Cibalo 15

Amuswiilile Lulayo, Amutobele Kulaigwa

1. (a) Nkaambo nzi toonse ncotuyandika lulayo alimwi akulaigwa? (b) Ino mmubuzyo nzi ngotweelede kulanga-langa?

IBBAIBBELE kuli Jakobo 3:2 lyaamba kuti: “Toonse tulalubya muziyanza zinji.” Tulakonzya kwiibaluka ziindi zinji notwakaalilwa kupona munzila eeyo Jwi lya Leza molitukulwaizya. Aboobo tulazuminizya kuti ncolyaamba Bbaibbele cililuzi noliti: “Swiilila lulayo akutambula lwiiyo, kuti ujane busongo kumamanino.” (Tusimpi 19:20) Cakutadooneka, twakacinca kale mubukkale bwesu ikutegwa bweendelane akuyiisya kwa Bbaibbele. Pele ino tulimvwa buti ciindi Munakristoma natulaya kujatikizya makani amwi aagaminide?

2. Ino ncinzi ncotweelede kucita ciindi notwalaigwa?

² Bamwi basola kulibotya-botya, kucesya kaambo nkobacita kuti takali kapati naa kupa bambi mulandu. Pele cili kabotu kuswiilila kululayo lupegwa alimwi akulutobela. (Ba-Hebrayo 12:11) Masimpe, kunyina naba omwe weelede kulangila bamwi kupona munzila iilondokede naa weelede kulaya bamwi ciindi aciindi nomuba mutwaambo tutayandiki naa kujatikizya makani Bbaibbele ngolizumizya muntu aumwi kulisalila. Kuyungizya waawo, ambweni ooyo sikulaya ulakonzya tanaakalanga-langa twaambo toonse tujatikizyidwe alimwi zyoonse eezi ulakonzya kwaambilwa munzila yabulemu. Pele mumubandi uutobela, atweezyeezye kuti lulayo naa kulaigwa kwapegwa kuleelede alimwi kuzwa mu Bbaibbele. Ino muntu uupegwa lulayo oolo weelede kulimvwa buti?

 Zikozyanyo Zyabantu Nzyotweelede Kuyeeya Notulaigwa

3, 4. (a) Mmakani nzi Bbaibbele ngolijisi aakonzya kutugwasya kubaa mizeezo yeelede kujatikizya lulayo alimwi akulaigwa? (b) Ino Mwami Saulo wakalimvwa buti kujatikizya lulayo, alimwi ino ncinzi cakatobela?

³ Ijwi lya Leza lilijisi zyakuluula zyakacitika ncobeni kujatikizya bantu bakatobela lulayo lwakali kuyandika. Zimwi ziindi, lulayo lwakali kutobelwaa kululamikwa. Umwi wabantu aabo wakacita boobo wakali Mwami Saulo wa Israyeli. Wakaalilwa kuswiilila Jehova kujatikizya cisi cabana Amaleki. Bana Amaleki bakakazyide babelesi ba Leza kwaciindi cili mbocibede, aboobo lubeta lwa Jehova lwakali lwakuti bana Amaleki alimwi abanyama babo mbobakavwubide bakeelede kunyonyoonwa. Pele Mwami Saulo wakamulekelela mwami wabo kubikkilizyaa banyama babo bakali kulibonya kabotu.—1 Samuele 15:1-11.

⁴ Jehova wakatuma musinsimi Samuele kuti amusinse Saulo. Ino Saulo wakalimvwa buti? Wakaamba kuti wakabanyonyoona bana Amaleki, pele wakasala buyo kulekelela mwami wabo. Pele eeco cakaliimpene akulailila kwa Jehova. (1 Samuele 15:20) Saulo wakasola kutamizya bantu kujatikizya ncaatakabanyonyoona banyama bakavwubidwe, kaamba kuti: “Ndakayoowa bantu, elyo ndakaswiilila majwi aabo.” (1 Samuele 15:24) Kulibonya kuti wakabikkilide maano kapati kubulemu bwakwe, cakuti mane wakaambila Samuele kuti amulemeke kumeso aabantu. (1 Samuele 15:30) Kumamanino, Jehova wakamukaka Saulo kuti tanaakali kweelela kuba mwami.—1 Samuele 16:1.

