjila muŋanda yapobwe. Wakakumvwa kuyobana kupobwe, elyo kuli muntu ngwaakazi iwakali kukonzya kupandulula malembo aakali abwaanda. Makumi aamyaka aakainda, usyi namalelo, Nebukadinezara wakasalide Daniele kuti ngomupati akati kabasongo bakwe boonse. Namalelo wakamuyeeya kuti wakali  mwaalumi wakajisi “muuya mubotu cakwiinda, aluzibo, abucenjezu.” Mbwaanga kuboneka kuti Daniele tanaakazibidwe kuli Belisazara, kulalangilwa kuti oyu musinsimi wakazwa acuuno cabweendelezi naakafwa Nebukadinezara. Pele icuuno cabulemu tiicakali cintu ciyandika kapati kuli Daniele. Lino ambweni wakalisikide kuma 90 myaka yakwe yakuzyalwa pele kacibelekela Jehova cakusyomeka. Nokuba kuti wakakkala myaka iitandila ku 80 mubuzike mu Babuloni, wakacizibidwe azina lyakwe lya Cihebrayo. Naba namalelo wakamwaamba kuti Daniele ikutali kubelesya zina lyabuna Babuloni ndyaakapedwe cimwi ciindi. Ee, wakakulwaizya mwami ategwa: “Lino aitwe Daniele. Uyoopandulula makani mbwaamba.”—Daniele 1:7; 5:10-12.

14. Ndipenzi nzi ndyaakajana Daniele naakabona malembo abwaanda?

¹⁴ Daniele wakaitwa elyo wakaboola kuli Belisazara. Cakali kujazya nsoni ikulomba lugwasyo kuzwa kumu Juda oyu walo uula Leza ngwaakazwaa kutukila mwami. Pele Belisazara wakasola kweempuzya Daniele wamwaambila kuti ulamupa bulumbu mbubonya—kuba mweendelezi watatu wamucisi—ikuti naa wakonzya kubala akupandulula mabala ayo aamaseseke. (Daniele 5:13-16) Daniele wakatambya meso aakwe kumalembo abwaanda elyo muuya uusalala wakapa kuti akonzye kuziba ncaamba. Wakali mulumbe wakusinganya kuzwa kuli Jehova Leza! Ino Daniele wakali kukonzya buti kwaamba makani aalubeta lubyaabi kumwami oyo wabuyo cantonkola matwi—alimwi kucita boobo kumbele aabanakazi bakwe alimwi abasilutwe? Amuyeeye mbucakamukatazya Daniele! Sena kuli mbwaakazugwa moyo kujatikizya majwi aamwami aakweempuzya alimwi akupegwa buvwubi antoomwe abulemu? Sena musinsimi wakali kunga waubya-ubya kusinganya kwa Jehova?

15, 16. Nciiyo nzi cipati ncaakaalilwa kwiiya Belisazara kuzwa kuzintu zyakacitika musyule, alimwi kwaalilwa kuli boobo kudumide buti sunu?

¹⁵ Daniele wakaambaula cabusicamba ategwa: “Zipo zyako  zisyaale kulinduwe, azilumbyo zyako uzipe umbi. Nekubaboobo njoobala malembo akupandulwida mwami mbwaamba.” (Daniele 5:17) Mpoonya Daniele wakaamba bupati bwa Nebukadinezara, imwami singuzu cakuti wakali kukonzya kujaya, kusumpula naa kufwiinsya uli woonse ngwaasala. Nokuba boobo, Daniele wakayeezya Belisazara kuti Jehova “Leza wakujulu” nguwakamupede bupati Nebukadinezara. Ngu Jehova wakasampaula mwami oyo singuzu naakalisumpula. Ee, Nebukadinezara wakasinikizigwa kuziba kuti “Leza Muntalabala nguuendelezya mubwami bwabantu akubusya kufumbwa ngwayanda kuti abe silutwe wambubo.”—Daniele 5:18-21.

