Cibalo 2

Amumulemeke Jehova Mbwali ngo Leza Mwini-Mwini Uuli Alikke

1. Ino nguni Leza mwini-mwini uuli alikke?

IBBAIBBELE lyaamba kuti nokuba kuti mbanji ibaambwa kuti mbaaleza, “kulindiswe kuli Leza omwe buyo, Taateesu.” (1 Ba-Korinto 8:5, 6) Ooyo “Leza omwe” ngu Jehova, Imulengi wazintu zyoonse. (Deuteronomo 6:4; Ciyubunuzyo 4:11) Jesu wakamwaamba kuti “Leza wangu, Leza wanu anywebo.” (Joni 20:17, Ci) Wakaamba mbubwenya bwakaamba Musa kusaanguna naakati: “Jehova ngo Leza mwini-mwini, taakwe umbi kunze lyakwe.” (Deuteronomo 4:35, NW) Jehova ulisumpukide kapati kwiinda zintu zyoonse zikombwa mbuli mituni, ibantu naa sinkondonyina Saatani Diabolosi “uuli ngoleza waansi aano.” (2 Bakolinti 4:3, 4, Ci) Mukwiimpanaa baleza boonse aaba, kweelanaa bwakaamba Jesu, Jehova ‘ngo-Leza mwini-mwini uuli alikke.’—Johane 17:3.

2. Mbotwiiya zya Leza, ino mbuti bukkale bwesu mbobweelede kujatikizigwa?

² Ibantu balumba ibayiya zyabube bwa Leza bukondelezya alimwi azintu nzyaatucitila kubikkilizyaa nzyaayootucitila kumbele, balakulwaizigwa kubaa cilongwe anguwe. Mboluyaabuyuma luyando lwabo kuli Jehova, balakulwaizigwa kumulemeka. Munzila nzi? Munzila yomwe nkwiinda mukwaambila bamwi kujatikizya nguwe. Ibbuku lya Ba-Roma 10:10 lyaamba kuti: ‘Kwiinda kumulomo muntu ulazumina akwaamba zyalusyomo lwakwe lwalufwutuko.’ Aimbi nzila nkwiinda mukumwiiya mukwaambaula alimwi amumicito. Ku Ba-Efeso 5:1, twaambilwa kuti: “Amube basikwiiya ba-Leza mbuli bana bayandwi.”  Kutegwa tucite boobo cakumaninina, tuyandika kumuziba bwini mbwabede Jehova.

3. Mbube nzi buyandika kapati mbwajisi Leza?

³ Mu Bbaibbele lyoonse tujana majwi manji aamba zyabube bwa Leza bulibedelede. Mboobu bube bwakwe buyandika kapati buli bone: busongo, bululami, nguzu alimwi aluyando. ‘Busongo mbubwakwe.’ (Jobu 12:13) ‘Inzila zyakwe zyoonse zililuleme.’ (Deuteronomo 32:4) Ngu “singuzu.” (Isaya 40:26) “Leza nduluyando.” (1 Johane 4:8) Pele akati kabube bone bwa Leza buyandika kapati, mbube nzi ibwiinda kapati abube boonse ibwaambwa waawa bwalo ibutondezya mbwabede Leza?

“Leza Nduluyando”

4. Mbube nzi bwa Leza ibwakamukulwaizya kulenga bubumbo alimwi abaumi boonse?

⁴ Amutelaike cakamukulwaizya Jehova ikulenga bubumbo alimwi azilenge zyamuuya alimwi azyabuntunsi zilaamaano. Sena bwakali busongo naa zyakali nguzu zyakwe? Peepe, nokuba kuti Leza wakabubelesya bube oobo, tabusyi mbubo ibwakamukulwaizya pe. Alimwi bululami bwakwe taakwe nebwakayanda kuti aabile bamwi buumi. Muciindi caboobo, luyando lwa Leza lunji ndolwakamukulwaizya ikwaabila bamwi bubotu bwakupona kabali zilenge zilaamaano. Luyando ndolwakamukulwaizya kubaa makanze aakuti bantu bamumvwida bapone mu Paradaiso kukabe kutamani. (Matalikilo 1:28; 2:15) Luyando ndolwakamukulwaizya kubikka bubambe bwakugwisya kusinganizigwa kwalo cibi ca Adamu nkocakaleta kubantunsi.