5. Ncinzi cakacitikila Mwami Uziya naakakaka kumvwida lulayo?

⁵ Imwami wa Juda Uziya “wakapapila Jehova Leza wakwe, wanjila muntempele ya-Jehova kuti atente tununkilizyo.” (2 Makani 26:16) Pele balikke bapaizi mbabakazumizyidwe kuumpa tununkilizyo. Imupaizi mupati naakasola  kumukasya Uziya, ooyu mwami wakanyema kapati. Ncinzi cakacitika? Ibbaibbele lyaamba kuti: “Cinsenda cakaboneka ankumu yakwe . . . nkaambo Jehova wakamuuma. Lino mwami Uziya kali sicinsenda mazuba oonse mane kusikila kubuzuba bwalufu lwakwe.”—2 Makani 26:19-21.

6. (a) Ino nkaambo nzi ba Saulo alimwi a Uziya ncobakalukaka lulayo? (b) Nkaambo nzi kukaka kutobela lulayo ncolili penzi lipati sunu?

⁶ Ino ncinzi cakapa kuti cibayumine ba Saulo alimwi a Uziya kulutambula lulayo? Ikulisumpula ndepenzi lini-lini ndyobakajisi, boonse bakali kulibona kuti balayandika kwiinda bamwi. Ibanji bajanika mumapenzi akaambo kakampenda nkoona aaka. Kulibonya kuti bayeeya kuti kuzumina lulayo kutondezya kukompama kumwi nkobajisi naa kuti kubisya mpuwo njobajisi. Pele kulisumpula nkukompama. Kulisumpula kusinkilila kuyeeya kwamuntu ikutegwa atalike kukaka lugwasyo lupegwa kuzwa kuli Jehova kwiinda mu Jwi lyakwe alimwi ambunga. Aboobo Jehova ucenjezya kuti: “Kulisumpula kulazulwida lunyonyooko, akamikami kali kunembo lyakuwa.”—Tusimpi 16:18; Ba-Roma 12:3.

Tweelede Kulutambula Lulayo

7. Ino nziiyo nzi zikulwaizya zikonzya kuyiigwa kujatikizya ntaamu njaakabweza Musa naakalaigwa?

⁷ Alimwi Magwalo alijisi zitondezyo zibotu zyabantu ibakalutambula lulayo, aboobo tulakonzya kwiiya kulibaaba. Amuyeeye Musa, iwakalaigwaa wisizyala kujatikizya mbwaakali kweelede kweendelezya mukuli wakwe mupati. Musa wakamuswiilila alimwi cakufwambaana wakalutobela lulayo oolo. (Kulonga 18:13-24) Ino nkaambo nzi Musa ncaakalutobela lulayo nokuba kuti wakalijisi nguzu? Nkaambo kakuti wakali muntu uulicesya. “Musa kali mubombemoyo kwiinda bantu boonse baansi.” (Myeelwe 12:3) Ino lubombo luyandika kapati buti? Ibbuku lya Zefaniya  2:3 litondezya kuti lubombo lulabujatikizya buumi bwesu.

8. (a) Ino nzibi nzi nzyaakacita Davida? (b) Ino mbuti mbwaakalimvwa Davida ciindi naakasinswaa Natani? (c) Ino mmapenzi nzi aakatobela akaambo kazibi zya Davida?

⁸ Mwami Davida wakacita bumambi a Bateseba akusola kusisa cibi eeco kwiinda mukujaya Uriya mulumaakwe. Jehova wakatuma musinsimi Natani kuti amusinse Davida. Wakeempwa alimwi cakufwambaana wakazumina kaamba kuti: “Ndabisya kuli-Jehova.” (2 Samuele 12:13) Nokuba kuti Leza wakakuzumina kweempwa kwa Davida, wakeelede kupenga akaambo kacibi cakwe. Jehova wakamwaambila kuti, ipanga ‘tiilyakali kuyooleka kukatazya mukowa wakwe,’ akuti bamakaintu bakwe bakali kuyoopegwa ‘kumweenzinyina’ alimwi akuti mwana wakali kuyoozyalwa mubumambi bwakwe wakali ‘kuuyoofwa.’—2 Samuele 12:10, 11, 14.