¹⁶ Belisazara “wakaziba makani aya oonse.” Pele taakaiya ciiyo kuzwa kuzintu zyakacitika musyule. Atwaambe kuti, wakaindizya buya walo aacinyonyoono cakacita Nebukadinezara cakulisumpula munzila iitelede elyo wakacita cintu citondezya kuti ulaa cimpangwe cini-cini kuli Jehova. Daniele wakacaamba cinyonyoono camwami. Kunze lyaboobo, Daniele wakaambila Belisazara kumbele aankamu eyo yabukombi bwakubeja kuti baleza bakubeja ‘tabakonzyi kubona nekuba kumvwa nekuba kuziba.’ Imusinsimi wa Leza wakayungizya cabusicamba kuti muciindi cabaleza abo batakwe ankobaya, Jehova ngu Leza “uujisi buumi bwako mumaanza aakwe.” Ikusikila sunu, ibantu balabamba baleza kuzwa kuzintu zitakwe buumi, bakomba mali, milimo, lusumpuko nokuba kulikondelezya. Pele kunyina cintu akati kazyeezi icikonzya kupa buumi. Jehova alikke nguwakapa kuti toonse tubeko, walo uutupa muya ngotuyoya.—Daniele 5:22, 23; Incito 17:24, 25.

KALABULULWA KALABI!

17, 18. Ino akali mabala nzi one aakalembedwe abwaanda, alimwi aamba nzi?

¹⁷ Lino musinsimi uucembeede wakayaambele ikucita cintu cakali kuboneka kuti tacikonzyeki pe kubaalumi basongo bamu Babuloni. Wakabala akupandulula malembo  aakalembedwe abwaanda. Imajwi akali aakuti: “MENE, MENE, TEKEL UPARSIN.” (Daniele 5:24, 25) Ino aamba nzi?

¹⁸ Imabala aya mubwini aamba kuti “impondo, impondo, isyekeli alimwi acisela casyekeli.” Ibbala lyomwe-lyomwe cakali cipimyo campindu yamali, aaya mali akali ndandamikidwe mumulongo kuzwa kumweelwe mupati kusikila kumweelwe musyoonto. Cilakopanya kaka! Nokuba kuti basongo bana Babuloni bakali kunookonzya kwaaziba mabala aya, tacigambyi pe kuti bakaalilwa kwaapandulula.

19. Ino bbala lyakuti “MENE” lyakali kupandulula nzi?

¹⁹ Kwiinda mulugwasyo lwamuuya uusalala wa Leza, Daniele wakapandulula kuti: “Mbuboobu makani mbwaapandululwa. MENE nkokuti Leza wabala mazuba aabwami bwako, wabusisya kumamanino.” (Daniele 5:26) Imakkonsonanti aabbala lyakusaanguna alakonzya kwaamba bbala lya “mpondo” alimwi abbala lya Ciaramu ilyaamba “kubalilwa” naa “kubala” ikweelana amavawelo aakali kubikkwaa sikubala. Daniele wakalizi kabotu-kabotu kuti buzike bwabana Juda bwakasika kumamanino. Mbubwakaambidwe kuti buyootola myaka iili 70, iili 68 yakaliindide kale. (Jeremiya 29:10) Jehova, Sikubamba Ciindi Mupati wakalaabalide kale mazuba aabulelo bwa Babuloni bwanyika yoonse alimwi mamanino akali afwaafwi kapati kwiinda mbubakali kuyeeya boonse bakali kupobwe lya Belisazara. Atwaambe kuti ciindi cakalimanide—ikutali buyo kuli Belisazara pele akuli usyi Nabonidus. Ako kalakonzya kuba nkakaambo bbala lya “MENE” ncolyakalembelwa ziindi zyobile—ikwaambilizya mamanino abami boonse bobile.