5. Ikweelanaa Bbaibbele, mbube nzi Jehova mbwaiminina, alimwi nkaambo nzi?

⁵ Aboobo, akati kabube bwa Leza boonse, luyando ndoluyandika kapati. Mbwabede buya obo naa nceciimo cakwe. Nokuba kuti busongo, bululami alimwi anguzu azyalo zilayandika kapati, Ibbaibbele taakwe mpolitwaambila  kuti Jehova ngumwi wacimwi cazeezi. Pele litwaambila kuti nduluyando. Masimpe, Jehova nduluyando. Oolu nduyando lweendelezyegwaa njiisyo ikutali akulimvwa kwamuntu. Luyando lwa Leza lweendelezyegwaa njiisyo zyakasimpe alimwi azyabululami. Nduyando lusumpukide kapati, mbubwenya mbolutondezyedwe muli Jehova Leza mwini. Luyando luli boobo ncitondezyo cakulyaaba kwakutaliyanda alimwi lyoonse luswaangene amicito iilibonyaa meso.

6. Ncinzi citugwasya kuti tucikonzye ikwiiya Leza nokuba kuti ulisumpukide kapati kulindiswe?

⁶ Ibube bwaluyando oobu bukondelezya mbobutugwasya kuti tucikonzye kwiiya Leza uuli boobo. Mbotuli bantu batakwe mpindu kapati, ibatalondokede, ibalubizya lyoonse, tulakonzya kuyeeya kuti taakwe notunga twacikonzya kumwiiya cakuzwidilila Leza. Pele nkocili acimbi cikozyanyo caluyando lwa Jehova lupati: Ulizyi kabotu zintu nzyotukonzya kucita anzyotutakonzyi alimwi taakwe nalangila kuti katucita zintu mbuli kuti tuli bantu balondokede. Ulizyi kuti tatunaba bantu balondokede. (Intembauzyo 51:5) Nkakaambo kaako Intembauzyo 130:3, 4 ncolyaamba kuti: “O Jehova, nowakabika moyo wako kuzibi zyesu, ngwani wakali kunoopona, O Mwami? Pele kulinduwe kuli lulekelelo.” Inzya, Jehova ngu “Leza siluzyalo asibuuya uutafwambi kukalala, uuzwide luse.” (Kulonga 34:6) “Yebo, O Mwami, uli mubotu, ulafwamba kujatila.” (Intembauzyo 86:5) Cilaumbulizya kaka eeco! Cilakatalusya kaka ikubelekela Leza ooyu uukondelezya alimwi akulanganizyigwa anguwe caluyando alimwi acaluzyalo!

7. Muunzila nzi molukonzya kubonwa luyando lwa Jehova mumilimo yakwe njaakalenga?

⁷ Alimwi luyando lwa Jehova lulabonwa mumilimo yakwe njaakalenga. Amuyeeye buyo zintu zibotu zinjaanji Jehova nzyaatupa kutegwa tukkomane, zintu mbuli malundu, masyaka aamasamu, matangaziba alimwi alwaanje. Watupa  izyakulya mumisyobo isiyene-siyene kutegwa katukkomana kulya zintu zisiyene-siyene alimwi akutupa buumi. Kuyungizyaawo, Jehova watupa maluba-luba manji kapati aanunkilila kubikkilizyaa banyama bakondelezya kapati. Wakapanga buyo zintu zikkomanisya bantu nobazilanga, nokuba kuti tanaakeelede kuzipanga. Masimpe, mbotupona munyika eeyi iizwide bubi alimwi mbwaanga tatulondekede, tatukonzyi kuzikkomanina zyoonse zilenge zyakwe. (Ba-Roma 8:22) Pele amuyeeye buyo nzyaayootucitila Jehova mu Paradaiso! Sintembauzyo utusyomezya kuti: “Ulafumbatula ijanza lyako, ulakutya kusukama [kweelede] kwabaumi boonse.”—Intembauzyo 145:16.

8. Ncikozyanyo nzi cilibedelede caluyando lwa Jehova kulindiswe?

⁸ Ncikozyanyo nzi cilibedelede caluyando lwa Jehova kubantu? Ibbaibbele lipandulula kuti: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi [a]umwi uumusyoma atafwidilili, pele abe abuumi ubutamani.” (Johane 3:16) Sena cakali boobo akaambo kabubotu bwamuntu Jehova ncaakacitila boobu? Ibbuku lya Ba-Roma 5:8 liingula kuti: “Leza, walo ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida.” Masimpe, Leza wakatuma Mwanaakwe uulondokede munyika kutegwa azikwaabe buumi bwakwe kuba cituuzyo cacinunuzyo kutunununa kukusinganizigwa kucibi alimwi alufwu. (Matayo 20:28) Eeci cakajula nzila yakuti bantu bamuyanda Leza bajane buumi butamani. Mucoolwe, luyando lwa Leza lulabikkilizyaa bantu boonse ibayanda kucita kuyanda kwakwe, mbwaanga Bbaibbele litwaambila kuti: “Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.”—Incito 10:34, 35.

