Cibalo 3

Amulijatisye Ijwi lya Leza

1. (a) Ino bana Israyeli bansiku bakakusinizya buti kusyomeka kwajwi lya Leza? (b) Nkaambo nzi ncaayandika kulindiswe makani aayo?

“MULIZI camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika.” (Joshua 23:14-16) Joshua mbwaakaambila baalu bamu Israyeli oobo kakwiindide ciindi cili mbocibede kuzwa nobakakkala Munyika Yakasyomezyegwa. Inzya, zisyomezyo zya Jehova zyakasinizyigwa kuti zilasyomeka. Makani aayo—aambi oonse aali mu Bbaibbele—akayobolwa akaambo kandiswe kutegwa “tujane bulangizi.”—Ba-Roma 15:4.

2. (a) Muunzila nzi mokunga kwaambwa kuti Bbaibbele “[ly]akazwa kuli-Leza”? (b) Mbotwaziba kuti Bbaibbele lyakasololelwaa muuya wa Leza, ino mmukuli nzi ngotujisi?

² Nokuba kuti Bbaibbele lyakalembwaa bantu basika ku 40, Jehova ngo Sikulyaanza. Sena eeci caamba kuti Jehova ngowakasololela zyoonse zilembedwe mulindilyo? Inzya. Wakacita oobo kwiinda mukubelesya muuya wakwe uusalala ulaanguzu kapati, walo uuli nenguzu zyakwe nzyabelesya. Mwaapostolo Paulo cakusinizya wakati: “Magwalo aya oonse akazwa kuli-Leza, . . . kuti muna-Leza alibambe, azulile kukumana milimo mibotu yoonse.” Ibantu kuli koonse nkobabede ibasyoma kuti Bbaibbele ncobeni lyakasololelwaa Leza, balabikkila maanu kuzintu nzyolyaamba alimwi balapona munzila yeendelanaa njiisyo zili mulindilyo.—2 Timoteo 3:16, 17; 1 Ba-Tesalonika 2:13.

Amugwasye Bamwi Kuti Balimvwisye Ncolyaamba Alimwi Akulibikkila Maanu

3. Ninzila nzi yiinda kubota motukonzya kubazula bantu banji ibatasyomi kuti Bbaibbele ndi Jwi lya Leza?

³ Ibunji bwabantu mbotukanana limwi tabasyomi mbuli  mbotusyoma kuti Bbaibbele ndi Jwi lya Leza. Ino inga twabagwasya buti? Kanjikanji, inzila yiinda kugwasya nkubajulila Bbaibbele akubatondezya nzyolyaamba. “Ijwi lya-Leza lili abuumi, lili anguzu, lilabosya kwiinda iceba ilijisi mabemba obile, . . . alimwi lilabeteka kuyeeya akuyanda kwamoyo.” (Ba-Hebrayo 4:12) “Ijwi lya-Leza” taali buyo makani aansiku aatajisi mpindu kulindiswe pe; lili abuumi! Zisyomezyo zyamu Bbaibbele ziyaabuzumanana kuzuzikizigwa. Mulumbe wamu Bbaibbele ulamukulwaizya kapati muntu mumoyo kwiinda majwi ali woonse ngotukonzya kwaamba aakumukulwaizya.

4. Mbupanduluzi nzi bwamakani aamu Bbaibbele ibwacinca mbobakali kulilanga bamwi Bbaibbele, alimwi ino nkaambo nzi?

⁴ Ikujana nkobajana zina lya Leza mu Bbaibbele, kwabakulwaizya bantu banji ikuyanda kumvwisya zilembedwe mulindilyo. Ibamwi basala kunooyiya Bbaibbele ciindi nobatondezyegwa ncolyaamba kujatikizya mpindu yabuumi, ikaambo Leza ncalekelede bubi, ncozyaamba zintu zicitika mumazubeesu naa bulangizi bwabuumi butamani anyika yaparadaiso. Mumasi oomo mwalo micito yacikombelo moyasololela bantu kukukatazigwaa myuuya mibi, ibupanduluzi bwa Bbaibbele kujatikizya uupa kuti zintu eezi zicitike alimwi ambwakonzya kulemununwa muntu kuli zyeezyi, bwabakonda bantu banji. Ino nkaambo nzi twaambo ootu ncotubakonda bantu banji ibalomene? Nkaambo kakuti Bbaibbele lilikke ndelijisi makani aasyomeka kujatikizya twaambo toonse tuli mbuli bwatootu.—Intembauzyo 119:130.