20. Ino bbala lya “TEKEL,” lyakali kupandulula nzi, alimwi mbuti mbulyakali kwaamba Belisazara?

²⁰ Pele ibbala lya “TEKEL” lyakalembwa buyo ciindi comwe alimwi munzila yakwaamba buyo cintu comwe. Eci cilakonzya kutondezya kuti lyakagamikidwe buyo kuli Belisazara. Eci cileelede nkaambo wakatondezya kubula bulemu kapati kuli Jehova. Ibbala eli lyaamba “syekeli” pele imakkonsonanti aya alakonzya kwaamba bbala “lyakupimwa.” Aboobo Daniele  wakaamba boobu kuli Belisazara: “TEKEL nkokuti wapimwa muzipimyo, wabula bulemu bweelede.” (Daniele 5:27) Imasi woonse anyina ambwaabede mumeso aa Jehova mbubwenya mbuli kasuko ikali acikkelo. (Isaya 40:15) Anyina nguzu zyakulwana makanze aakwe. Aboobo, ino mwami omwe buyo oyu sikulisumpula inga wacita nzi? Belisazara wakasoleka kulisumpula kwiinda Muleli wakujulu aansi. Oyu muntu buyo uulya maila wakatukila Jehova akusampaula bukombi busalala pele wakajanwa kuti tajisi “bulemu bweelede.” Ee, Belisazara lwakalimweelede kapati lubeta olo lwakali kuboola cakufwambaana!

21. Ino bbala lya “UPARSIN” lyakali buti bbala lilaamabala otatwe, alimwi lyakali kutondezya nzi kujatikizya bukkale bwa Babuloni bwakumbele kacili cisi ceendelezya nyika?

²¹ Ibbala lyamamanino abwaanda lyakali lyakuti “UPARSIN.” Daniele wakalibala mbuli kuti waamba cintu comwe, ikuti “PERESI,” ambweni akaambo kakuti wakali kwaambila mwami omwe mbwaatakaliko umwi. Eli bbala lyakamanizya kalabi ka Jehova kalo kakajisi mabala otatwe. Ibbala lya “uparsin” lyaamba “cisela casyekeli.” Pele imabala ayo alaa bupanduluzi bobile bumbi—“ikwaandaana” alimwi “abana Persia.” Aboobo Daniele wakasinsima kuti: “PERESI nkokuti bwami bwako bwaandaanisigwa, bwapegwa mumaanza aaba-Medi aba-Persia.”—Daniele 5:28.

22. Ino Belisazara wakalimvwa buti nokaapandululwa kalabi, alimwi ulangilwa kuti wakali kulombozya nzi?

²² Aboobo kalabi kakalabululwa. Babuloni wanguzu wakali kulangilwa kuwisigwa lino-lino ampi zyabana Mediya a Persia. Nokuba kuti Belisazara wakausa kapati ikulimvwida kusinganya oku, wakatobela majwi ngaakaambide. Wakaambila babelesi bakwe kuti basamike Daniele zisani zisalala pyu, akubikka luwenje lwangolida munsingo yakwe akoongolola kuti waba mweendelezi watatu wamucisi. (Daniele 5:29) Daniele kunyina naakakaka kupegwa bulemu buli boobu nkaambo wakalizi kuti bwakali kutondezya bulemu bweelede Jehova. Aino, ambweni Belisazara wakali kusyoma kuti ulacesya-cesya  kusinganya kwa Jehova kwiinda mukulemeka musinsimi Wakwe. Ikuti naa mbwaakali kuyeeya obo, wakamuka alimwi kunyina mbucakali kukonzya kumugwasya eco.