9. Ino kaambo kakuti Jehova wakatupa Mwanaakwe kuba cinunuzyo cesu keelede kutujatikizya buti?

⁹ Ino makani aakuti Jehova wakatupa Mwanaakwe kuba  cinunuzyo calo cakajula nzila yakubuumi butamani ayelede kubujatikizya buti bukkale bwesu lino? Ayelede kuyumya luyando lwesu muli Jehova, Leza imwini-mwini. Alimwi ayelede kutukulwaizya kumumvwida Jesu walo uuli mwiiminizi wa Leza. “[Jesu] wakabafwida boonse kuti abo bapona bataciliponen[i] beni pele baponene oyo iwakabafwida akubuka.” (2 Ba-Korinto 5:15) Cilakkomanisya kaka ikutobela mikondo ya Jesu mbwaanga wakali cikozyanyo cibotu mukwiiya luyando lwa Jehova alimwi alweetelelo! Eeci cilalibonya mumajwi ngaakaamba Jesu ikwaambila babombe myoyo kuti: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.”—Matayo 11:28-30.

Ikubatondezya Luyando Bamwi

10. Muunzila zili buti zimwi motukonzya kubatondezya luyando Banakristoma?

¹⁰ Mbuti mbotunga twatondezya kuti tulaaluyando ku Banakristoma mbuli loolo Jehova alimwi a Jesu ndobajisi kulindiswe? Amubone nzila zinji motunga twacita boobo: “Luyandisyo lulakazika moyo akufwa luzyalo. Luyandisyo talukwe ibbivwe, talulikankaizyi, talulisumpuli, talukwe cisapi, talulilangilili cintu, talufwambi kujata bukali, taluyeeyi inkoto yabubi. Talukondelwi zitaluleme pe, lulakondelwa lusinizyo. Lulakolela makani oonse akuba alusyomo lyoonse, lulijisi bulangilizi lyoonse akuba acamba kumapenzi oonse. Luyandisyo talweeli.”—1 Ba-Korinto 13:4-8; 1 Johane 3:14-18; 4:7-12.

11. Mbaani bambi mbotweelede kutondezya luyando, alimwi muunzila zili buti motunga twacita boobo?

¹¹ Mbaani bambi mbotweelede kutondezya luyando alimwi muunzila nzi? Jesu wakati: “Nkaambo kaako kamuya  mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20) Eeci cilabikkilizyaa kwaabila baabo ibatali Banakristoma makani mabotu aanyika ya Leza mpya yaparadaiso njotulangila. Jesu wakacisalazya kwaamba kuti, iluyando lwesu talweelede kutondezyegwa buyo kuli baabo mbotusyoma limwi, nkaambo wakaamba kuti: “Kuti kamuyanda [buyo] abo bamuyanda, ino mbulumbunzi mbumujisi? Sa abalo basimutelo tabaciti mbubonya obo? Alimwi kuti kamujuzya banyokwanu balike, mwiinda buti? Sa abalo bamasi tabaciti obo?”—Matayo 5:46, 47; 24:14; Ba-Galatiya 6:10.

‘Amweende Muzina lya Jehova’

12. Nkaambo nzi izina lya Leza ncolinga lyabelesyegwa buyo kulinguwe?

¹² Acimwi ciyandika kapati mukulemeka Leza mwini-mwini nkuziba kubelesya alimwi akuyiisya bamwi izina lyakwe lilibedelede, lyakuti Jehova. Sintembauzyo wakalombozya kucita boobo camoyo woonse naakati: “Bazibe kuti nduwe olike oojisi izina lya-Jehova, nduwe Mupatikampatila atala anyika yoonse.” (Intembauzyo 83:18) Izina lyakuti Jehova lyaamba kuti “Uupa Kuti Kube.” Ngu Simakanze Mupati, lyoonse ulabona kuti waazuzikizya makanze aakwe cakumaninina. Alikke Leza mwini-mwini nguweelede kwiitwaa zina eelyo nkaambo ibantu tabakonzyi kusinizya kuti milimo yabo iyoozwidilila. (Jakobo 4:13, 14) Alikke buyo Jehova nguukonzya kwaamba kuti jwi lyakwe ‘liyoocita kabotu cakuzwidilila’ mumakani ngaalitumina. (Isaya 55:11) Ibanji balakondwa kapati nobabona zina lya Leza kwaciindi cakusaanguna muma Bbaibbele aabo alimwi anobayiya ncolyaamba. (Kulonga 6:3) Pele bayoogwasigwa aluzibo olu lilikke “[nobeenda] muzina lya-Jehova . . . lyoonse mane kukabe kutamani.”—Mika 4:5.