5. (a) Iciindi bantu nobaamba kuti tabalisyomi Bbaibbele, ntwaambo nzi tulangilwa kuti ntotubapa kwaamba boobo? (b) Ino bantu bali boobo inga twabagwasya buti?

⁵ Pele, ino ncinzi ncotunga twacita ikuti bantu batwaambila kuti tabalisyomi Bbaibbele? Sena eeco ceelede kumana mubandi wesu? Ikuti kabalisungude ikulanga-langa twaambo tuliko kwiinda mukubelesya maanu, taceelede kuba boobo pe. Ambweni nkaambo kakuti Bbaibbele balibona  kuti ndibbuku lya Kristendomu. Micito ya Kristendomu yakuupaupa ameso alimwi akutola lubazu mutwaambo twacisi kubikkilizyaa kulombelela mali nkobacita, kalakonzya kuba nkakaambo ibantu ncobalisulide Bbaibbele. Inga cabota ikuti twababuzya naa aako nkakaambo ncobalisulila Bbaibbele. Ikusinganya micito ya Kristendomu nkolisinganya Bbaibbele kubikkilizyaa twaambo tumwi tutondezya kwiimpana kuliko akati ka Kristendomu a Bunakristo bwakasimpe, kulakonzya kubakonda bantu.—Mika 3:11, 12; Matayo 15:7-9; Jakobo 4:4.

6. (a) Ncinzi cimupa kusinizya nywebo lwanu kuti Bbaibbele ndi Jwi lya Leza? (b) Ntwaambo nzi tumwi tunga twabelesyegwa kugwasya bantu kumvwisya alimwi akubona kuti ncobeni Bbaibbele lyakazwa kuli Leza?

⁶ Kuli bamwi, imubandi wacigaminina watwaambo tusinizya kuti Bbaibbele lyakasololelwaa muuya wa Leza inga wagwasya. Ino ncinzi nywebo cimupa kusinizya kuti Bbaibbele lyakazwa kuli Jehova Leza? Sena mmajwi aajanika mu Bbaibbele ndilyonya alaamba nkolyakazwida? Antela sena nkaambo kakuti Bbaibbele lijisi businsimi bunji kapati ibupandulula zintu ziyoocitika kumbele amboziyoocitika, businsimi bulangilwa kuti bwakazwa kuli umwi ulaanguzu kapati kwiinda zyabuntunsi? (2 Petro 1:20, 21) Sena nkaambo kakuti twaambo tulembedwe mu Bbaibbele tuleendelana kapati nokuba kuti lyakalembwaa baalumi bali 40 kwamyaka iinda ku 1,600? Ambweni nkaambo kakuti lililuzi mutwaambo twasayaansi mukwiimpanaa mabbuku aamwi aakalembwa aciindi nolyakali kulembwa Bbaibbele? Ndiza nkwaamba cakutasisa kwabasikulilemba? Ndiza abona nkukwabililwa nkolyakakwabililwa kuzwa kubantu bakakanzide kulinyonyoona? Kufwumbwa naa ncinzi cakamukonda nywebo lwanu, mulakonzya kucibelesya kugwasya bamwi. *

 Kubala Bbaibbele Nkotucita

7, 8. (a) Ino ncinzi ncotweelede kunoocita kujatikizya Bbaibbele? (b) Ino ncinzi cimbi ncotuyandika kucita kunze lyakulibalila Bbaibbele? (c) Ino mbuti mbomwajana luzibo lwamakanze aa Jehova inywebo lwanu kumugama?

⁷ Kunze lyakugwasya bamwi kuti balisyome Bbaibbele, swebo lwesu kutugama tweelede kuti katulibala ciindi coonse. Sena mulacita oobo? Akati kamabbuku aaliko, eeli ndebbuku liyandika kapati kwiinda oonse. Pele eeci tacaambi kuti tatuyandiki buya lugwasyo luli loonse notulibalila Bbaibbele. Magwalo alatucenjezya kuti tatweelede kulyaandaanya. Tutayeeyi kuti tulakonzya kulijanina bwiinguzi mumakani aali oonse kwiinda mukulivwuntauzizya tobeni. Zyoonse zyobile iciiyo cesu tobeni alimwi akujanika lyoonse kumiswaangano yabantu ba Leza zilayandika kapati ikutegwa tube Banakristo balanga zintu munzila yeelede.—Tusimpi 18:1; Ba-Hebrayo 10:24, 25.