9. Ino ncinzi ncotuteelede kuluba ikuti naa twalaigwa naa kululamikwa?

⁹ Imwami Davida wakaliizi mpindu yakali kutobela akaambo kalulayo lweelede. Ziindi zimwi, wakamulumba Leza akaambo kamuntu ngwaakabelesya kumulaya. (1 Samuele 25:32-35) Sena aswebo mbotubede oobo? Ikuti katuli boobo, tuya kukwabililwa kukwaamba akucita zintu zinji zikonzya kutupa kuusa. Pele ino mbuti kuti twajanika mubukkale bumwi bwalo bukonzya kupa kuti tulaigwe naa kululamikwa? Tutabi notuluba kuti eeci ncitondezyo caluyando lwa Jehova, calo icijatikizya bulangizi bwesu bwabuumi butamani mubukkale bubotu kumbele.—Tusimpi 3:11, 12; 4:13.

Bube Butaliboteli Mbotweelede Kubaa Mbubo

10. Ino mbube nzi Jesu mbwaakatondezya kuti bwakali kuyandika kulibaabo bakali kuyoonjila mu Bwami bwakujulu?

¹⁰ Ikutegwa tubaa cilongwe cibotu a Jehova alimwi akubakwesu Banakristo, tweelede kubaa bube bumwi. Jesu  wakabwaamba bube bomwe ciindi naakaleta kana akati kabasikwiiya bakwe akwaamba kuti: “Mwataakusanduka akuba mbuli twana, tamukooyoonjila pe mu-Bwami bwakujulu. Nkaambo kaako umwi aumwi [uulicesya, NW] mbuli kana aka nguwenya uuzooba mupati mu-Bwami bwakujulu.” (Matayo 18:3, 4) Basikwiiya ba Jesu bakeelede kulicesya, mbwaanga bakali kukazyanya akati kabo kujatikizya wakali mupati.—Luka 22:24-27.

11. (a) Ino nkuuli bani nkotweelede kulicesya, alimwi ino nkaambo nzi? (b) Ikuti katuli bantu balicesya, ino tuyoolimvwa buti notwalaigwa?

¹¹ Imwaapostolo Petro wakalemba kuti: “Nyoonse amusame myoyo mitete akugwasyanya, nkaambo Leza ulabakazya basikulisumpula, pele batete-myoyo ulabapa luzyalo.” (1 Petro 5:5) Tulizyi kuti tweelede kulicesya kuli Leza, pele lugwalo oolu lututondezya kuti alimwi tweelede kulicesya akubasyomima. Ikuti katulicesya kubasyomima, kunyina notuya kubijilwa amizeezo mibotu bamwi njobatupa, pele tuya kwiiya kulimbabo.—Tusimpi 12:15.

12. (a) Ino mbube nzi buyandika ibuswaangene kapati akulicesya? (b) Nkaambo nzi ncotweelede kubikkila maanu ambokubajatikizya bamwi kulilemeka kwesu?

¹² Bube bumbi buswaangene kapati akulicesya nkubikkila maanu kulibamwi. Imwaapostolo Paulo wakalemba kuti: “Muntu teelede kuyandaula kuligwasya mwini buyo. Umwi aumwi uleelede kuyandaula kugwasya mweenzinyina. . . . Nkaambo kaako, kufumbwa zintu nzimucita, nikuba kulya nikuba kunywa niciba cintu cimwi, amuzicite zyoonse cakuti kube bulemu kwa-Leza. Mutabiki zilebyo munzila yabantu, nibaba ba-Juda nibaba bamasi niiba imbungano ya-Leza.” (1 Ba-Korinto 10:24-33) Paulo tanaakaamba kuti tweelede kuziyumbila ambali zintu zyoonse nzyotuyanda kucita, pele wakatukulwaizya kweeleba cintu cili coonse cikonzya kukulwaizya umbi kucita  cintu eeco manjezeezyaakwe ncaamwaambila kuti cililubide.

13. Ncikozyanyo nzi cikonzya kutondezya mbotweelede kulubelesya lulayo lwamu Magwalo?

¹³ Sena zintu nzyobayanda bamwi bantu muzibikka ambele aazintu nzyomuyanda? Toonse tweelede kwiiya kucita boobo. Kuli nzila zinji eeci mbocinga cacitwa. Mucikozyanyo, amuyeeye nsamino alimwi abulondo. Aaya mmakani aajatikizya kulimvwa kwamuntu aumwi kweelanaa busolozi bwamu Magwalo bwakuba bantu balibombya, basalala alimwi balondo. Pele ikuti naa mwabona kuti akaambo kabukkale bwabantu mbomukkala limwi mucilawo canu, insamino yanu alimwi akulibamba kusinkilila bamwi kuswiilila mulumbe wa Bwami, sena inga mwacinca? Masimpe, ikugwasya muntu kujana buumi butamani kulayandika kapati kwiinda kulikkomanisya tobeni.

