“Amusungwaale Kuyandana”
Cibalo 16
“Amusungwaale Kuyandana”
1. Ino nzintu nzi kanjikanji izibakondelezya beenzu kumiswaangano ya Bakamboni ba Jehova?
IBANTU nobajanika kumiswaangano ya Bakamboni ba Jehova ciindi cakusaanguna, ikanjikanji balabotelwa kapati kujatikizya luyando lutondezyegwa ooko. Luyando oolu balalubona eelyo nobatambulwa camaanza obile alimwi akwiinda mukuyanzana ikukulwaizya. Abalo beenzu ibajanika kumiswaangano yesu mipati balalubona luyando oolu. Ikujatikizya muswaangano umwi mupati, sikumwaya makani muli sikapepele umwi wakalemba kuti: ‘Taakwe naba omwe wakakoledwe misamu iikola naa bukoko. Taakwe wakali koongolola alimwi akukwiila-kwiila. Taakwe bakali kutonkana. Taakwe bakali kukwelana. Taakwe naba omwe wakali kusinganya bamwi naa kubakonkezya. Taakwe wakali kwaamba matusi naa zyitondwa. Taakwe naba omwe wakali kufweba tombwe. Taakwe babbi. Taakwe wakali kusowaila zigabba mulubuwa lusyangidwe syokwe lyakapinga naa nzinza. Cakali cintu cilibedelede ncobeni.’ Zyoonse eezi zipa bumboni bwaluyando lwini-lwini oolo ‘lutakwe cisapi, lutalilangilili cintu.’—1 Ba-Korinto 13:4-8.
2. (a) Ino ncinzi mukuya kwaciindi iceelede kulibonya kujatikizya mbotutondezya luyando? (b) Ino nduyando luli buti ndotweelede kubaandulo kutegwa twiiye Kristo?
2 Luyando lwabunyina ncitondezyo cizyibya Banakristo bakasimpe. (Johane 13:35) Mbotuyabuya ambele munzila yakumuuya, tulazumanana kwiiya kutondezya luyando munzila iisumpukide. Imwaapostolo Paulo wakapaila kuti luyando ndobakajisi Banakristonyina “kaluciya buvula.” (Ba-Filipi 1:9) Imwaapostolo Johane wakatondezya kuti luyando lwesu lweelede kuba lwakulyaaba. Wakalemba kuti: “Lino luyando lwa-Leza tulalubona boobu, nkaambo [Mwanaa Leza] wakatutulila buumi bwakwe, nkabela aswebo tuleelede kutula buumi bwesu nkaambo kabeenzuma.” (1 Johane 3:16; Johane 15:12, 13) Sena ncobeni inga twaaba buumi bwesu akaambo kabakwesu? Nokuba kuti muziindi zinji ikucita boobo inga tiikwayandika pe, ino mbuti mbotunga twabagwasya noliba leelyo nocikatazya kucita boobo?
3. (a) Muunzila nzi motukonzya kulutondezya kabotu luyando lwesu? (b) Nkaambo nzi ncociyandika kapati mazubaano ikusungwaala kuyandana?
3 Kunze lyamilimo yesu iitondezya muuya wakulyaaba, tweelede kubaa luyando lwini-lwini kubakwesu. Ijwi lya Leza litukulwaizya kuti: “Amuyandane aluyandisyo lwabunyina.” (Ba-Roma 12:10) Toonse mbotulimvwa oobo kubantu bamwi. Pele sena inga twaiya kucita boobo akubantu bambi? Mamanino aabweende bwazintu oobu bubyaabi mbwaayabuswena afwaafwi, cilayandika kapati kulindiswe kubaa cilongwe ciyumu a Banakristoma. Ibbaibbele lyaamba kuti: “Mamanino aazintu zyoonse ali afwaafwi. . . . Kwiinda zyoonse amusungwaale kuyandana, nkaambo luyando ndoluvumba zibi zinjizinji.”—1 Petro 4:7, 8.