⁸ Kujatikizya kaambo aaka, Ibbaibbele litwaambila zyamweendelezi muna Etiopiya walo wakali kubala businsimi bwa Isaya. Mungelo wakamusololela mukambausi Munakristo Filipo kubuzya mwaalumi ooyo kuti: “Sena ulacimvwisya eco ncobala?” Cakulicesya, muna Etiopiya wakavuwa kuti: “Ino ndilakonzya buti, aatakwe muntu uunditondezya?” Wakalomba Filipo kuti amupandulwide cibalo eeco camu Magwalo. Amubone kuti Filipo taakali muntu wakali kulibalila Bbaibbele alikke alimwi taakwe naakaamba nzyaakali kuyeeya mwini kujatikizya Magwalo. Wakakakatila kumbunga ya Leza iilibonya. Nkakaambo kaako wakali kukonzya kumugwasya muna Etiopiya kuti agwasigwe amalailile Jehova ngaakali kupa kwiinda mumbunga eeyo. (Incito 6:5, 6; 8:5, 26-35) Mbubwenya buyo asunu, taakwe muntu uuli woonse uukonzya kwaamvwisya makanze aa Jehova ilwakwe mwini. Toonse tuyandika lugwasyo luzwa kuli Jehova ndwapa caluyando kwiinda mumbunga yakwe iilibonya.

9. Nipulogilamu iili buti yakubala Bbaibbele iikonzya kutugwasya toonse?

 ⁹ Kutegwa tugwasigwe ikulimvwisya kabotu Bbaibbele, imbunga ya Jehova ilapa makani mabotu kapati aabandika zyamu Magwalo kwiinda mumabbuku aasiyene-siyene. Kunze lyazeezi, lyoonse tulapegwa mulongo wakubala Bbaibbele walo uujatikizya Cikolo Camulimo Weendelezyegwaa Leza cicitwa mumbungano zyoonse zya Bakamboni ba Jehova nyika yoonse mboizulwa. Tulakonzya kugwasigwa kapati kwiinda mukulilingauda Magwalo Aasalala lwesu tobeni. (Intembauzyo 1:1-3; 19:7, 8) Amusoleke kubala Bbaibbele lyoonse. Nokuba kuti inga tamukonzyi kuzimvwisya zyoonse, ciyoomugwasya kapati ikubaa luzibo lwancaamba Magwalo. Mucikozyanyo, ikuti kamubala mapeeji aali one naa osanwe abuzuba, mulakonzya kulimana Bbaibbele lyoonse mumwaka omwe buyo.

10. (a) Ndilili nomubala Bbaibbele? (b) Mbaani bambi beelede kubikkilizigwa ciindi notubala Bbaibbele, alimwi ino nkaambo nzi ncokuyandika kulibala lyoonse?

¹⁰ Ino ndilili nomukonzya kubala Bbaibbele? Ikuti mwalibikkila maminiti aali 10 naa 15 abuzuba aakubala Bbaibbele, muyoogwasigwa kapati. Ikuti eeco kacitakonzyeki, ambweni mulakonzya kubikka ciindi ncomunoolibala lyoonse nsondo ansondo, mpoonya akuzumananaa ciindi eeco ncomwalibikkila. Ikuti kamukwete naa kamukwetwe, nywebo ambomukwetene limwi mulakonzya kubala Bbaibbele cakupozya kuli umwi aumwi. Ikuti kakuli bana bakonzya kubala, abalo balakonzya kunoocincana kubala cakupozya. Kubala Bbaibbele ceelede kuba cilengwa cesu ncotucita lyoonse mbubwenya mbuli mbotulya cakulya. Mbuli mbomuzi kale, ikuti muntu katalyi kabotu, unooli muntu uuciswa-ciswa. Aboobo abwalo buumi bwesu bwakumuuya mbobubede, ikupona kwesu kutamani kuyeeme aakulya “majwi oonse aazwa kumulomo wa-Leza” nkotucita lyoonse.—Matayo 4:4.

 Imbaakani Yesu

11. Ino ncinzi ceelede kuba mbaakani yesu notubala Bbaibbele?

¹¹ Ciindi notubala Bbaibbele ino ncinzi ceelede kuba mbaakani yesu? Mbaakani yesu tayeelede kuba yakwiile kubala buyo mapeeji aali mbwaabede. Makanze eesu ayelede kubaa kuyanda kumuzyiba kabotu Leza kutegwa tuyumye luyando lwesu kulinguwe alimwi akumukomba munzila yeelede. (Johane 5:39-42) Tweelede kubaa cilengwa cakajisi mulembi wa Bbaibbele wakaamba kuti: “Kondizibya inzila zyako, O Jehova; kondiiyisya myeendelo yako.”—Intembauzyo 25:4.