14. Ino nkaambo nzi ncociyandika kulicesya alimwi akulanganya bamwi?

¹⁴ Ikujatikizya kulicesya akulanganya bamwi, Jesu wakapa citondezyo, mane kusikaa kusanzya matende aabasikwiiya bakwe. (Johane 13:12-15) Kujatikizya nguwe, Ijwi lya Leza lyaamba kuti: “Amube amoyo oyo nguwenya iwakali muli-Kristo Jesu. Walo wakali aciimo ca-Leza, nekubaboobo teewakayeeya kuti ncivuumuko kweelana a-Leza, pe. Wakalilonzya, wakalisalila ciimo cabuzike akuba mbubonya mbuli bantu balya maila. Lino naakabonwa kuti waba acikozyano camuntu, wakalibombya akuzumina nikuba kufwa.”—Ba-Filipi 2:5-8; Ba-Roma 15:2, 3.

Mutalukaki Lulayo lwa Jehova

15. (a) Ino nkucinca kuli buti nkotweelede kucita ikutegwa tube aabube butambulika kuli Leza? (b) Ino ninzila nzi njaabelesya Jehova mukutupa lulayo toonse alimwi amukutululamika?

¹⁵ Akaambo kakuti toonse tuli basizibi, kucinca bube bwesu alimwi ambotulilemeka kulayandika ikuti katuyanda  kutondezya bube bwa Leza wesu. Tweelede kusama “buntu bupya.” (Ba-Kolose 3:5-14) Lulayo alimwi akulaigwa zitugwasya kuzyiba motweelede kucinca alimwi akubona mbotunga twakucinca. Ibbaibbele kuligama nkokuzwa malailile ngotuyandika. (2 Timoteo 3:16, 17) Mabbuku aabandika zyamu Bbbaibbele alimwi amiswaangano iibambwaa mbunga  ya Jehova zilatugwasya kutobela caambwa mu Jwi lya Leza. Nokuba kuti twakalumvwa kale lulayo oolo, sena tuya kulubona mboluyandika kulindiswe akusoleka kucinca?

16. Ndugwasyo nzi ndwapa Jehova kuluumwi aumwi wesu?

¹⁶ Caluyando, Jehova ulatugwasya mumapenzi eesu. Ituulunzuma twabantu bagwasyigwa kwiinda muziiyo zya Bbaibbele zyaaŋanda. Ibazyali balabalaya bana babo akubalulamika kutegwa babakwabilile kukulilemeka ikukonzya kubaletela kuusa. (Tusimpi 6:20-23) Mumbungano, bunji bwaziindi bamwi balomba lulayo alimwi anzila zikonzya kubelesyegwa kuzwa kubakambausi balaa luzibo kutegwa bagwasyigwe mukuyaambele mumulimo wabo wamumuunda. Zimwi ziindi, baalu balakonzya kulomba lulayo kubaalunyina naa kuli bamwi balaa luzibo mumulimo. Aabo beelela munzila yakumuuya babelesya Bbaibbele ciindi nobapa lulayo kulibaabo bayandika kulaigwa, beelede kucita oobo amyoyo iibombede. Ikuti mwalaya muntu umwi, amubone kuti ‘mwacenjela kuti anywebo mutatepaulwi azibi.’ (Bagalatiya 6:1, 2, Ci) Inzya, toonse tuyandika lulayo alimwi akululamikwa kutegwa tukombe Leza mwini-mwini uuli alikke calukamantano.

Mubandi Wakwiinduluka

• Mbuti Jehova caluyando mbwatugwasyilizya kubona mbazu motuyandika kucinca?

• Nkaambo nzi banji ncobajana buyumuyumu kutobela lulayo luyandika, alimwi ino mmapati buti makani aaya?

• Ino mbube nzi ibuyandika kapati bukonzya kutugwasya kuswiilila lulayo, alimwi ino mbuti Jesu mbwaakapa citondezyo mumakani aaya?

[Mibuzyo yaciiyo]

[Cifwanikiso icili apeeji 142]

Uziya wakalukaka lulayo, aboobo wakabaa cinsenda

[Cifwanikiso icili apeeji 142]

Musa wakagwasyigwa kwiinda mukutambula lulayo kuzwa kuli Jetero