Ciindi Nokubuka Mapenzi
4. (a) Nkaambo nzi mapenzi ncaakonzya kubuka akati kabaabo bali mumbungano? (b) Nokuba kuti zimwi ziindi cilakonzya kutuyumina kucita boobo, ino mbubotu nzi bukonzya kujanwa ikuti twalubelesya lulayo lwamu Bbaibbele?
4 Mmasimpe, kufwumbwa kuti katutalondokede kunooli ziindi notucita zintu zibanyemya bamwi. Abalo bakwesu balakonzya kutubisizya munzila ziindeene-indene. (1 Johane 1:8) Ikuti naa cintu cili boobu camucitikila, ino ncinzi ncomweelede kucita? Imagwalo alapa busolozi buyandika. Pele ncaamba magwalo cilakonzya kaciteendelani pe azintu nzyotulombozya kucita tobantu batalondokede. (Ba-Roma 7:21-23) Nokuba boobo, ikusolekesya kwesu nkotucita camoyo woonse mukubelesya lulayo luli mu Bbaibbele, kuyoopa bumboni bwini-bwini bwakuti tulayandisisya kumukkomanisya Jehova. Alimwi ikucita boobo kuyooyungizya luyando ndotujisi kuli bamwi.
5. Ikuti naa umwi muntu watunyemya, nkaambo nzi ncotuteelede kujosezya?
5 Iciindi bantu nobanyemezyegwa, zimwi ziindi balangaula nzila yakuliya nkoto yacibi kuli sikubisya. Pele eeco cipa buyo kuti zintu ziindilile kubija. Ikuti kakuyandika kubweedezya cibi kucibi, tweelede kukusiya mumaanzaa Leza. (Tusimpi 24:29; Ba-Roma 12:17-21) Ibamwi balakonzya kucileka kwaambauzyanyaa muntu wakababisyizya. Pele tatweelede kucita boobo pe kubakombima, nkaambo kakuti kuzuminwa kwabukombi bwesu munzila imwi kuyeeme aakuyandana kwesu. (1 Johane 4:20) Aboobo Paulo wakalemba kuti: “Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami mbwaakamulekelela milandu yanu, anywebo amucite mbubonya obo.” (Ba-Kolose 3:13) Sena nywebo mulakonzya kucita oobo?
6. (a) Ino nziindi zyongaye nzyotweelede kumulekelela mukwesu? (b) Ncinzi ncotweelede kuzyiba icikonzya kutugwasya notweendelezya cibi ncotwacitilwa?
6 Ino mbuti kuti muntu katubisyizya ciindi aciindi pele kataciti cibi cipati calo cikonzya kupa kuti agwisyigwe mumbungano? Kujatikizya zibi zisyoonto eezyo, imwaapostolo Petro wakayeeya kuti kuleelede kulekelela kusikaa “ziindi zili ciloba.” Pele Jesu wakaamba kuti: “Kutali buyo ziindi zili ciloba, pele kusikila kuziindi zili ciloba zivuzigwe aziindi zili makumi aali ciloba.” Wakatondezya mbocili cipati cikwelete ncotujisi kuli Leza kwiinda zyeezyo kufwumbwa muntu nzyakonzya kutukweletela. (Mateyo 18:21-35, Ci) Buzubaa buzuba tulamubisizya Leza munzila zinji kakunyinaa kuzyiba kuti tuli mukubisya, zimwi ziindi kwiinda mukucita cintu cimwi citondezya kuliyanda, muŋambawido naa muzintu nzyotuyeeya naa kwiinda muzintu nzyotwaalilwa kucita. (Ba-Roma 3:23) Nokuba boobo, Leza ulazumanana kutondezya lubomba kulindiswe. (Intembauzyo 103:10-14; 130:3, 4) Uyanda kuti aswebo tutondezye bube mbubwenya oobo kuli bamwi. (Matayo 6:14, 15; Ba-Efeso 4:1-3) Ikuti twacita boobo, tunootondezya luyando oolo ‘ilutabikkilili.’—1 Bakolinti 13:4, 5, Ci; 1 Petro 3:8, 9.