12. (a) Nkaambo nzi ikujana ‘luzibo lwini-lwini’ ncokuyandika, alimwi nkusoleka kuli buti muntu nkwayandika kucita ciindi nali mukubala kutegwa ajane luzibo oolo? (b) Nkwiinda mukubelesya twaambo tone tuli buti itukonzya kutugwasya kutelaika nzyotubala mu Bbaibbele? (Amubone kabbokesi apeeji 30.) (c) Amutondezye mbotunga twabelesyegwa twaambo ootu kwiinda mukwiingula mibuzyo iibikkidwe mumuncali ooyu. Amwaalange magwalo aambwa buyo, pele aatazubuludwe.

¹² Notutambula lwiiyo kuzwa kuli Jehova, tweelede kuyandisisya kubaa ‘luzibo lwini-lwini.’ Ikuti katutakwe luzibo oolu, ino mbuti mbotunga twalibelesya kabotu Ijwi lya Leza mubukkale bwesu antela kulipandulwida bamwi mbukweelede? (Ba-Kolose 3:10; 2 Timoteo 2:15) Ikujana luzibo lwini-lwini kuyanda kuti katulomya buya kubala alimwi ikuti cibalo cimwi kacikatazya kumvwa, ambweni inga kwayandika kuti tucibale ziindi zili mbozibede kutegwa tumvwisye cili mukwaambwa. Alimwi tuyoogwasigwa ikuti katubaa ciindi cakuzinzibala kuyeeya aamakani aayo, ikwaatelaika kwiinda mukwaalanga-langa mubukkale busiyene-siyene. Kwabikkwa nzila zyone apeeji 30 ziyandika kapati mukukosola makani kwiinda mukubelesya twaambo tuliko kale. Zibeela zinji zyamu Magwalo zilakonzya kulangwa-langwa munzila iigwasya kwiinda mukubelesya nzila yomwe naa kwiindaawo akati kazyeezi. Nomwiingula mibuzyo iili amapeeji aaya aatobela, mulabona ncotwaambila boobo.

 (1) Kanjikanji, cibeela camu Magwalo ncomuli mukubala cilakonzya kumwaambila cimwi cintu kujatikizya mbwabede Jehova. Mucikozyanyo, mubbuku lya Intembauzyo 139:13, 14 twiiya mbwababikkila maanu kapati Leza ibana batanazyalwa: “Nduwe wakandinunganya mwida lyabama. Njookulumba nkaambo kakugambya kwakulengwa kwangu. Milimo yako ilagambya; moyo wangu ulizi loko.” Ilakondelezya alimwi ilagambya kaka milimo ya Jehova yakulenga! Ibubambe bwabantunsi bulapa bumboni bwaluyando lwakwe lugambya kulindiswe.

Kweelanaa caambwa mubbuku lya Johane 14:9, 10, notubala mbwaakali kweendelezya bamwi Jesu, ncobeni citutondezya mbwakonzya kucita Jehova lwakwe. Katuyeeyede oobo, ncinzi ncotunga twaamba cakukosola kujatikizya Jehova kuzwa muzibalo zilembedwe kuli Luka 5:12, 13 alimwi a Luka 7:11-15?

(2) Amulange-lange cibalo mbocijatikizya mutwe wa Bbaibbele: kusinizigwa kwabulelo bwa Jehova alimwi akusalazigwa kwazina lyakwe kwiinda mu Bwami bwabweendelezi bwa Jesu Kristo, uuli ngo Lunyungu lwakasyomezyegwa.