IKUWA KWA BABULONI

23. Mbusinsimi nzi bwansiku ibwakali kuzuzikizigwa nociba ciindi nolyakali kucitwa pobwe lya Belisazara?

²³ Nociba ciindi Belisazara abasilutwe bakwe nobakali kunywa kuli baleza babo akusampaula Jehova, kuli cimwi cintu cakali kucitika mumudima anze aaŋanda yamwami. Ibusinsimi bwakaambidwe myaanda yamyaka iitandila kwiibili musyule ikwiinda muli Isaya bwakali kuzuzikizigwa lino. Jehova wakaambide boobu kujatikizya Babuloni: “Kulila kwabo koonse [akaambo kanguwe] ndakulesya.” Ee, ikudyaaminina kubyaabi kwakali kucita munzi oyo kubasale ba Leza kwakali kulangilwa kumanisigwa. Munzila nzi? Ibusinsimi mbubonya bwakaamba kuti: “Koya ukabalwisye, O Elamu; kobasinkinizya, O Media.” Icisi ca Elamu cakazyooba lubazu lwa Persia naakainda mazuba aamusinsimi Isaya. Ikusika kuciindi capobwe lya Belisazara alyalo lyakasinsimidwe mubusinsimi mbubonya bwa Isaya, Persia a Mediya bakakamantana ‘akuya kukulwisya’ ‘akusinkinizya’ Babuloni.—Isaya 21:1, 2, 5, 6.

24. Ntwaambo nzi ntwaakasinsimide Isaya kujatikizya kuwa kwa Babuloni?

²⁴ Atwaambe kuti izina lini lyamusololi wampi ezi lyakasinsimwa mbubwenya mbuli mbuzyakasinsimwa nzila nzyaakali kuyoobelesya munkondo. Imyaka iitandila ku 200 musyule, Isaya wakasinsima kuti Jehova uyoonanika muntu uutegwa Koresi kuti akalwane Babuloni. Iciindi cakulwana kwakwe, izisinkilizyo zyoonse ziyoogwisigwa. Imaanzi aa Babuloni ‘ayooyuminina’ alimwi milyango yakwe mipati iyoosiigwa bukwazi. (Isaya 44:27–45:3) Aboobo mbucakacitika obo. Impi zya Koresi zyakanyona Mulonga wa Firate akuyuminizya maanzi kutegwa bainde mumulonga. Imilyango yakubwaanda bwa Babuloni yakasiigwa bukwazi abalindizi bayamba. Mbubwenya mbuli mbubazuminizya basikwiiya  zyaciindi, oyu munzi wakasaalwa balaamunzi nobakali kupobola. Babuloni wakazundwa kakunyina akulwana kunji. (Jeremiya 51:30) Nokuba boobo kuli muntu umwi wakafwa. Daniele wakaluula kuti: “Mumasiku ayo ngaonya Belisazara mwami waba-Kasidi wakajayigwa, nkabela Dariyo mu-Medi wakatola bwami naakali amyaka iili makumi aali musanu alimwi amyaka yobile.”—Daniele 5:30, 31.

IKWIIYA KUZWA KUMALEMBO AAKALI ABWAANDA

25. (a) Ino nkaambo nzi Babuloni wansiku ncayelela kuba citondezyo cabweende bwabukombi bwakubeja bwanyika yoonse sunu? (b) Ino muunzila nzi mubakajatidwe buzike mu Babuloni babelesi ba Leza basunu?

²⁵ Icibalo cakalembwa kwiinda mumuuya cakuli Daniele  caandaano ca 5 cilatujatikizya kapati swebo. Babuloni wansiku mbubwakali busena bucitilwa bukombi bwakubeja, uleelela kuba cikozyanyo cabwami bwanyika bwabukombi bwakubeja. Kubbuku lya Ciyubunuzyo nkwaambwa kuti muvwuule sikujaya bantu, eyi nkamu yakubeja yanyika yoonse iitwa kuti “BABULONI MUPATI.” (Ciyubunuzyo 17:5) Kakunyina akutobela kucenjezya koonse oku kujatikizya njiisyo zitalemeki Leza alimwi amicito, wabapenzya abo bakambauka kasimpe ka Jwi lya Leza. Mbubwenya mbuli Jerusalemu wansiku alimwi a Juda, ibasyeede akati ka Banakristo bananike ibasyomeka bakali mubuzike mu “BABULONI MUPATI” ciindi ikupenzya kwakali kucitwaa basololi bacikombelo nokwakati ulesye buya mulimo wakukambauka Bwami mu 1918.