13. Ncinzi cijatikizidwe mukuziba zina lya Jehova alimwi akweenda muzina lyakwe?

 ¹³ Kujatikizya zina lya Leza, Intembauzyo 9:10 yaamba kuti: “Boonse bazi izina lyako balakusyoma.” Eeci tacibikkilizyi buyo ikwiile kuziba zina lyakuti Jehova calo icitaambi kuti muntu ulamusyoma, nzinji zijatikizidwe. Ikuziba zina lya Leza caamba ikumuziba alimwi akumulumba akaambo kambwabede Jehova Leza, ikulemeka bweendelezi bwakwe, ikutobela malailile aakwe, ikumusyoma muzintu zyoonse. (Tusimpi 3:5, 6) Mbubwenya buyo, ikweenda muzina lya Jehova caamba ikulyaaba kulinguwe akumwiiminina katuli umwi wabakombi bakwe alimwi akupona kweelanaa kuyanda kwa Leza. (Luka 10:27) Sena mulacita oobo?

14. Ikuti katuyanda kubelekela Jehova kusikila kukabe kutamani cakutainzya buyo mulawo, ncinzi cimbi ciyandika?

¹⁴ Ikuti katuyanda kubelekela Jehova kusikila kukabe kutamani, tatweelede kucita boobo cakwiinzya buyo mulawo. Mwaapostolo Paulo wakakulwaizya Timoteo walo wakali kubelekela Jehova kwamyaka minji kuti: “Kogamine kunyanyaala kukukomba.” (1 Timoteo 4:7) Kukomba kuzwa mumoyo uuzwide kulumba kumuntu oyo ngotukomba. “Kukomba” caamba ikumupa bulemu alimwi akumuyoowa kapati Jehova akaambo kambwabede. Kulatondezya mbotumuyanda akaambo kabulemu butalikomeneni mbotujisi kulinguwe alimwi amunzila zyakwe. Kulatukulwaizya kuyanda kuti muntu uuli woonse alilemeke izina lyakwe. Tuyandika kubikkila maanu kapati kukukomba mubuumi bwesu ikuti katuyanda kweenda muzina lya Jehova Leza mwini-mwini uuli alikke mane kukabe kutamani.—Intembauzyo 37:4; 2 Petro 3:11.

15. Ino mbuti mbotunga twakomba buyo Leza alikke?

¹⁵ Ikutegwa tubelekele Leza munzila njayanda, tweelede kukomba buyo nguwe alikke, mbwaanga ngu “Leza sibuzuba.” (Kulonga 20:5) Tatukonzyi kuyanda Leza kumwi  katuyanda nyika mbyaabi yeendelezyegwaa Saatani. (Jakobo 4:4; 1 Johane 2:15-17) Jehova ulimuzi kabotu umwi aumwi wesu mukusola nkotucita. (Jeremiya 17:10) Ikuti katubuyanda ncobeni bululami, ulatubona alimwi uyootugwasya ikuliyumya mumasukusyo aatusikila buzubaa buzuba. Kwiinda mumuuya wakwe uusalala uulaanguzu kapati, uyootugwasya ikuzunda bubi buli mukwiindila munyika eeyi. (2 Ba-Korinto 4:7) Alimwi uyootugwasya ikuzumananaa lusyomo lwesu luyumu lwakuyoopona kukabe kutamani munyika yaparadaiso. Bulakondelezya kaka bulangizi oobu! Tweelede kulumba kapati akaambo kabuumi butamani alimwi akubelekela Leza Mwini-Mwini Jehova cakulisungula walo uupa kuti buumi oobu butamani bukonzyeke.

16. Ncinzi ncomweelede kulombozya kucita antoomwe atuulunzuma twabantu bambi?

¹⁶ Tuulunzuma twabantu nyika yoonse mboizulwa twakuzumina kutamba kwasintembauzyo iwakalemba kuti: “Amulemeke Jehova antoomwe ambebo, atusumpule izina lyakwe toonse.” (Intembauzyo 34:3) Jehova ulamutamba kuti musangane amakamu-makamu aabantu aayaabuvwula mumasi oonse balo bali mukulemeka akusumpula Jehova.

Mubandi Wakwiinduluka

• Ino Jehova mmuntu uuli buti? Ino muunzila zili buti motugwasigwa kwiinda mukubuziba kabotu bube bwakwe?

• Mbuti mbotunga twabagwasya bamwi ikwiiya kasimpe kujatikizya Leza?

• Ncinzi cijatikizidwe mukuziba izina lya Jehova alimwi akweenda muzina lyakwe?

[Mibuzyo yaciiyo]

 [Zifwanikiso izili apeeji 14]

Akaambo kaluyando lwakwe lunji, Jehova ‘uyoofwumbatula ijanza lyakwe akukkutya kusukama kwabaumi boonse’