Ino Ezekieli alimwi a Daniele bakaukankaizya buti mutwe wa Bbaibbele? (Ezekieli 38:21-23; Daniele 2:44; 4:17; 7:9-14)

Ino Bbaibbele litondezya buti cakusalazya kuti Jesu ngo Lunyungu lwakasyomezyegwa? (Ba-Galatiya 3:16)

Ino Ciyubunuzyo cikupandulula buti kuzuzikizigwa kwini-kwini kwamutwe wa Bwami? (Ciyubunuzyo 11:15; 12:7-10; 17:16-18; 19:11-16; 20:1-3; 21:1-5)

(3) Amulibuzye nobeni mbomunga mwatubelesya twaambo ntomubala. Mucikozyanyo, mubbuku lya Kulonga kusika ku Deuteronomo tubala zyakutalilemeka kwabana Israyeli alimwi akuzanga kwabo. Twiiya kuti bukkale bwabo alimwi amicito yabo eeyo yakabanjizya mumapenzi mapati. Aboobo tweelede kukulwaizigwa kuyanda kumukkomanisya Jehova  kwiinda mukutayiya cikozyanyo cibyaabi cabana Israyeli. “Aya makani oonse akaba kulimbabo mbuli incenjezyo, akalembwa kuti acenjezye ndiswe nitusikilwa kumamanino aaciindi.”—1 Ba-Korinto 10:11.

Ncinzi ncaatuyiisya makani aamba Kaini mbwaakajaya Abelo? (Matalikilo 4:3-12; Ba-Hebrayo 11:4; 1 Johane 3:10-15; 4:20, 21)

Sena lulayo lwamu Bbaibbele ku Banakristo ibajisi bulangizi bwabuumi bwakujulu bulabeleka akuli baabo ibajisi bulangizi bwakuyoopona anyika kukabe kutamani? (Myeelwe 15:16; Johane 10:16)

Nokuba kuti katulemekwa mumbungano ya Bunakristo, nkaambo nzi ncotuyandika kulanga-langa mbazu motunga twayaambele mukubelesya lulayo lwamu Bbaibbele oolo ndotuzi kale? (2 Ba-Korinto 13:5; 1 Ba-Tesalonika 4:1)

(4) Amutelaike mbomukonzya kubelesya nzyomuli mukubala ikugwasya bamwi. Bantu boonse balilibilikide kujatikizya  mapenzi aabakatazya kumubili, aboobo tulakonzya kubala antoomwe ambabo ikubatondezya nzyayoocita Jesu kubantu boonse ciindi nayoolela kali Mwami ulaanguzu kapati mu Bwami bwa Leza imakani aakuti: “Kwakamusikila makamu mapati aabantu, bakajisi zilema, boofu, basyataambi, batyokede, abamwi banji, . . . nkabela wakabaponya.”—Matayo 15:30.

Ino mbaani ibakonzya kugwasigwaa cibalo cakubusigwa kuzwa kulufwu kwamwana musimbi wa Jairo? (Luka 8:41, 42, 49-56)

13. Nzintu nzi nzyotunga twalangila kuzwa mupulogilamu iizumanana yakubala Bbaibbele alimwi akwiiya ambunga ya Jehova?

¹³ Eelyo kulagwasya kapati kaka kubala Bbaibbele ciindi notulanga-langa twaambo tone itwaambwa musyule! Ikwaamba masimpe, kubala Bbaibbele kulakatazya. Pele kulakonzya kutugwasya mubuumi bwesu boonse, akaambo kakuti ciindi notubala Magwalo, tuyungizya luzibo lwesu mukumvwisya alimwi amukweendelanya zintu zyakumuuya. Kubala Bbaibbele lyoonse kuyootugwasya kuyumya cilongwe cesu a Taateesu Jehova siluyando alimwi akubakwesu Banakristo. Kuyootugwasya kuzumanana kutobela lulayo ‘lwakujatisya ijwi lya-Leza.’—Ba-Filipi 2:16.

Bupanduluzi buyungizidwe

Mubandi Wakwiinduluka

• Nkaambo nzi Bbaibbele ncolyakalembelwa alimwi akukwabililwa kusikila kuciindi cesu?

• Ino inga twabagwasya buti bamwi ikumvwisya alimwi akulibikkila maanu Bbaibbele?

• Nkaambo nzi kubala Bbaibbele kwaumwi aumwi lyoonse ncokugwasya? Kwiinda mukubelesya twaambo tone tuli tukonzya kutugwasya ikutelaika nzyotubala?

[Mibuzyo yaciiyo]

[Kabbokesi/[Cifwanikiso icili apeeji 30]

CIINDI NOMUBALA CIBEELA CIMWI CAMU BBAIBBELE, AMULANGE-LANGE

Ncocimwaambila kujatikizya mbwabede Jehova

Mbociswaangene amutwe wamakani mupati wamu Bbaibbele

Mboceelede kujatikizya buumi bwanu

Mbomukonzya kucibelesya ikugwasya bamwi