26. (a) Ino “BABULONI MUPATI” wakawa buti mu 1919? (b) Nkucenjezya nzi nkotweelede kutobela swebo akwaambila bamwi?

²⁶ Nokuba boobo, “BABULONI MUPATI” wakawa aciindi aatayeeyelwi! Ma! ikuwa kwakwe kwakali kwakaumuumu—mbubwenya mbuli Babuloni wansiku mbwaakawa cakaumuumu mu 539 B.C.E. Nokuba boobo, oku kuwa kwacikozyanyo kwakali kubyaabi kapati. Kwakacitika mu 1919 C.E. ciindi bantu ba Jehova nobakaangululwa mubuzike buna Babuloni akubaa coolwe cakuzuminwaa Leza. Eci cakamana nguzu zya “BABULONI MUPATI” kubantu ba Leza alimwi cakatondezya matalikilo aakuyubununwa kwakwe caantangalala kuti mumpelenge uutasyomeki pe. Ikuwa oko takukonzyi kubambululwa pe alimwi kunyonyoonwa kwakwe kwamamanino kuli afwaafwi. Aboobo ibabelesi ba Jehova balikwaambilizya kucenjezya kwakuti: “Kamuzwa mulinguwe nobantu bangu, kuti mutavwelanizigwi azibi zyakwe.” (Ciyubunuzyo 18:4) Sena mwakutobela kucenjezya oko? Sena mulabaambila bambi kujatikizya kucenjezya oku? *

27, 28. (a) Nkaambo nzi kayandika nkaatakaluba Daniele? (b) Mbumboni nzi mbotujisi bwakuti Jehova uyootola ntaamu lino-lino kunyika eyi mbyaabi yasunu?

 ²⁷ Aboobo malembo ali abwaanda sunu—pele ikutali kuli “BABULONI MUPATI” alikkke. Amuyeeye kaambo aka ikali ngomusemu mubbuku lya Daniele: Jehova ngo Muleli Wakujulu Aansi. Alikke nguujisi nguzu zyakubikka muleli wabantu. (Daniele 4:17, 25; 5:21) Icili coonse cisinkilila makanze aa Jehova cilagwisigwa. Tacinasika buyo ciindi cakuti Jehova atole ntaamu. (Habakuku 2:3) Kuli Daniele, iciindi cili boobu cakasika kali amyaka iili 100 yabuumi bwakwe. Mpoonya wakabona Jehova kagwisya cisi cakali kweendelezya nyika—calo cakali kudyaaminina bantu ba Leza kuzwa kubwana bwakwe.

²⁸ Kuli bumboni butadoonekwi bwakuti Jehova Leza wabikka Muleli wabantu acuuno cakwe cabwami cakujulu. Ikutabikkila maanu nkoitabikkili nyika ku Mwami oyu alimwi akukazya bulelo bwakwe mbuboni bwini-bwini bwakuti Jehova uyoogwisya boonse basikukazya bulelo obu bwa Bwami lino-lino. (Intembauzyo 2:1-11; 2 Petro 3:3-7) Sena mwatola ntaamu akaambo kakumana kwaciindi cesu akusyoma mu Bwami bwa Leza? Ikuti kakuli boobo, nkokuti mwayiya ncobeni kuzwa kumalembo aali abwaanda!

Bupanduluzi buyungizidwe

NCINZI NCOMWAIYA?

• Ino pobwe lya Belisazara lyakanyonganizigwa buti masiku mu October 5/6, mu 539 B.C.E.?

• Ino malembo aakali abwaanda akali kupandulula nzi?

• Mbusinsimi nzi bwa Babuloni ibwakali kuzuzikizigwa nolyakali kucitika pobwe lya Belisazara?

• Ino cibalo cijatikizya malembo abwaanda citujatikizya kapati buti swebo sunu?

[Mibuzyo yaciiyo]

 [Cifwanikiso icili apeeji 98]

 [Cifwanikiso icili apeeji 103]