7. Ncinzi ncotweelede kucita ikuti mukwesu umwi kajisi kaambo kulindiswe?
7 Kuli ziindi zimwi eelyo notunga twabona kuti nokuba kuti kunyina notumusulide mukwesu, walo ulaa kaambo kulindiswe. Kweelanaa mbolwaamba lugwalo lwa 1 Petro 4:8, tulakonzya ‘kuvwumba cibi eeco aluyando.’ Antela tulakonzya kusaanguna kubweza ntaamu yakwaambaula anguwe ikutegwa tuboozye luumuno.—Matayo 5:23, 24.
8. Ino ncinzi cikonzya kucitwa ikuti musyomima wacita cintu cimwi catucima?
8 Ambweni musyomima ulakonzya kacita cimwi cintu cikonzya kumucima nywebo alimwi abantu bamwi. Sena inga tiiceelela kukanana anguwe? Ambweni inga ceelela. Ikuti nywebo kumugama mwamupandulwida penzi eeli munzila yalubomba, ambweni zintu zitobela inga zilakonzya kubota. Pele cakusaanguna mweelede kulibuzya kuti: ‘Sena ncobeni uli mukucita cintu iciteendelani acaamba magwalo? Antela sena ikaambo keni-keni kali aakwiindana kwabukkale mbweekakomena alimwi ambwaakakomezyegwa awalo?’ Amucenjele kuti mutalibikkili zyeelelo zyanu nobeni akutalika kubeteka bamwi kweelanaa zyeelelo eezyo. (Jakobo 4:11, 12) Jehova cakutasalulula ulabatambula bantu boonse kuzwa kubukkale bwiindene-indene alimwi ulabakkazikila moyo mbobaya buzumanana kuyaambele munzila yakumuuya.
9. (a) Ino mbaani balanganya twaambo tujatikizya zibi zipati mumbungano? (b) Ndiilili nouli mukuli wayooyo walubizyilwa kutola ntaamu yakusaanguna, alimwi ino weelede kuti kajisi makanze nzi?
9 Ikuti umwi muntu mumbungano wacita cibi cipati mbuli bwaamu, kuleelede kubweza ntaamu cakufwambaana. Ino nguni weelede kucita boobo? Mbaalu. (Jakobo 5:14, 15) Pele ikuti naa cibi cijatikizya kubisizya muntu umwi, ambweni mumakani aamakwebo naa kwiinda mukubelesya lulimi munzila mbyaabi, ooyo walubizyilwa weelede kusola kumusikila sikulubizya kumbali. (Matayo 18:15) Ikuti naa ntaamu eeyi tiiyakakosola kaambo, intaamu zimbi zyeelede kutolwa kweelanaa zilembedwe kubbuku lya Matayo 18:16, 17. Iluyando ndotujisi kumukwesu walubizya alimwi akulombozya kwesu ‘kwakumuboozya’ kuyootugwasya kucita boobo munzila iiyoomunjila mumoyo.—Tusimpi 16:23.
10. Ino ncinzi ciyootugwasya kulanga kaambo munzila yeelede ciindi nokubuka penzi?
10 Iciindi nokubuka penzi, tacikwe makani naa penzi eelyo ndipati naa ndiniini, tulakonzya kugwasyigwa ikuti naa twasola kuteelela mbwalilanga penzi eelyo Jehova. Kunyina musyobo uuli woonse wacibi ngwazumina alimwi muciindi ncabikkide mwini, aabo bacita zibi zipati ibateempwi balagwisyigwa mumbunga yakwe. Nokuba boobo, tutalubi kuti toonse tulalubizya munzila zisyoonto alimwi tulayanda kuti Jehova atukkazikile moyo akutufwida luse. Aboobo Jehova upa citondezyo ncotweelede kutobela ciindi notweendelezya zibi zyabamwi. Notucita zintu munzila yalubomba, tutondezya luyando lwakwe.—Ba-Efeso 5:1, 2.
Amube Aanzila ‘Zyakujalula Myoyo Yanu’
11. Nkaambo nzi Paulo ncaakakulwaizya bana Korinto ‘ikujalula myoyo yabo’?
11 Paulo wakatola myezi iili mbwiibede kakulwaizya mbungano ku Korinto mucisi caba Giliki. Wakabeleka canguzu kugwasya bakwesu ooko alimwi wakali kubayanda. Pele bamwi akati kabo kunyina nobakali kumuyanda pe. Bakali basinkazi kapati. Wakabakulwaizya kuti ‘bajalule myoyo yabo’ mukutondezya luyando. (2 Ba-Korinto 6:11-13; 12:15) Cilayandika kapati kuti toonse tulange-lange mbotulutondezya luyando lwesu kuli bamwi alimwi akulangaula nzila zyakujalule myoyo yesu.—1 Johane 3:14.
12. Mbuti mbotunga twabayanda boonse mumbungano?
12 Sena kuli bamwi mumbungano mbocituyumina kubaa cilongwe ambabo? Ikuti twalisungula kubalekelela bamwi ciindi notwiimpana ambabo mbubonya mbotunga twayanda kuti batucitile, eeci cilakonzya kugwasya kuyumya cilongwe cesu ambabo. Alimwi luyando lwesu kulimbabo lulakonzya kuyaambele ikuti twalangaula bube bwabo bubotu alimwi akubikkila maanu aabube oobo. Ikucita boobu masimpe kuyoopa kuti luyando ndotujisi kulimbabo lukomene.—Luka 6:32, 33, 36.
13. Mbuti mbotunga twajalula myoyo yesu mukutondezya luyando kulibaabo bali mumbungano yesu?
13 Kwaamba masimpe, kuli mpotukonzya kugolela muzintu nzyotukonzya kucitila bamwi. Ambweni inga tacikonzyeki kubaanzya boonse amuswaangano umwi aumwi. Ambweni inga kacitakonzyeki kubabikkilizya boonse ciindi notutamba beenzuma kucakulya. Pele sena inga twasola kujalula myoyo yesu kwiinda mukutola maminiti masyoonto buyo aakubazyiba kabotu boonse bali mumbungano yesu? Sena inga twasola ciindi aciindi kutamba umwi ngotutazyi kabotu kuti tubeleke limwi mumulimo wamumuunda?
14. Mbuti mbotunga twalutondezya luyando luyumu notuli akati ka Banakristoma mbotutana kubonana limwi?
14 Miswaangano yacooko ya Banakristo ipa zyoolwe zibotu zyakujalula myoyo yesu kuli bamwi kwiinda mukutondezya luyando. Kulakonzya kujanika zyuulu-zyuulu zyabantu. Kunyina notunga twabonana abantu boonse bajanika, pele tulakonzya kulilemeka munzila iikonzya kutondezya kuti nzibayanda tuzibikka ambele lyazintu nzyotulombozya. Tulakonzya kutondezya kubikkila bamwi maanu kwiinda mukubasikila aabo bali afwaafwi andiswe akubandika ambabo lyaciindi cakulyookezya. Bumwi buzuba bantu boonse ibakkala munyika banooli bakwesu abacizi, katukamantene mukukomba Leza mwini-mwini alimwi Wisi wabantu boonse. Elyo cinookkomanisya kapati kaka kuzyibana kabotu! Luyando lwesu luyumu luyootukulwaizya kucita boobo. Ino nkaambo nzi ncomutatalikili limwi lino?
Mubandi Wakwiinduluka
• Nokubuka mapenzi akati ka Banakristo, mbuti mapenzi aaya mbwaayelede kumanizyigwa, alimwi ino nkaambo nzi?
• Muunzila nzi luyando lwesu alwalo molweelede kukomena mbotuya buzumanana kukomena munzila yakumuuya?
• Ino mbuti mbocikonzyeka kutondezya luyando kubantu banji kutali buyo kubalongwe besu balikke?
[Mibuzyo yaciiyo]
[Cifwanikiso icili apeeji 148]
Luyando lwa Bunakristo lulatondezyegwa munzila zinji, mbuli mumiswaangano yambungano
